سەرنووچە:

وەزارەتا رۆشنبیری: داخستنا هەرتمیا ئێن ئاڕ تی د دەستهەلاتا مە دا نینە

د بەرسڤا دۆزگەرێ گشتی دا
فۆتۆ: 
2020-07-08

156 جار خوێندراوەتەوە

وەزارەتا رۆشنبیری د بەرسڤا دۆزگەرێ گشتی دا بۆ داخستنا کەنالێ ئێن ئاڕ تی دیارکر، داخستنا هەرتمیا کەنالی د دەستهەلاتا وان دا نینە.

وەزارەتا رۆشنبیری و لاوێن هەرێمێ دۆزگەرێ گشتی ئاگەهدارکریە، کو وان دەستهەلاتا داخستنا کەنالێ ئێن ئاڕ تی ب ئاوایەکێ هەرتمی نینە و تنێ دکارن ئاگەهدار بکەن و بۆ دەما حەفتیەکێ وەشانا وان ڕابگرن.

ل ناڤەڕاستا مەها دەربازبوویی، نڤیسارەکا دۆزگەرێ گشتی ب ئیمزایا ئازاد حەسەن سەرۆکێ دۆزگەریا گشتی هاتە بەلاڤکرن کو تێدا داخواز کربوو کەنالێن ئێن ئاڕ تی کوردی و عەرەبی ب یەکجاری بهێنە داخستن.

داخوازیا دۆزگەرێ گشتی دەمەکێ دایە، ژبەر هێرشکرنا سەر ئۆفیسا وان ل بەغدا، کەنالێ ئێن ئاڕ تی عەرەبی نێزیکی سالەکێیە هاتیە داخستن.

چەندینجاران سازیێن داکۆکیکار ژ ڕۆژنامەڤانان ئەڤ بزاڤێن دەستهەلاتێ بۆ بێدەنگکرنا ئێن ئاڕ تی ڕەتکریە، ڕۆژا ٩ێ نیسانێ ژی کۆمیتەیا پاراستنا ڕۆژنامەڤانان (سی پی جەی) داخواز ژ دەستهەلاتدارێن هەرێمێ کر ڕێ ب ئێن ئاڕ تی بدەن ب ئازادیی کارێن ڕۆژنامەڤانیێن خۆ بکەت.

ڕۆژا ١٣ێ مەها دەربازبووی ژی، سازیا نووچەگەهانێن بێسنور ب هەمان ئاوا داخواز ژ دەستهەلاتدارێن هەرێمێ کر دەستان ژ گەفکرنێ ل ئێن ئاڕ تی بەردەن و دەستهەلگرن ژ بێدەنگکرنا ئازادیا میدیایی.

گڤاشتن بۆ داخستنا ئێن ئاڕ تی دەمەکێ دایە، خۆنیشاندان و نەڕازیبوونێن بەشەک ژ وەلاتیان ل باژاڕێن جودایێن هەرێما کوردستانێ ل دژی خاربیا دەبارا ژیانێ د ڕۆژەڤێ دایە و ئێن ئاڕ تی ژی تاکە کەنالە ڕوومالا خۆنیشاندان و نەڕازیبوونان دکەت، ب تایبەت د نها دا ژی کو ژبلی گیرۆبوونا مووچەی بۆ ٦٠ ڕۆژان، حکومەتێ دەستکاریا مووچەی ژی کریە.

س.م