سەرنووچە:

بێھنا کۆدەتایەکێ ل عێراقێ دھێت

10/9/2020 2:41:06 PM
1379 جار خوێندراوەتەوە
جێگر مامسال
+ -

پشتی نەمانا دەستھەلاتا سونەیان ل عێراقێ، ئەمریکا دەرفەتەک دا شیعەیان داکو عێراقێ بەرەڤ کەنارەکێ ئارام ببەن، بۆ ڤێ مەبەستێ ژی ئەمریکا و دەولەتێن ئەوروپی ھەمی شیانێن خوە مەزاختن ل پێناڤی وێ چەندێ داکو بشێن عێراقێ بەرەڤ سەقامگیریەکا سیاسی و ئابوری ببەن و ئەو نەھامەتیێن سونەیان توشی عێراقیان کرین ئەو دووبارە نەکەنەڤە.

پشتی بورینا نزیکی دوو دەیان و خەرجکرنا سەدان ملیار دۆلاران، شیعەیان ژبلی وێ چەندێ کونەشیان سەقامگیریا سیاسی و ئابوری ل عێراقێ بچەسپینن بەلکو عێراق توشی دەھان قەیرانێن ئێک ل دویڤ ئێک کر و عێراق کرە کارگەھا بەرھەم ئینانا تیرۆرێ.

ھەروەسا عێراق کرە ئێک ل وان دەولەتان کو یا نقومبووی دگەندەلیێدا و یا گەشتیە ئاستەکی کو ب زەحمەت دشێت موچەیێن فەرمانبەرێن خۆ دابینبکەت.

سەرەڕای ڤان ھەمی شکستان، بەلێ مەزنترین دلگرانیا ئەمریکا ئەوە کو پشتی ڤان ھەمی ھەڤکاریێن وان بۆ لایەنێن شیعی، بەلێ وان عێراق ب تەمامی ڕادەستی ئێک ل مەزنترین دوژمنێن ئەمریکا کر کو ئیرانە و ڕۆژانە مەزنترین بالیۆزخانا وان ل ڕۆژھەلاتا ناڤەڕاست کو ل ناڤچەیا کەسکە ل باژێرێ بەغدا دھێتە موشەکبارانکرن ژلایێ میلیشیایێن نزیک ل ئیرانێ.

ئەمریکا نۆکە یا ل ڕێیەکێ دگەڕێت داکو دەستھەلاتێ ل لایەنێن شیعی بستینیت و ڕادەستی ھێزێن سونی بکەتەڤە، بۆ وێ چەندێژی دبیت ئێک ل بھێزترین بژاردەیان ئەوبیت کو ب ڕێیا کودەتایا سەربازی دەستھەلاتا وان ب سپۆنسەریا ئیرانێ ل عێراقێ بدوماھیک بئینیت.