سەرنووچە:

خەباتێن پارتیێن تورکیا بۆ هەلبژارتنێن شارەداریان بەردەوامن

فۆتۆ: 
2019-03-17

387 جار خوێندراوەتەوە

نێزیکی دوو حەفتیان بۆ هەلبژارتنێن شارەداری و موختاران ل تورکیا و باکورێ کوردستانێ مانە، لێ د نها دە خەباتێن پارتیێن سیاسیێن تورکیا، ب تایبەتی پارتیا دەمۆکراتیک یا گەلان "هەدەپێ" و پارتیا داد و گەشەپێدان "ئاکەپێ"، زێدە بوونە.

هەلبژارتنێن شارەداری و موختاران، کو وەکی هەلبژارتنێن هەرێمێ ژی تێن بناڤکرن، بریارە د ٣١ێ ئادارا ٢٠١٩ان دە بێنە کرن.

هەلبژارتنێن شارەداری و موختاران، دێ جارەکی دن هەڤکێشەێن ناڤخوەیی یێن تورکیا و باکورێ کوردستانێ بگۆهەرینە و ب تایبەتی ڤێ جارێ هەڤرکیەکا گەلەک مەزن د ناڤبەرا هەدەپێ و ئاکەپێ دا تێ دیتن.

چ قاس ژی زەخت و فشارێن حکومەتێ لهەمبەر شارەداری و سازیێن کوردان ل باکورێ کوردستانێ، بەردەوام بوون، لێ پشتی هێرشا داعشێ، بۆ سەر کۆبانێ د مەها یەک " چلەیا" سالا ٢٠١٤ێ دە و شەرێ ناڤ باژارێن باکورێ کوردستانێ د سالێن ٢٠١٥ و ٢٠١٦ان دە، ب بڕیارەکا تایبەت، دەست ب گرتنا شارەدارێن کورد و دانانا کارمەندێن حکومی " قەیومان" لشوونا شارەدارێن کورد هاتە کرن.

کورد د سالا ٢٠١٤ان دە ب رێیا پارتیا هەرێمان یا دەمۆکراتیک "دەبەپێ" تەڤلی هەلبژارتنێن هەرێمی بوون.

دەبەپێ کاری د هەلبژارتنان دە ١٠٢ شارەداریان بدەست بخە کو د ناڤا وان دە ١١ شارەداریێن ناڤەندا باژاران هەبوون.

پارتیا هەرێمان یا دەمۆکراتیک "دەبەپێ"، شارەداریێن "دێرسم، ئامەد، مێردین، باتمان، جۆلەمێرگ، ئاگری، ئیدر، وان، شرنەخ و سێرتێ" و ٩١ ناڤچەیێن دن یێن باکورێ کوردستانێ بدەست خست و سیستەما هەڤسەرۆکیێ کو ژ وان رە "هەڤشارەدار" دهات گۆتن، د شارەداریان دا هاتە بجهکرن.

چ قاس زەخت و فشار ل سەر شارەداریان بەردەوام بوون، لێ پشتی داربەیا ١٥ێ تیرمەها ٢٠١٦ان دە، فشارێن حکومەتێ ئاستەکا پیڤانەیی تۆمار کر. د دەمەکێ کێم دا قەیوم هاتن ئامادەکرن و شارەدارێن کورد ژی هاتن گرتن.

وێ دەمێ د کۆنفرانسەکا چاپەمەنیێ دە، بەرپرسێن پارتیا هەرێمان یا دەمۆکراتیک، دانزانین، لشوونا ٩٤ شارەدارێن وان، قەیوم "کارمەندێن حکومی" هاتنە دانین و ٦٨ شارەدار ژی هەیا نها د گرتیگەهان دانە.

لگۆری ئامارێن دەبەپێ، زێدەتر ژ دوو هەزار کارمەند و خەباتکارێن ئالیگرێن دەبەپێ، بێکار مان و بوو سەدەما بێکاریەکا زێدە د ناڤا باژارێن باکورێ کوردستانێ دە.

پارتیا داد و گەشەپێدان و پارتیا نەتەوەپەرست یا گەل دبن ناڤێ "هەڤپەیمانیا کۆماری" و پارتیا گەل یا کۆماری و ئییی پارتی ژی دبن بانێ "هەڤپەیمانیا گەل" و هەدەپە و هەشت پارتیێن کوردی ژی ب هەڤرە تەڤلی هەلبژارتنێن شارەداریان دبن.

هـ.ج