سەرنووچە:

نەوەی نوێ سێ پەرلەمانتارێن فراکسیۆنا خۆ دەرکرن

لهەمبەر ڕەتنەکرنا خانەنشینیێ دا
فۆتۆ: 
2020-01-22

327 جار خوێندراوەتەوە

جڤاتا سیاسیا نەوەی نوێ ڕاگەهاند، سێ پەرلەمانتارێن فراکسیۆنا وان د ناڤبەرا خانەنشینیێ و دەرئێخستنێ دا بژاردەیا دوویێ هەلبژارتن و دبێژیت، "ژ ئالیێ مەڤە ئەو سێ پەرلەمانتارە هاتنە دەرخستن".

جڤاتا سیاسیا نەوەی نوێ د ڕاگەهاندنەکێ دا دیارکر، "جهێ داخێیە سێ پەرلەمانتارێن فراکسیۆنا مە زێدەباری چەندین جاران هاتنە هایدارکرن کو دەستان ژ خانەنشینیێ بەردەن و مە داخواز لێکرن نڤیسارا فەرمیا تایبەت ب وی بابەتی بۆ پەرلەمانی بکەن، لێ بەرهەڤنەبوون وی کاری بکەن".

زەلالکر ژی، "ل جهێ کو ئەو سێ پەرلەمانتارە خالا یەکێ یا داخوازا ڤەلڤینێ جیبجیبکەن و دەستان ژ خانەنشینیێ بەردەن، پێش خالا دوویێ کەفتن و ل جهێ کو ڕابگەهینن ب نڤیسارا فەرمی دێ دەستان ژ خانەنشینیێ بەردەن، ڕاگەهاندن کو د ڤەلڤینێ دا نەمانە، دەمەکێ دا ئەڤ سێ کەسە هەیا بەریا کۆنفرانسا ڕۆژنامەڤانیا سەرۆکێ ڤەلڤینێ ب چ ئاوایان و د چ دەمەکێ دا نە ل میدیایێ و نە ل فەیسبووک و سۆشیال میدیایێن خۆ نە ب نڤیسارا فەرمی ڕانەگەهاندینە د ڤەلڤینا نەوەی نوێ دا نەمانە، بەلکو تنێ بۆ جیبجینەکرنا داخوازا ڤەلڤینێ دەما کو ل پێشیا ڕایا گشتی داخواز لێکرن دەستان ژ خانەنشینیێ بەردەن، وێ یاریا نەشرین دکەن و خۆ ژ ناڤەڕۆکا داخوازێ ڤەدزن کو دەستبەرداریە ژ مووچەیێ خانەنشینیێ، ژبەر ڤێ یەکێ ژ ئالیێ مەڤە ئەو سێ پەرلەمانتارە هاتنە دەرخستن".

د پشکەکا دی یا ڕاگەهاندنێ دا هاتیە، "مە دکاری وەک گەلەک ژ حزب و هێزێن دی لهەمبەر پەرلەمانتارێن خۆ بێدەنگ بین و چ ڕێکارەکێ نەگرینە بەر، بێگومان پەرلەمانتار ژی دا بێدەنگ بن و چ ڕوونەدا و هەژمارا پەرلەمانتارێن مەژی کێم نەدبوون، لێ مە ئەو ڕێ هەلنەبژارت، بەلکو مە ڕێیا ڕاست هەلبژارت کو چ کەسەکێ پارێزبەندی نییە و یێ پاراستی نییە، ئەگەر کارێ نەیاسایی بکەت و بەرژەوەندیا خۆ ل پێش بەرژەوەندیا گشتی بدانیت".

بەحسا وێ یەکێ ژی کر، "ئیجرائات و پرەنسیپێن ڤەلڤینێ گرێدایی پاراستنا مافێن گشتی و هەر بڕیارەکا دهێتە دان پێدڤیە بەرژەوەندیا بلندا خەلکی بەرچاڤ بگریت نەک ژ پێخەمەت پاراستنا حزب و هەژمارا پەرلەمانتاران و کادرێن خۆ چاڤپۆشیێ ل ئیجرائاتان بکەت".

جڤاتا سیاسیا نەوەی نوێ بەحسا وێ یەکێ ژی کریە، "لهەمبەر ڕاوەستیان ل دژی بەرژەوەندیێن خەلکی و مافێ گشتی چ کەسەکێ پارێزبەندی و بێهنڤەدان نابیت، ب وێ هەلکەفتێ ژی ڕادگەهینین ئەو سێ پەرلەمانتارە د ناڤبەرا وان دوو بژارەدیێن مە پێدابوون، دەرئێخستن هەلبژارت، ژبەر وێ یەکێ تەکەز دکەین کەس ژ وان سێ کەسان نوینەراتیا ڤێ ڤەلڤینێ و ئارمانجا جوان و ئەخلاقیا ڤەلڤینێ ناکەن".

د داویا ڕاگەهاندنا نەوەی نوێ دا ئەو یەک ژی هاتیە، "ئەم خۆ خۆشحال دبینین کو ژ پێخەمەت بەرژەوەندیا گشتی و وەرنەگرتنا مووچەیەکێ خەیالی یێ خانەنشینیێ، مە سێ پەرلەمانتارێن خۆ دەرئێخستن و پشتڕاستین پشکەکا زێدەیا وەلاتیان ب ڤێ پێنگاڤێ دێ دلخۆش بن، ژبەر کو چ دی خەلکێ ئینتیهازیی و هەلپەرست نکارن دبن بێدەنگیا حزبا خۆ دا خۆ ڤەشێرن و ب سەرڤە ئاخافتنێن بریقەدار بکەن و بنڤە ژی بزاڤا خۆ دەولەمەندکرنێ بدەن".

ئەڤە ژی دەمەکێ دایە، ڕۆژا دووشەمبیا دەربازبوویی سەرۆکێ ڤەلڤینێ و فراکسیۆنا نەوەی نوێ د کۆنفرانسەکا ڕۆژنامەڤانی دا داخوازا ژ وان سێ پەرلەمانتاران کر د دەما ٤٨ دەمژمێران دا یان دەستان ژ مووچەیێ خانەنشینیێ بەردەن، یان ژی دێ د ڤەلڤین و فراکسیۆنێ دا هێنە دەرخستن.

س.م