سەرنووچە:

پارێزگارێ دهۆکێ د ناڤبەرا ئەڤرۆ و سوبەهی دا

8/11/2020 5:44:39 PM
2442 جار خوێندراوەتەوە
سەفوان عەبدولا
+ -

ئەڤرۆ عەلی تەتەر پارێزگارێ دھۆکێ ب مەرەما ھایداربوون ژ ڕەوشا کرێکار و کاسبکار و ھەژاران سەرەدانا بەشەکا بازاڕێن سەنتەرێ پارێزگەھا دھۆکێ کر، پڕانیا پەیجێن دھۆکێ و نێزیک  ژ پارتا دەستھەلاتا دەڤەرێ وەک پالەوان و گرنگیدەرێ خەلکی و ژیارا وان نیشاندایە.

لڤێرە چەند پرس پەیدا دبن وەک کا پارێزگاری ئەڤرۆ چکر و چ مفا گەھاندە وی خەلکی، چ سۆز دا و دلێ خەلکی ب چ خۆشکر؟ بەرسڤ یا زەلالە ھەلبەت ئەگەر ب ھندی بچوکیا سەرێ دەرزیەکێ کارەک کربا دا پەیجێن گرێدای وان ب چیا نیشانی خەلکی دەن، بەروڤاژی کو تنێ وان پەیجان چەند وێنە بەلاڤکرن و گوتن پارێزگار د ناڤ ھەژاران دایە، ئانکو ھەر ھندە بوویە و چوویە ناڤ ھند جھان و ب وێنەگری و تەرتیباتێن خۆ، ئانکو چ نەکریە تنێ وێنە نەبن.

خەلک یێ برسی و بێکار و نەخۆش و بێ دامەزراندن و مووچە و ماف و ژیان ... ھتد، خەلک یێ ژ ھەوە نەڕازیە و ب دوو وێنەیێن ھەوە برین سارێژ نابن، سوبەھی خۆنیشاندانن سەیدایێ عەلی تەتەر ئەز ژ دل دبێژم تە ئەڤرۆ حالێ خەلکێ خۆ دیت، دیرۆکێ بنڤیسە و دەست ژ کارکێشانا حکومەتا خۆجھیا دھۆکێ ڕابگەھینە وەک لوبنان و پێشتر عێراق و چەندین میناکێن دی.

خالێن ڕەش بخۆ زێدەنەکەن و بزماران ژ تابیتا خۆ زێدەنەکن، چ دی خەلکی نەچەوسینن تە ئەڤرۆ بەریا کو خۆنیشاندان بھێتە کرن تە گەفا ڕێگریێ کر، ھەتا کەنگی دێ چاڤان ل خەلکێ ھەژار و بەلەنگاز و بێچارە سۆر کەن، ئەڤرۆ ڕێگری سوبەھی ڕێگری دووسبە ڕێگری سالەکا دی ڕێگری دێ ھەتا کەنگی ڕێگربن، گەلەک نەمایە و دێ خراب پەقیت ھاش خۆ ھەبن توڕەیێ سنورێ ھەی.

ئەگەر ئەو کاسب دوکاندار و خەلکێن کو ئەڤرۆ عەلی تەتەری سەردانکری و وێنە دگەل گرتینە و ھاتینە بەلاڤکرن، سوبەھی ھەر ھەمان وان کەسان پشکدارێی د خۆنیشاندانێن ناڤ بازاڕێ دھۆکێ دا بکەن، دێ ھەلویست و کارڤەدانێن عەلی تەتەری چاوا و چ بن؟ ئەرێ دێ جارەکا دی ب دەستێ دەرەکی و بناڤکەت و گەفێن دەستبڕینێ و سزادانێ لێکەت یان ژی دێ پشتەڤانیا وان کەت؟

پشتراستم دێ ڤێجارێ وێنەیێن وان ھەژاران ل ئاسایش و دەزگەھێن ئەمنیێن دھۆکێ ھێنە ھەلاویستن و ب دەستێ دەرەکی و تێکدەر و خائین دھێنە دانان.