سەرنووچە:

ب کرێیا خواندنا قوتابیان دیارنەمانا ٤٠٠ ملیار دیناران ناھێتە چارەسەرکرن

6/17/2020 10:18:21 PM
2248 جار خوێندراوەتەوە
شرین عومەر
+ -

پارە ل ھەر جھەکێ ئالاڤەکە کو مرۆڤ ژیانا خوە پێ دبۆرینن. ملەتێن جیھانێ کار دکن بۆ پێشئێخستنا بارێ خوە یێ ئابووری وەک تاک، پاشی ژی وەک ملەت، ب تنێ ل ڤێ پارچا ئەردی نەبیت یا ھندەک ب وەڵاتەکێ بێ ناسنامە و ھندەک ژی ب ھەرێمەکا بندەست ددن نیاسین و دبێژنێ کوردستان.

جودا ژ بەرپرسێن وەڵاتێن بیانی، ل چاڤ بەرپرسێن ڤێ ھەرێمێ، پارە ب ڕامانا کەسایەتی و کەرامەت دھێت، لەوڕا ھەر چەند ژ وان بھێت پارەیێ خوە وەک مووچە زێدە دکن، دیسان پارەیێ خەلکێ خوە یێ ھەژار ھەم ب ئاشکەرا ھەم ژی ب دزی ڤە; دکوگەھێن خوە یێن تایبەت دە کومڤە دکەن. داوی بوویەرێن ڕۆژەڤێ ژی ٤٠٠ ملیار دناڤ حکومەتێ دە بەرزەبوون و چ جادە تژی نەبوون و دەنگێ گەل وەکی جارێن بۆری د گەوریا گەلێ مەدە مایە خەندقاندی.

سەرەرای پتر ژ دوو مەھێن گەرەنتیکرنێ و ڤەقەتاندنا قوتابیان ژ زانینگەھان و نەدانا ئەرزاق و مووچەیێن فەرمانبەر و خانەنشینان و دیسان نەبوونا دەرفەتێن کاری بۆ کرێکاران، ب ھەمی دەنگێ خوە گەف ل قوتابیان دھێنە کرن کو ئەگەر کرێیا خواندنا خوە یا بێ وەرگرتنا وانەیان نەدەن; نمرەیێن وان نەھێنە نیشاندان. ھەروەکی دێ پارەیێن قوتابیێن ھەژار قەرەبویا ٤٠٠ ملیارێن بەرزەبووی کەن.

ل چەندین زانینگەھان بۆ نموونە زانکۆیا زاخۆ ناڤێ وان قوتابیان یێن کرێیا خواندنا وەرزێ دووێ نەداین ڕەش کرینە و ب تنێ نمرەیێن وان قوتابیان بەڵاڤ کرنە یێن کرێیا وەرزێ دووێ داین. ئەڤە ژی د دەمەکێ دایە کۆ بەشەکا زوورا قوتابیان ئەنجامێن خوە نزانن، دەمەکێ کێم ددەست دا مانە کو ئەگەر ب بابەتەکێ کەتبن ڕاپورتان پێشکێشی مامۆستایێن خوە بکن.

ژ بەرکۆ قوتابی بنیاتێ ئاڤاکرنا ملەتانە، پێتڤیە قوتابیێن ئێڤاران یێن زانکۆیێ بزانن کۆ مافێ وانە بەشێن خوە تێدە دبینن بێ بەرامبەر بخوینن! پاشی ژی بزانن وەرگرتنا کرێیا وەرزێ دووێ نە تشتەکێ ڕەوایە و پێتڤیە قوتابی ببن یەک دەنگ و ئەو دەنگێ خوە یێ ب ساڵان دگەوریا وان دە مایە ھەلاویستی ل بەرامبەر ڤێ حکومەتا مافخوەر دەربێخن، داکو زارۆیێن وان فێری بێ دەنگی و سەرشوڕیێ نەبن و د پەڕاوێزەکا مری دا نەژین.