سەرنووچە:

بۆمبەبارانا دوهی یا بالەفرێن تورکیا ل سنورێ بامەڕنێ زێدەتری ٢٠٠ دۆنمێن ڕەز و باغان شەوتاندنە

فۆتۆ: 
2020-08-15

205 جار خوێندراوەتەوە

دوهی ئەینیێ بالەفرێن تورکیا تڕۆمبێلەکا پەکەکێ ل سنورێ گوندێ ئەرەدنا یێ گرێدایی ناحیەیا بامەڕنێ بۆمبەبارانکر و تێدا ژبلی زەرەرێن گیانی، زێدەتری ٢٠٠ دۆنمێن ڕەز و باغێن وەلاتیان شەوتین.

بێوار عەبدولعەزیز بەرپرسێ ڕاگەهاندنا بەڕەڤانیا باژاڕێ دهۆکێ بۆ ئێن ئاڕ تی ڕاگەهاند، پشتی بۆمبەبارانا بالەفرێن تورکیا ئاگرەکێ مەزن ب پیش و پاوانێ دەڤەرێ کەفت، ب ئاوایەکێ زێدەتری ٢٠٠ دۆنمێن عەردی شەوتینە کو ڕەز و باغێن وەلاتیان تێدانە.

دیارکر ژی، ژبەر کو وێ دەڤەرێ مەترسیا بەردەواما بۆمبەبارانان لسەر هەیە ئەو نەکارینە تیمێن خۆ بنێرن بۆ ڤەمراندنا ئاگری، هەر ژبەر وێ یەکێ ژی زەرەر زۆر بووینە.

هەڤدەم، بەشەک ژ وەلاتیێن خودان ڕەز و باغ ل وێ دەڤەرێ بۆ ئێن ئاڕ تی دانەزانین، ژبەر وێ بۆمبەبارانێ زێدەتری ٥٠٠ دارێن گیز، باهیڤ و مێوێن تری شەوتینە و زەرەرەکا زۆرا ماددی ب وان کەفتیە، ب تایبەت کو نها دەمێ پێگەهشتنا بەرهەمێن وایە.

بەریا نیڤرۆیا دوهی ئەینیێ بالەفرێن تورکیا تڕۆمبێلەکا پەکەکێ ل گوندێ ئەرەدنا یێ گرێدایی ناحیەیا بامەڕنێ کرە ئارمانج و تێدا دوو گەریلا شەهیدبوون و دوویێ دی ژی برینداربوون، هەروەسا ئاگر ب پیش و پاوانێن دەڤەرێ کەفت و هەیا درەنگیا شەڤا دەربازبوویی یێ بەردەوام بوو.

نیهاد ئۆرەماری-ئامێدی