سەرنووچە:

گەر داخوازا وە بیت؛ ئەزێ بگڕنژم!

7/11/2020 12:58:22 PM
3522 جار خوێندراوەتەوە
هەلگر خەمڕەڤین
+ -

ل رۆژا شەمبیێ ٤ێ ٧ێ ٢٠٢٠ێ، سەرۆکوەزیرێن ھەرێما کوردستانێ مەسروور بارزانی د گرتە ڤیدیۆیەکێ دە ھەر وەکو بەرسڤا پرسێن ھەڤوەلاتیان ددەت، پرسا کەسەکی دخوینیت کو ژێ دپرسیت؛`بۆچی زۆر پێ ناکەنی`؟! ھەر ئێکسەر بەری بەرسڤدانێ مەسروور گڕنژینەکێ دئێخیتە سەر لێڤێن خوە و پاشی وەکو بەرسڤ، دبێژیت؛ ``بەخوا نازانم، ئەوە ئێستا پێدەکەنم، بەلام ئەگەر پێویست بە پێکەنین نەبێ، چۆن پێبکەنم، ئەگەر پێویستیش بێ، زۆر حەزەکەم و ھیوادارم وەڵامەکەمت بە دڵ بێ.

ئەو ب خوە، ئەڤ کارڤەدان و بەرسڤا سەرۆکێ حوکمەتێ ھەوجەی شرۆڤەکرنێ ناکەت، ژبەرکو ھەر کەسەک دشێت ب ساناھی ژ ئارمانجا مەسروور بارزانی ژ وێ گڕنژینێ بگەھیت، ژبەرکو ئەو سەرکردەیێ لەشکەری و پاراستنێ کو کەسەکی چو جاران ھەست و لڤینەکا ب گڕنژین و دلخوەشکەر ژ وی نەدیتیە، چاوا ھۆسا ب ساناھی دێ کەتە کەنی، ھەکەر مەرەما وی ب تنێ گڕنژین ب بێھەڵویستی و بێھشییا وان کەسان نەبیت کو ئەو پرسێن نەلۆژیکی د رۆژەڤەکا ھۆسا دژوار دە ژ سەرۆکێ حوکمەتێ دکەن، ڤێجا کی ل شوونا وی بیت؛ دێ ب کەنی بەرسڤا ڤان دەبەنگان دەت، ژبەرکو ھیڤیا وان ئەوە کو کەنیا سەرۆکوەزیرێ خوە ببینن!.

ھەڤدەم دگەل بەڵاڤکرنا گرتە ڤیدیۆیێن سەرۆکێ حوکمەتێ، ل ھەر کوژی و ئالیەکێ باشوورێ کوردستانێ نەرازیبوون و تەنگەزاری ھەنە کو خەلک ئێدی تەنگاڤ و بێچارە بوونە ژ بێ پارەیی و کێمکرن و نەدانا مووچەیان، تۆپبارانکرن و ئێریشێن بەردەوامێن لەشکەرێ ترکیێ لسەر ناڤچەیێن سینووری یێن باشوورێ کوردستانێ، گرتن و ڕەڤاندنا بەردەواما چاڵاکڤان و ڕۆژنامەڤانان و گەلەک پرسێن دی کو ڕۆژەڤا نھانە.

ئەڤجا د ڕەوشەکا ھۆسا دە، چ پێدڤی دکەت سەرۆکێ حوکمەتێ کارێ خوە بکەتە شکاندنا ھەستێن خەلکی ب بەرسڤدانا وان پرسێن کو وان ژێ گرتینە و نەلۆژیکی و دوور ژ ڕۆژەڤا نھا. وی ب خوە ھای ژێ ھەیە کو ب دەستێن وان؛ خەلک بێ مووچە و پارە ماینە، خەلک دەیندار بووینە، خەلک ژ بێ پارەییێ راستی کێشەیێن خێزانی و جڤاکی بووینە، بەرچاڤترین میناک ژی ژبۆ ڤێ یەکێ کوشتنا دەیندارەکییە ب دەستێ کەسێ خودانێ پارەیان لبەر دەرێ دادگەھا زاخۆ. ھەر ئەو سەدەمن کو بەرھەمێن خومالی یێن چاندنێ بێبھا بن و ئێدی چو پارەی نەکەن و ھەما کڕیار ژی نەبن، ژبەرکو ئەو ناخوازن خەلکێ بەھرەمدار ل ھەرێما کوردستانێ ھەبن، بەلکو ئەو دخوازن ھەردەم خەلک ژبۆ پاڕیەکێ نانی؛ خوە ژبۆ وان بچەمینن.

سەرۆکێ حوکمەتێ کو ئەو ب پارتا خوە و ئێکەتی ڤە سەدەمێن ھەر ئێش و مالوێرانیەکا خەلکینە، وان ب خوە پێشدەم ب پلانداڕێژی ڕەوش گەھاندیە ڕۆژەڤا ئەڤرۆ، داکو ئەز و تو یێ برسی و بێبەرھەم؛ دلخوەش و سەربلند بین دەما سەرۆکێ حوکمەتێ ب مە بکەتە کەنی!
ڤێجا ھندی خوزیا مە؛ کەنی و گڕنژینا بەرپرسان بیت، سەرێن مە ژی لبەر پێن وان دێ ھەر شۆر بن!.