سەرنووچە:

ئەو چ دەرزیە ل دهۆکێ ب ١٢ وەرەقان دهێتە فرۆتن و بۆ نەخۆشێن کۆرۆنایێ دهێتە بکارئینان؟

فۆتۆ: 
2020-09-20

1042 جار خوێندراوەتەوە

پشتی بەلاڤبوونا دەنگۆیێ بکارئینانا دەرزیەکێ بۆ توشبوویێن کۆرۆنایێ و پێ مرنا نەخۆشان، نۆژدارەکێ پسپۆر د بیاڤێ نەخۆشیێن بەڕەڤانیا لەشی دا دەربارەی وێ یەکێ ڕاگەهاند، هەیا نها گەلەک ڤەکۆلین لسەر وێ دەرزیێ دبێژن، رێژا ژ سەدێ ٤٥ یا مرنێ کێم دکەت، بۆ وان کەسێن دبن چاڤدێریا چردانە دهێتە بکارئینان و نابیت هەر کەسەک بکاربیت.

هیشام یوسف نۆژدارێ پسپۆر د بیاڤێ نەخۆشیێن بەڕەڤانیا لەشی ل دەما پشکداریکرن د گەشتا نووچەیێن ئێن ئاڕ تی دا ڕاگەهاند، "ئەڤ دەرزیە سەدێ سەد نەچارەسەرە بۆ نەخۆشیا کۆرۆنایێ، لێ وەک هەڤکار دهێتە بکارئینان و ئەڤ دەرزیە ل نەخۆشخانەیێن مە نینە، هەروەسا گەلەک جورێن وێ د بازاری دانە هەنە و هند ژ وان کوالیتیا وان نەباشە".

دیارکر ژی، "ئەڤ دەرزیە ل گەلەک وڵاتان دهێتە بکارئینان لێ نە سەدێ سەدە، ل هندەک وڵاتان مفا هەبوویە ژبۆ نەخۆشێن کۆرۆنایێ، هەروسا بکارئینانا وێ لسەر نۆژداری دمینیت و ل گوری وان فەحسێن دهێنەکرن".

بەحسا وێ یەکێ ژی کر، "کو ئەگەر ل دەرڤەی رێنمایان بهێتە بکارئینان دبیت مەترسیا جان ژ دەستدانێ پەیدا بکەت، پێدڤیە ئەو دەرزیە یا ئیکسپایەر نەبیت و ژ کۆمپانیایەکا رەسەن بیت، پێدڤیە حکومەت ڤێ دەرزیێ دابین بکەت و دبن شیرەتێن نوژدار و ڕاوێژکاران دا بهێتە بکارئینان".

دەربارەی کارێ وێ دەرزیێ نۆژدارێ ناڤبری گوت، "کارێ ڤێ دەرزیێ بەرەڤانیا لەشی دئینیتەخار"، ئانکو بۆ وان نەخۆشانە کۆ بەڕەڤانیا لەشێ وان گەلەک زێدە دبیت و دبیتە سەدەما تێکدانا ساخلەمیا نەخۆشی.

دەما چەند ڕۆژانە د تۆڕێن جڤاکی دا دەنگۆیێ هەبوونا دەرزیەکێ بەلاڤببوو، کو دهات گوتن بۆ نەخۆشێن کۆرۆنایێ دهێتە بکارئینان و ب بهایێ ١٢ وەرەقان (١٢٠٠ دۆلاران) دهێتە کڕین و نەخۆش پێ جانێ خۆ ژدەست ددەن، ڤێ یەکێ ژی کارڤەدان لپیە خۆ ئینان.

دەربارەی ڤێ یەکێ ژی ساخلەمیا دهۆکێ زەلالکرنە بەلاڤکر و ڕاگەهاند، چارەسەریا نەخۆشێن کۆرۆنایێ ل دەف وان لگۆری پرۆتۆکولێن جیهانی یێن چارەسەریا نەخۆشیا کۆرۆنایێ دهێتەکرن، گوت ژی، دەرمانێن دکسامیتازون، کو نوکە ل پتریا وەلاتێن جیهانێ ب پەسەندکرنا رێکخراوا ساخلەمیا جیهانی بۆ هندەک نەخۆشێن رەوشا وان دژوار دهێتە ب کارئینان، مفایەک باش ژێ هاتیە وەرگرتن.

س.م