سەرنووچە:

ل چەند دەڤەرێن سنوریێن قەزا زاخۆ ئالایێ عێراقێ هاتە هەلدان

ژبۆ ڕێگریکرن ژ پێشڕەویێن سەربازیێن توركیا
فۆتۆ: 
2020-07-01

2194 جار خوێندراوەتەوە

نووچەگەهانێ ئێن ئاڕ تی ڕاگەهاند، ژبۆ ڕێگریکرن ژ زێدەتربوونا هێرش و پێشڕەویێن سەربازیێن توركیا، هێزێن زێرەڤانێن سنوری ئالایێ‌ عێراقێ‌ ل چەند دەڤەرێن سنوریێن قەزا زاخۆ هەلدان و هێز تێدا بنەجهکرن.

ئەحمەد زاخۆیی نووچەگەهانێ ئێن ئاڕ تی ل زاخۆ ڕاگەهاند، ئەڤرۆ چارشەمبیێ ئەو هێزە ل هەریەک ژ چیایێن دێرێ و شەهبانیێ ل سنورێ ناحیەیا باتیفان هاتینە بنەجهکرن و ئالایێ عێراقێ هەلدانە، گوت ژی، ئەڤ جهێن کو زێرەڤانێن سنوری تێدا هاتینە بنەجهکرن، ڤالانە ژ هێزێن پەکەکێ و ئارتێشا تورکیا.

دیارکر ژی، مەرەما هاتنا ڤێ هێزێن ب ئارمانجا وێ یەکێ یە کو شەڕێ نها یێ تورکیا و پەکەکێ بۆ وان دەڤەران ژی نەهێتە ڤەگوهاستن و ڕووبەرێ وان جهێن شەڕ هەی زێدەتر نەبیت و گەف و زەرەر و زیانێن زێدەتر بۆ سەر دەڤەرێ و خەلکی پەیدا نەبن.

بەحسا وێ یەکێ ژی کر، هاتنا ڤان هێزان پشتی وێ یەکێ دهێت کو بەریا چەند ڕۆژان شاندەکا سەربازیا عێراقێ ب سەرۆکاتیا حامد عەبدولا فەرماندارێ گشتیێ هێزێن زێرەڤانێن سنوریێن عێراقێ سەرەدانا چەند دەڤەران ل سنورێ قەزا زاخۆ کرن و هەژمارەک جڤین ژی دگەل ئالیێن ئەولەهیێ یێن دەڤەرێ ئەنجام دان و تێدا بەردەوامیا هێرشێن تورکیا و پەیداکرنا مەترسیێ لسەر ژیانا خەلکی و ڕەوشا دەڤەرێ بگشتی گۆتۆبێژکرن.

هەڤدەم، دلشێر عەبدولستار ڕێڤەبەرێ ناحیەیا باتیفا بۆ ئێن ئاڕ تی هاتنا وێ هێزێن پشتڕاستکر و گوت، "ئەڤ هێزە نە هێزەکا تایبەتە ژ بەغدا هاتبیت، بەلکو گرێدایی وێ لیوایێ یە کو سەر ب هێزێن زێرەڤانێن سنوریێن عێراقێیە و پێشتر و نها ژی هەر سنورێ قەزا زاخۆ دپارێزن".

دازانین ژی، "بەلاڤکرنا وێ هێزێ ل وان دەڤەران بۆ پاراستنا خەلکی و ڕێگریکرنێیە ژ زێدەتر تێکچوونا ڕەوشا دەڤەرێ بسەدەما شەڕێ تورکیا و پەکەکێ".

نووچەگەهانێ ئێن ئاڕ تی گوت ژی، هەر دگەل زێدەبوونا شەڕ و ئالۆزیان د ناڤبەرا ئارتێشا تورکیا و هێزێن پەکەکێ دا، هێزەکا فەرماندا دهۆک بۆ سنورێ ناحیەیا دەرکارێ هاتیە ڤەگوهاستن و ل دەردورێن گوندێ شەرانشێ و چەند دەڤەرێن دی هاتینە بنەجهکرن، کو پێشتر هێزێن پەکەکێ ڤەلڤین د ڤان جهان دا هەبوون، لێ نها ژبەر دژواربوونا شەڕێ وان دگەل ولاتێ تورکیا لێ ناهێنە دیتن، هەروەسا هەلویستێ وان لسەر هاتنا هێزا فەرماندا دهۆک نەدیارە.

س.م