سەرنووچە:

هەسەدە و هەڤپەیمان دخوازن ئۆپەراسیۆنەکێ ل دژی گروپێن چەکدار یێن نێزیک ژ ئیرانێ پێکبینن

ل ڕۆژهەلاتا سوریایێ
فۆتۆ: ئەرشیڤ
2019-05-18

380 جار خوێندراوەتەوە

چەند چاڤکانیان د ناڤخۆیا سوریایێ دا ڕاگەهاندن، هێزێن سوریایا دیموکرات "هەسەدە" و هەڤپەیمانا ناڤدەولەتی، خۆ بەرهەڤ دکەن ژبۆ کو هێرشی سەر گروپێن چەکدارێن نێزیک ژ ئیرانێ د ڕۆژهەلاتا وی ولاتی دا بکەن.

ئاژانسا نووچەیی یا ئەنادۆلو ژ زارێ وان چاڤکانیێن ناڤخۆیا سوریایێ زەلالکریە، یەکینەیێن پاراستنا گەل "یەپەگە" کو ب پەیکەرێ سەربازیێ هێزێن سوریایا دیموکرات دهێتە دانان، ب پشتەڤانیا هێزێن هەڤپەیمانیا ناڤدەولەتی کو ئەمریکا سەرۆکاتیێ لێ دکەت، د خۆ بەرهەڤکرنێ دانە بۆ پێکئینانا ئۆپەراسیۆنەکا سەربازی ل دژی گروپێن چەکدارێن نێزیک ژ ئیرانێ، کو دەڤەرێن ڕۆژئاڤایێ پارێزگەها دێرەزورێ د دەستدانە.

د نها دا کۆنترۆلا تەڤاهیا دەڤەرێن ڕۆژهەلاتا وێ پارێزگەهێ د دەست هێزێن سوریایا دیموکرات دایە.

لگۆڕی ئاژانسێ ئەو هێزێن کو هاتنە بەرهەڤکرن بۆ ئۆپەراسیۆنێ د سەربازگەهێن نێزیک باژارۆکێ عەین عیسا یا سەر ب پارێزگەها ڕەقایێ ل باکورێ سوریایێ و نێزیک زەڤیێن نەفتا "عومەر" ل پارێزگەها دێرەزورا ڕۆژهەلات دا هاتنە پەروەردەکرن.

ب گوتنا چاڤکانیێن سوری هێزێن هەسەدێ و هەڤپەیمان د بزاڤا بدەستخستنا پشتەڤانیا عەشیرێن دەڤەرێ دانە، ژبۆ کو د دەما ئۆپەراسیۆنێ دا پشتەڤانیێ و هەڤکاریا وان بکەن.

پشتی سالا ٢٠١٨ێ و دەرخستنا بەشەکا زێدە یا ئاخا سوریایێ ژ دەستێن داعشێ، ئاخا وی ولاتی بسەر دوو دەڤەران دا پارڤەبوویە، پڕانیا دەڤەرێن ڕۆژئاڤایێ ڕووبارێ فوراتێ دبن کۆنترۆلا هێزێن سوریا دایە و ڕۆژهەلاتا ڕووباری ژی دبن دەستێ هەسەدێ دایە.

ئیران ب ولاتێ دوویێ دهێتە دانان پشتی ڕووسیایێ کو پشتەڤانیێ ژ حکومەتا سوریایێ دکەت، د نها دا ژی چەند دەولەتەک د سەری دا ژی ئەمریکا و ئیسرائیل داخوازێ ژ ئیرانێ دکەن دگەل هەڤپەیمانێن خۆ ژ ئاخا سوریایێ دربکەڤن.

س.م