سەرنووچە:

سالەک بسەر بوویەرا شێلادزێ دا دەربازبوو

٢٦/١/٢٠١٩ێ
فۆتۆ: 
2020-01-26

937 جار خوێندراوەتەوە

د ڕۆژەکا وەک ئەڤرۆ دا و ل ٢٦ێ چلەیا ٢٠١٩ێ وەلاتیێن هەریەک ژ ناحیەیێن شێلادزێ و دێرەلۆک و کۆمەلگەها هێتیتێ ل سنورێ قەزا ئامێدیێ وەک بەرسڤدانەک بۆ هێرش و سنور بەزاندننێن بەردەوامێن ئارتێشا تورکیا بۆ سەر دەڤەر و وەلاتیێن سڤیل، ب تایبەت ژی بۆمبەباران ڕۆژا ٢٣ێ هەمان مەهـ کو تێدا چوار وەلاتیێن سڤیل شەهیدبوون و دوویێن دی ژی بێسەرۆشینبوون کو هەیا نها ژی چارەنڤیسێ وان نەدیارە، خۆنیشاندان ل دژی هەبوونا بارەگەهێن لەشکەریێن تورکیا ئەنجام دان.

بەریا بداویهاتنا بەهیا وان چوار وەلاتیان، کەسوکارێن وان و وەلاتیێن هەریەک ژ ناحیەیێن شێلادزێ و دێرەلۆک و کۆمەلگەها هێتیتێ ل ناڤەندا شێلادزێ ب تەڤلیبوونا سەدان کەسان ژ ژن و گەنج، ڕۆژنامەڤان و چالاکڤانان، بەیانامەیەکا نەڕازیبوونی هات خواندن، داخوازا دەرچوونا هێزێن وان کرن و بەر ب بارەگەهێ میت و ئارتێشا تورکیا ل کۆمەلگەها سیریێ بڕێکەفتن.

پشتی نێزیکبوون ژ بارەگەهی، ئالۆزی د ناڤبەرا خۆنیشاندەران و لەشکەرێن ئارتێشا تورکیا دا دروستبوو، ژبەر کو لەشکەرێن تورکیا هەموو بزاڤ دکرن خۆنیشاندەران ڕاگرن و نەگەهن جهێن وان، زێدەباری بزاڤێن زێدەیێن هێزێن ئەولەهیێ کو ل پڕانیا دەڤەرێن سنورێ پارێزگەها دهۆکێ بۆ جهێ بوویەرێ هاتبوون ڤەگوهاستن، لێ کۆنترۆلا تۆڕەیا خۆنیشاندەران پێنەهاتەکرن و خۆنیشاندەر گەهشتنە ناڤا بارەگەهێ میتێ ل سیریێ و دەست ب شەوتاندنا خیڤەت، چەپەر، چەک، تانک و تڕۆمبێلێن لەشکەریێن ئارتێشا تورکیا کرن.

تەقەکرنا ڕاستەڕاست ل خۆنیشاندەران و بەلاڤەکرنا وان ژ ئالیێ لەشکەرێن تورکیا ڤە

ب دەربازبوونا وەلاتیان بۆ ناڤ بارەگەهی، لەشکەرێن تورکیا ژبۆ دورخستنا وان کەفتنە تەقەکرنا ڕاستەڕاست، بڤێ یەکێ ژی سنێلەکێ تەمەن ١٢ سال بناڤێ حسێن ڕێکان حسێن هاتە شەهیدکرن و زێدەتری ١٠ کەسێن دی ژی برینداربوون، کو د ناڤا وان دا کارمەندێن هێزێن ئەولەهیێ یێن دەڤەرێ ژی هەبوون.

هەرچەند چ لەشکەرەک و ئەندامەکێ میتا تورکیا د ناڤ دا بارەگەهی دا نەمان و ڕەڤیان، لێ ئارتێشا تورکیا بڤێ چەندێ ژی نەڕاوەستیا و ژبۆ بەلاڤەکرن و دەرخستنا وەلاتیان د بارەگەهێ خۆ دا، ب بالەفرێن ئێف-١٦ کەفتنە تەڤگەڕا نزم بسەر ئاسمانێ دەڤەرا شێلادزێ و بۆمبەیێن دەنگی تەقاندن ژبۆ تڕساندنا وەلاتیان و بەلاڤەپێکرن و پاشداڤەکشینانا وان، هند دەڤەرێن چیایی ژی ب گرانی بۆمبەباران کرن.

کارڤەدانێن بوویەرێ د ناڤخۆیا هەرێما کوردستانێ دا

بوویەرا شێلادزێ کارڤەدانێن ناڤخۆی و جیهانی لپەی خۆ ئینان و هەر زوو بەرپرس و ئالیێن پەیوەندیدار ل دهۆکێ و سەر ئاستێ هەرێمێ ژی هاتنە دەنگ و ڕاگەهاندن، دەستێ چەند کەسان د گۆهەڕتنا ئاراستەیا خۆنیشاندانێن خەلکێ شێلادزێ دا هەبوویە و ئاراستەیا خۆنیشاندەران بۆ بارەگەها تورکیایێ گۆهەڕتنە، هەروەسا دیارکرن کو ڕوولا کادر و ئەندامێن تەڤگەرا ئازادی کو بەشەکن ژ پارتا کارکەرێن کوردستان-پەکەکێ، د خۆنیشاندانێ دا هەبوویە.

