سەرنووچە:

سی پی جەی: ل هەولێر و دهۆکێ ئاسایشێ بنپێکاری لهەمبەر ئێن ئاڕ تی کریە

فۆتۆ: 
2020-08-14

273 جار خوێندراوەتەوە

کۆمیتەیا داکۆکیکرن ژ ڕۆژنامەڤانان ڕاگەهاند، پێدڤیە دەستهەلاتدارێن هەرێما کوردستانێ دەستان ژ بێزارکرنا ڕاگەهاندنان بەردەن و ئەو کەلوپەلێن دەستبسەردا گرتین بۆ ڤەگەڕینن و ڕێ بدەن بێ ترسا هێرشکرن و دەستەسەرکرنێ نووچەگەهان ب ئازادی ڕوومالا خۆنیشاندانان بکەن.

کۆمیتەیا داکۆکیکرن ژ ڕۆژنامەڤانان یا بەرنیس ب (سى پى جەى)، د ڕاگەهاندنەکێ دا بنپێکاریێن هێزێن ئاسایشێ بۆ سەر ڕۆژنامەڤانان و کەنالێن ڕاگەهاندنێ ل دهۆک و هەولێرێ بەلاڤکرن و دیارکر، هێزێن ئاسایشێ چووینە سەر ئۆفیسا کەنالێ ئێن ئاڕ تی ل دهۆکێ و ل دەمژمێر ١٠ێ سپێدێ هەیا کو ٧ێ ئێڤاری دۆرپێچکربوون، ژبۆ کو نەکارن ڕوومالا خۆنیشاندانێن وێ پارێزگەهێ بکەن.

دیارکریە ژی، هەر د هەمان ڕۆژدا ل هەولێرێ هێزێن ئاسایشێ بۆ دەمەکێ کارمەندەکێ کەنالێ ئێن ئاڕ تی دەستەسەرکربوو.

ئیگناسیۆ دێلگادۆ نوینەرێ ڕۆژهەلاتا ناڤەڕاست و باکورێ ئەفریقا یێ وێ سازیێ ڕاگەهاندیە، دەستەسەرکرنا ڕۆژنامەڤانان بێ مۆلەتا دادگەهێ و دەستبسەرداگرتنا کەلوپەلێن ڕۆژنامەڤانیێن وان و هێرشکرنا سەر تیمان، نیشانەیەکا ڕوونە لسەر سانسۆرکرنا ڕوومالا خۆنیشاندان و ئالۆزیان ژ ئالیێ دەستهەلاتدارێن هەرێمێ ڤە.

دایەزانین ژی، ئەگەر هەرێما کوردستانێ دخوازیت بانگەشەیێن خۆ بۆ هەبوونا دیموکراسیێ ل هەرێمێ ب جدی وەربگریت، پێدڤیە بەرپرسێن وێ هەرێمێ پشتڕاستیێ بدەن، کو هەموو ڕاگەهاندن ب ئازادی کاربکەن بێ گوهدانە وێ یەکێ کا گرێدایی چ ئالیەکێنە، هەڤدەم، دەملدەست تەڤاهیا کەلوپەلێن ڕۆژنامەڤانیێن وان بۆ ڤەگەڕینن.

ڕۆژا ١٢ێ ڤێ مەهێ، خۆنیشاندانێن سەرتاسەری ل پڕانیا باژاڕ و باژاڕۆکێن هەرێما کوردستانێ بڕێڤەچوون، لێ ل پارێزگەهێن دهۆک و هەولێرێ بەرپرسان ڕێ ب خۆنیشاندا و ڕوومالکرنا خۆنیشاندانان نەدان و هێرشکرنە سەر وەلاتی و ڕۆژنامەڤانان.

س.م