سەرنووچە:

ڕۆژنامەیەک هەڤکاریێن هەوالگیریێن چەند ئالیێن هەرێمێ بۆ تورکیا ئاشکرا دکەت

لسەر ئاشکراکرنا جهێن پەکەکێ بۆ تورکیا
فۆتۆ: 
2020-07-03

1914 جار خوێندراوەتەوە

ڕۆژنامەیا ئەلعەرەب ڕاگەهاند، تورکیا بابەتێ قەڕان دگەل حکومەتا هەرێمێ ڤەکریە، هەیا کو هەرێم ژ ڕوویێ هەوالگیریێ ڤە و دیارکرنا جهێ پارتیا کارکەرێن کوردستانێ هەڤکاریا وان بکەن.

ئەڤرۆ ئەینیێ ڕۆژنامەیا ئەلعەرەب ژ زارێ چەند ژێدەران بەلاڤکر، "بەریا کو تورکیا دەست ب ئۆپەراسیۆنا پەنجا پلنگی ل دژی پەکەکێ ل دەڤەرێن چیایێن هەرێما کوردستانێ بکەت، چەند ئالیێن سیاسیێن هەرێما کوردستانێ هەڤکاریا هەوالگیری پێشکەشی تورکیا کرینە".

دیارکریە ژی، ئەنقەرێ داخوازەک پێشکەشی حکومەتا هەرێما کوردستانێ کریە کو ژ ڕوویێ ئابوریڤە دێ هەڤکاریا وان کەن، د هەمبەر دا هەرێم زانیاریان لسەر جهێ پەکەکێ ب وان بدەن.

هەروەسا گوتیە، "ژێدەرێ مە لسەر بەرسڤا داویێ یا دەستهەلادارێن هەرێمێ بۆ تورکیا یێ پشتڕاست نینە، لێ ژێدەری زانیە، کو بەریا تورکیا دەست ب ئۆپەراسیۆنا پەنجێ پلنگی بکەت بابەتێ قەڕان دگەل هەرێما کوردستانێ ساخکریەڤە".

بەحسا وێ یەکێ ژی کریە، کو ئەردۆغان دخوازیت مفایی ژ ڤێ دەرفەتێ ببینیت کو عێراق و هەرێما کوردستانێ ژبەر کێمبوونا بهایێ نەفتێ تێکەفتینە.

ئەڤە ژی پشتی وێ یەکێ دهێت، ل ڕۆژا ١٧ێ مەها هەزیرانا دەربازبوویی تورکیا ئۆپەراسیۆنا پەنجا پلنگی بۆ سەر چەند دەڤەرێن هەرێمێ دەستپێکر و هەیا نها ژی ب ئەسمانی و پەژایی هێرشێ دکەتە سەر دەڤەر و هند گوندێن هەرێمێ.

س.م