سەرنووچە:

ئێن ئاڕ تی داوی زانیارییان لسەر لێبرینا موچەی ئەشکەرادکەت

فۆتۆ: 
2021-05-15

1813 جار خوێندراوەتەوە

هاریکارێ سەرۆکێ حکومەتێ بۆ کاروبارێن وەبەرهێنان و راژە ڕاگەهاند، هەیا نها بڕیار لسەر لێبرینا موچەی نەهاتیە دات، دبێژیت ژی، "د پرۆژێ بودجێ هەرێمێ دا بەحس ل لێبرینا موچەی نەهاتیە کرن".

رێباز حەملان هاریکارێ سەرۆکێ حکومەتا هەرێمێ بۆ کاروبارێن وەبەرهێنان و راژە بۆ ئێن ئاڕ تی بەحس ل وێیەکێ کر، جڤاتا وەزیران چ بڕیار دەربارەی پارڤەکرنا موچەیێ ڤێ مەهێ ب لێبرین یان بێ لێبرین نەداینە، دبێژیت ژی، "چاڤەرێینە بەغدا پشکا هەرێمێ بهنێریت".

پشکا هەرێمێ د بودجێ عێراقێ دا ب ١٢.٦٧% هاتیە دیارکرن، حکومەتا هەرێمێ هاتیە پابەندکرن ب رادەستکرنا ٢٥٠ هزار بەرمیلێن رۆژانە ب بهایێ سۆمۆ دگەل رادەستکرنا نیڤا داهاتێ دەرازینکێن سنوری.

رێباز حەملان، ئاماژە ب وێیەکێ ژیکری، رۆژا ژ ١٩ی ئەیارێ جڤاتا وەزیران دێ لسەر موچەیێ ڤێ مەهێ جڤیت و هەیا نها یا رووهن نینە "ئەرێ دێ ب لێبرین هێتە پارڤەکرن یان ب بێ لێبرین".

ئەوژی دایە دیارکرن، وەزارەتا دارایی تەڤایا داهاتان کومڤەدکەت و ئەڤەژی هاریکاریا حکومەتێ دکەت بۆ بڕیاردانێ لسەر موچەی.

ئەڤەژی ددەمەکیدایە، حکومەتا هەرێمێ ب هێجەتا کێمیا داهاتی و داکەتنا بهایێ پەتڕۆلێ، ب لێبرینا ٢١% موچەیێ فەرمانبەران پارڤەدکەت، ددەمەکیدا بهایێ پەتڕۆلێ ب نێزیکی ٧٠ دۆلاران مامەلە پێ دهێتە کرن و داهاتێ ناڤخۆ ژی بهەڤبەرکرن ب سالێن دەربازبووی ب رەنگەکێ بەرچاڤ بلندبوویە.