د ناڤا بەرپرسێ هەرێمێ دا ژی نێچیرڤان بارزانی سەرۆکێ وی دەمی یێ حکومەتێ د کۆنفرانسکەکا ڕۆژنامەڤانی دا گوت، شەهیدبوونا وەلاتیێن هەرێمێ ژبەر بۆمبەبارانا تورکیایە، کو سەدەما ڤێ یەکێ ژی هەبوونا پەکەکێ یە ل دەڤەرێن سنوری. دیارکر ژی، وان وەلاتیێن دەڤەرێن سنوری ئاگەهدارکرینە ژ بۆمبەبارانا دەڤەرێ، کو قەستا وان جهان نەکەن.

کارڤەدانا بوویەرا شێلادزێ ل تورکیایێ

بوویەرا شێلادزێ ل سەر ئاستێ ناڤخۆیا تورکیا ژی بۆ پرس و بابەتێ ڕۆژەڤا حکومەت و میدیایێن وی ولاتی، هەر ئێڤاریا هەمان ڕۆژ ڕەجەب تەیب ئەردۆغان سەرۆک کۆمارێ تورکیا ڕاگەهاند، ل باکورێ عێراقێ خواستن شاشیەکا مەزن بکەن، لێ بالەفرێن مە ڕابوون و بەلاڤە پێکرن.

ژ ئالیەکێ دی ڤە وەزارەتا بەڕەڤانیا تورکیا ڕاگەهاند، ژبەر هاندان و هەبوونا دەستێ پەکەکێ د بوویەرێ دا هێرشی سەر بارەگەهەکێ ئارتێشامە هاتیەکرن و دازانین ژی، تورکیا پێشوازیێ ل وان بزاڤان دکەت یێن حکومەتا هەرێمێ ل هەمبەر بوویەرێن شێلادزێ و شەتاندنا بارەگەهێ وان گرتینە بەر.

هەر د ناڤخۆیا تورکیایێ دا میدیایێن وی ولاتی ژی د نووچەیێن خۆ دا کەنالێ ئێن ئاڕ تی و شاسوار عەبدولواحید سەرۆکێ ڤەلڤینا نەوەی نوێ وەکی بەرپرسیارێن خۆنیشاندانێن شێلادزێ ب ناڤ کرن، ژبەر کو د دەما بوویەران دا لسەر ئاستێ ناڤخۆ و دەرڤە ئێن ئاڕ تی تاکە کەنال بوو ڕوومالا بوویەرێ دکر.

ڕێکارێن ئەولەهیێ و دەستەسەرکرنا پشکدارێن خۆنیشاندانێ

دگەل ڤەگوهاستنا بریندارێن بوویەرێ بۆ نەخۆشخانەیێن دهۆکێ، ڕێکارێن ئەولەهیێ یێن توند ژ ئالیێ هێزێن ئەولەهیێ ڤە هاتنە دانان و د سەرێ ڕێزێ دا دەست بسەر ئۆفیسا سەرەکیا ئێن ئاڕ تی ل دهۆکێ دا هاتە گرتن و کارێ تۆڕا نووچەگەهانێن وێ ل سنورێ پارێزگەها دهۆکێ هاتە ئاستەنگکرن و ڕاگرتن، چار ژ نووچەگەهانێن وێ دەستەسەرکرن و ڕێ نەدان چ دی ڕوومال و بوویەران بکەن و ئۆفیس ژی بۆ دەما زێدەتری دوو مەهان داخست.

هەر د هەمان شەڤا بوویەرێ و ڕۆژێن دیڤدا ئاسایشا دهۆکێ هەژمارەکا زێدە یا پشکدارێن خۆنیشاندانێ دەستەسەرکرن و هند ژ گرتیان بۆ دەما زێدەتری مەهەکێ ب دەستەسەرکری هێلان، تەڤاهیا چالاکیێن پشتەڤانی ژ خۆنیشاندانا شێلادزێ ل سەر ئاستێ هەرێمێ هاتن ڕاگرتن، ل سەنتەرێ دهۆکێ هەژمارەکا چالاکڤان و ڕۆژنامەڤانان دەستەسەرکرن کو پشتی بوویەرێ د خرڤەبوونەکێ دا پشتەڤانیا خۆ بۆ خۆنیشاندانان نیشاندابوو، هەروەسا ل باژاڕێ سلێمانیێ ژی ئاسایشێ ڕێ ژ خرڤەبوونەکا پشتەڤانی ژ خۆنیشاندانا شێلادزێ گرت.

د نها دا و پشتی دەربازبوونا سالەکێ بسەر بوویەرێ، لێ هەیا نها ژی دەڤەرێن شێلادزێ و دێرەلۆک و هێتیت و سیریێ، ژ ڕێکارێن لەشکەری و ئەولەهیێ یێن توند ڤالانینە و هەژمارەکا زێدە یا هێزێن پێشمەرگە ل سنورێ وان دەڤەران هاتینە بەلاڤکر، ڕێ دان ب خرڤەبوون و نەڕازیبوونان ژی ب تەمامی ل سنورێ وێ دەڤەرێ هاتینە ئاستەنگکرن.

چەند وێنەیێن خۆنیشاندانان؛

Image result for هێزێن ئەولەهیێ ل شێلادزێ"Image result for هێزێن ئەولەهیێ ل شێلادزێ"Image result for هێزێن ئەولەهیێ ل شێلادزێ"Image result for هێزێن ئەولەهیێ ل شێلادزێ"
س.م