سەرنووچە:

وەزارەتا داراییا هەرێمێ: ئەم ب مەرجێن شاندنا ٤٠٠ ملیار دیناران ڕازینە

فۆتۆ: 
2020-05-23

582 جار خوێندراوەتەوە

د نڤیسارەکا وەزارەتا داراییا هەرێمێ دا کو ئیمزایا ئاوات جەناب وەزیر دارایێ لسەرە هاتیە، "بۆ بەرێز عەلی عەلاوی وەزیرێ دارایێ حکومەتا فیدرال، حکومەتا هەرێمێ ب بڕگەیێن د ناڤ نڤیسارا هەوە دا یا ڕازییە".

ڕۆژا ١٩ێ ڤێ مەهێ، وەزیرێ داراییا عێراقێ نڤیسارەک ئاراستەی سەرۆکێ حکومەتا هەرێما کوردستانێ کر کو چەند خالەک تێدابوون بۆ چارەسەرکرنا ئاریشەیا داراییا د ناڤبەرا هەردوو ئالیان دا.

د نڤیسارا وەزارەتا داراییا عێراقێ دا بەحسا وێ یەکێ هاتبوو کرن، کو حکومەتا فیدرالی دێ کۆژمێ ٤٠٠ ملیار دینارێن مەها نیسانێ بۆ هەرێما کوردستانێ خەرجکەت، لێ پێدڤیە شاندا هەرێمێ و بەغدا گۆتۆبێژێن زێدەتر بکەن، ب مەرەما گەهشتن ب چارەسەرەکا تەمامی د ناڤبەرا هەردوو ئالیان دا کو دەمێ وێ ژ ٣٠ ڕۆژان زێدەتر نەبیت.

هەر د نڤیسارا وەزارەتا داراییا عێراقێ دا هاتبوو، دیوانا چاڤدێریا دارایا فیدرالێ ب هەڤبەشی دگەل وەزارەتا داراییا فیدرال و دیوانا چاڤدێریا هەرێما کوردستانێ داهاتێ (گومرک و داهاتێ خالێن سنوری) هەژمار دکەن.

هەر دوهی، ژێدەرەکێ هایدار ژ دانوستانێن هەرێم و بەغدا بۆ ئێن ئاڕ تی ڕاگەهاند، مستەفا کازمی سەرۆک وەزیرێ عێراقێ ئیمزا لسەر خەرجکرنا کۆژمێ ٤٠٠ ملیار دیناران کریە، لێ شاندنا وی کۆژمێ پارەی دێ کەڤیتە پشتی پارڤەکرنا مووچەیێ تەڤاهیا وەزارەتێن عێراقێ.

س.م