سەرنووچە:

یۆنامی: رەخنەگرێن دەستهەلاتێ ل هەرێمێ، ڕاستی گرتنا هەڕەمەکی دبن

ڕاستی گرتنا هەڕەمەکی دبن
فۆتۆ: 
2021-05-12

221 جار خوێندراوەتەوە

د ڕاپۆرتەکێ دا، نڤیسینگەها مافێن مرۆڤی نەتەوێن هەڤگرتی و هنارتیێ نەوێن هەڤگرتی بۆ هاریکاریا عێراقێ / یۆنامی بەحسا وێیەکێ کر، "ئەو کەسێن کو رەخنە ل دەستهەلاتێ گرتین ڕاستی گەفان و لێدانێ و گرتنا هەڕەمەکی بووینە".

ئەڤرۆ چارشەمبی، نڤیسینگەها مافێن مرۆڤی نەتەوێن هەڤگرتی و هنارتیێ نەوێن هەڤگرتی بۆ هاریکاریا عێراقێ / یۆنامی د ڕاپۆرتەکێ دا ئاماژە ب وێیەکێ کر، ل دەمێ دناڤبەرا مەها ئادارا ٢٠٢٠ێ بۆ نیسانا ٢٠٢١ێ، حالەتێن بەرتەنگکرنا ئازادیا ڕادەڕبرینێ د هەرێما کوردستانا عێراقێ دا زێدە بووینە، هندەک ژوان کەسێن رەخنە ل دەستهەلاتێ گرتین، ڕاستی ناڤزراندنێ بووینە، هەیا هندەک ژوان "دڤێ داویێ دا لدیڤ یاسایێن گرێدای ب ئاسایشا نەتەوەیی ڤە هاتینە سزادان".

د بەشەکێ دیێ ڕاپۆرتێ دا، یۆنامی بەحس ل پێشێلکاریێن دەستهەلاتدارێن هەرێمێ دکەت هەمبەر دەزگەهێن میدیایی و رۆژنامەڤانان د دەمەکی دا، نڤێسینگەها ئێن ئاڕ تی ل باژێرێن هەولێرێ و دهۆکێ و پشتی وێیەکێ نڤێسینگەها سەرەکی یا کەنالی ل سلێمانیێ داخستن.

ئاماژە ب وێیەکێ ژیکر، کۆمەلگەهەکا دیموکراسی پێتڤی ب وێ هەیە کو دەزگەهێن میدیایی و چالاکڤان و ڕەخنەگران، شیانێن وێیەکێ هەبن کو بێی ترس و دوودلی و سانسۆر ڕومالا بابەتێن گشتی بکەن، هەروەسا وەلاتیان مافێ دەستکەفتنا زانیاریان هەبیت.

رۆژا شەشی ڤێ مەهێ، سەرۆکایەتیا دادگەها پێداچووونا هەرێما کوردستانێ بڕیارا دادگەها تاوانێن هەولێرێ سزایێ شەش سالێن زیندانکرنێ بۆ پێنج رۆژنامەڤان و چالاکڤانێن بەهدینان پەسەندکر.

د ڕاگەهاندنەکێ دا، کونسولخانەیا ئەلمانیا ئاماژە ب وێیەکێ کر، "دلگرانین ژ بڕیارا دادگەها تەمیزێ ب دژی پێنج رۆژنامەڤان و چالاکڤانێن بەهدینان و بڕیارەکا بێی مانایە".

دەربارە وێیەکێ ژی، کونسولخانا گشتی یا ئەمریکا ل هەولێرێ د لێدوانەکا تایبەت دا بۆ ئێن ئاڕ تی هەلویستێ خۆ دەربارەی سزادانا دەستەسەرکریێن بەهدینان ب شەش سالێن زیندانگرنێ ڕاگەهاند، "ویلایەتێن هەڤگرتیێن ئەمریکا هەر ژ دەستپێکێ پشتەڤانیا ئازادیا ڕادەربڕینێ و میدیایان کریە".

ئەڤەژی د دەمەکی دایە، نێزیکی حەفت مەهانە چەند رۆژنامەنوس و چالاکڤانەکێ مەدەنی ل بەهدینان هاتینە دەستەسەرکرن، ل ١٦ی مەها سباتا ئەڤسالەدا ژی ل دادگەها تاوانێن هەولێرێ دادگەهکرنا پێنج ژ وان برێڤەچوو و تێدا دادگەهێ بڕیارا سزایێ شەش سالێن زیندانکرنێ بۆ هەر ئێک ژ وان دەرخست.