سەرنووچە:

بەرپرسێ لقا پارتی ل ئامێدیێ: ئەم دێ وان دەستێن دەرەکیێن پشت خۆنیشاندانان بڕین

فۆتۆ: 
2020-07-15

1373 جار خوێندراوەتەوە

بەرپرسێ لقا ١٨ یا پارتی ل شێلادزێ ڕاگەهاند، وان داخوازکریە هێزەکا پێشمەرگەی ژ گەنجێن وێ دەڤەرێ بهێتە دروستکرن، دەرباری خۆنیشاندانێن شێلادزێ ژی گوت، ئەو دێ وان دەستێن دەرەکیێن پشت خۆنیشاندانان بڕن.

عومەر ئورەی بەرپرسێ لقا ١٨ یا پارتی ل ئامێدیێ ئەڤرۆ سەرەدانا ناحیەیا شێلادزێ کر و د سمینارەکێ دا ڕاگەهاند، "ئەم ب تەمامی دگەل داخوازکرنا مافان داینە و ئەگەر خەلکی بڤێت دێ دگەل وان خۆنیشاندانێ کەین ب مەرەما داخوازکرنا مافێن وان، لێ بێی دەستێن دەرەکی".

هەروەسا گوت، "ئەم دێ وان دەستێن دەرەکیێن پشت خۆنیشاندانان بڕین و ئەو دەست یێن خرابکرنێنە، هەر ژبەر هندێ ژی مە هێزێن سەربازی ئیناینە دەڤەرێ".

دیارکر ژی، کو وان داخوازکریە هێزەکا پێشمەرگەی ژ گەنجێن وێ دەڤەرێ بهێتە دروستکرن، هەم بۆ پاراستنا دەڤەرا خۆ، هەم ژی بۆ کێمبوونا بێکاریێ.

بەحسا وێ یەکێ ژی کر، کو دێ ڤان نێزیکان دەست ب کارێن نەخۆشخانەیا ١٠٠ تەختیا کۆمەلگەها هێتیتێ هێتەکرن، هند پرۆژەیێن خزمەتگوزاریێن وەک ڕێ و پر و ئاڤ و کارەبا دەڤەرێ دێ هێنە سەخبێرکرن.

ئەڤ ئاخافتنێن بەرپرسێ لقا پارتی دەمەکێ دایە کو ئەو کەسەکێ حزبیە و ئەو کارێن بەحس دکەت گریدایی ئالیێن پەیوەندیدارێن حکومەتێنە.

 د دەمێن دەربازبوویی دا چەندین خۆنیشاندان و نەڕازیبوون ل سنورێ ناحیەیا شێلادزێ بڕێڤەچوون، کو پڕانیا وان ل دژی هێرشێن ولاتێ تورکیا و شەهیدبوونا وەلاتیێن سڤیل بوون، وەلاتیان تێدا داخواز دکرن سنورەک بۆ وان هێرشان بهێتەدانان.

س.م