سەرنووچە:

دۆران کالکان: تورکیا دخوازیت عەفرینێ هەیا خواکورکێ ژ کوردان ڤالا بکەت

فۆتۆ: 
2020-07-15

270 جار خوێندراوەتەوە

ئەندامەکێ کۆمیتەیا ڕێڤەبەریا پەکەکێ دبێژیت، تورکیا دخوازیت عەفرینێ هەیا خواکورکێ ژ کوردان ڤالابکەت و گرۆپێن توندڕەو تێدا بجیبکەت.

دۆران کالکان ئەندامێ کۆمیتەیا ڕێڤەبەریا پەکەکێ دەربارەی هێرشێن ڤان داویان یێن تورکیا بۆ سەر چەند دەڤەرێن هەرێمێ ڕاگەهاند، نابیت پلانا نوو تەڤلی پلانێن بەرێ بکەن، ژبەر کو ئەڤا نها بتنێ دژی پەکەکێ نینە، بەلکو پلانا دروستکرنا دەڤەرا ئارامە.

دازانین ژی، تورکیا دخوازیت کوردستانێ ژ عەفرینێ هەیا خواکورکێ داگیربکەت، دخوازیت دەڤەرەکێ ب درێژاهیا هزار کیلۆمەتران و ب بەرفرەهیا ٥٠ بۆ ٦٠ کیلۆمەتران داگیربکەت و ژ کوردان ڤالا بکەن، هەروەسا ل جهێ کوردان دخوازن چەتەیێن خۆ ل قەفقاز، ئاسیایا ناڤین و باشور، ڕۆژهەلاتا ناڤین و بەلقانێ بنجەهـ بکەن، هێلەکا تیرۆرێ دروست بکەن، دخوازن کوردستانێ ژ ڕوویێ جوگرافیڤە جودا بکەن و پەیوەندیا د ناڤبەرا بەشان دا ڤەقەتینن.

بەحسا وێ یەکێ ژی کریە، هێرشێن ڤێجارێ بۆ نەهێلان و ڤالاکرنا دەڤەرێیە ژ کوردان، ب وێ هێلا تیرۆرێ ژی کو تورکیا دروست دکەت، دخوازیت ڕۆژهەلاتا ناڤین داگیر بکەت و تیرۆرێ بۆ جیهانێ بشینیت.

ب دیتنا کالکان، هندەک کەس ب تایبەتی کاربدەستێن باشورێ کوردستانێ و سازیێن کورد و ڕایا گشتی ژ دوورڤە، هەست ب وێ پلانا تورکیا نەکریە، دەمەکێ دا ب گوتنا وی ئەندامێ کۆمیتەیا ڕێڤەبەریا پەکەکێ، د کڤانا پلانا تورکیا دا دێ پێگەهێ هەرێما کوردستانێ ژی ژناڤ چیت.

س.م