سەرنووچە:

حەشدا شەعبی بەرسڤا وەزارەتا ناڤخۆ و دژەتیرۆرا کوردستانێ دا

کارڤەدانێن هێرشا مووشەکیا سەر هەولێرێ
فۆتۆ: 
2020-10-01

3257 جار خوێندراوەتەوە

فەرمانداریا ئۆپەراسیۆنێن موسل یا حەشدا شەعبی ڕاگەهاند، د کارڤەدانێن بلەزێن بوویەرا ب ئارمانجگرتنا هەولێرێ دا ئەو مەندەهۆش مانە و دبێژیت، ئەو دەڤەرا مووشەک لێ ئاراستەی هەولێرێ کرین دەڤەرەکا هەڤبەشە د ناڤبەرا پێشمەرگە و ئارتێشا عێراقێ و حەشدا شەعبی دا.

فەرمانداریا ئۆپەراسیۆنێن موسل یا حەشدا شەعبی ڕاگەهاندنەک دەربارەی هێرشا شەڤا دەربازبوویی یا هەولێرێ بەلاڤکر و تێدا هاتیە، "مە دیڤداچوون بۆ وان داخویانی و هەلویستان کریە، کو دەربارەی ئارمانجگرتنا باژاڕێ هەولێرێ ب مووشەکان هاتنە نیشاندان و د کارڤەدانێن بلەزێن پشتی بوویەرێ دا ژی ئەم مەندەهۆش بووینە".

ئەو یەک ژی دیارکریە، "ل وێ دەڤەرا کو مووشەک هاتیە ئاراستەکرن بوو هەولێرێ دەڤەرەکا ڤالایە، دەڤەرەکا هەڤبەشە د ناڤبەرا هێزێن پێشمەرگە و ئارتێشا عێراقێ و حەشدا شەعبیا شەبەکە".

بەحسا وێ ژی کریە، "ڤەکۆلین لسەر بوویەرێ دەستپێکرنە، ب پشتگرێدان ب کامیرەیێن چاڤدێریێ دێ بزاڤێ کەن چاوانیا هاتنا وێ بارهەلگرا مووشەکی بۆ وێ دەڤەرێ ببینن."

دایەزانین ژی، "مە فەرمانکریە بۆ لێگەریان و دیڤداچوونێ بۆ وان کەسێن مووشەک هاڤێتین و ئەو دەڤەرا ترۆمبێلێن وان لێ هاتین، ئەو ئالیێ دەستبسەر دەڤەرێ ژی دا گرتی، ل داهاتی دێ ئەنجامێن ڤەکۆلینێن خۆ ڕاگەهینین."

شەڤا دەربازبوویی وەزارەتا ناڤخۆیا حکومەتا هەرێمێ ڕاگەهاند، شەش مووشەک ل سنورێ پارێزگەها موسل ئاراستەی بالەفرخانەیا ناڤدەولەتیا هەولێرێ هاتنە کرن و چ زەرەرەکا گیانی و ماددی نەبوونە، هەڤدەم، دژەتیرۆرا کوردستانێ ڕاگەهاند، مووشەک ژ ئالیێ حەشدا شەعبی ڤە هاتنە ئاراستەکرن.

 س.م