سەرنووچە:

وەزارەتا ساخلەمیێ زەلالکرنەک دەربارەی ڤایرۆسا کۆرۆنا بەلاڤکر

فۆتۆ: 
2020-01-24

318 جار خوێندراوەتەوە

وەزارەتا ساخلەمیێ ڕاگەهاند، ل هەرێما کوردستانێ وەک تەڤاهیا ولاتێن دی یێن جیهانێ ژ نێزیکڤە و ب هەڤبەندی دگەل سازیا ساخلەمیا جیهانی WHO چاڤدێریا ڤایرۆسێ دکەن و ڕێکارێن پێدڤی دگرنەبەر.

وەزارەتا ساخلەمیا حکومەتا هەرێما کوردستانێ د ڕاگەهاندنەکێ دا ئەڤرۆ ئەینیێ ٢٤ێ چلەیا ٢٠٢٠ێ بەلاڤکر، پشتی بەلاڤبوونا نووچەیا سەرهەلدانا جۆرەکێ نوو یێ ڤایرۆسا کۆرۆنا ل باژاڕێ وهان یێ چینێ، کو لگۆری داوی ڕاپۆرتا سازیا ساخلەمیا جیهانی WHO هەیا نها ٥٥٧ کەس تووشبوونە و ١٧ کەس مرینە و ڕێژەیا کوژەکیێ هەیا نها ٤%یە، ژبلی چینێ ژی، ل هەریەک ژ ولاتێن ژاپۆن، کۆریا، تایلەند و سەنگاپورە هاتنە تۆمارکرن.

بەحسا وێ یەکێ ژی کریە، "هەیا نها ئەو زانیاری و ڕاسپاردەیێن بۆ ڕووبڕووبوونا ڤایرۆسێ هەین، پێدڤی ناکەت پشکنین و چاڤدێریێ ل خالێن سنوری و جهێن گشتی دا بگرینەبەر، بەلکو هەمان ڕێکارێن کۆنترۆل و خۆپارێزیێ یێن پەتایا ڤایرۆسا ئەنفلونزایێ نە".

بەحسا وێ یەکێ ژی کریە، "بلەز ڤەدیتن و جوداکرن و چارەسەرکرن و هۆشداریا ساخلەمیێ ل خۆپاراستنا کەسی وەک، زوو زوو دەست شووشتن، خۆ دوورکرن ژ جهێن قەرەبالغ و گرتی و پێگیربوون ب ئەتەکێتا کۆخین و بێنشین وەک داپۆشینا دەڤ و دفنێ".

ئەڤە ژی پشتی وێ یەکێ هات، جۆرەکێ نوو یێ ڤایرۆسا کۆرۆنا ب ئاوایەکێ لەز و زوور ل چین و بەشەک ژ ولاتێن ئاسیایێ بەلاڤبوویە، ئەو ڤایرۆسە دهێتە ڤەگوهاستن و ب توندی تووشێ مرۆڤان دبیت و ئەگەر هەیە ببیتە سەدەما تووشبوون ب نەخۆشیێن کۆئەنداما هەناسەدانێ، ئیلتیهابا سیهان و بەریکێن هەوایی.

س.م