سەرنووچە:

وەزیرێ دەرڤەیێ ئیرانێ سەدەما دەست ژ کارکێشانا خۆ ئاشکراکر

محەمەد جەواد زەریف وەزیرێ دەست ژ کارکێشایێ ئیرانێ
فۆتۆ: ئەرشیف
2019-02-26

1011 جار خوێندراوەتەوە

محەمەد جەواد زەریف وەزیرێ دەست ژ کارکێشایێ ئیرانێ سەدەما دەست ژ کارکێشانا خۆ ژ پۆستێ خۆ ئاشکراکر و ڕاگەھاند، ئەو بڕیارا وی بۆ بەرەڤانیکرنا پێگەھـ و جھێ وەزارەتێ بوویە، د پەیوەندیێن دەرڤە دا. 

 مالپەرێ ڕوسیا تودەی ژ زارێ زەریفی بەلاڤکر، " دەست ژ کارکێشانا من تنێ بۆ بەرەڤانیکرن ژ پێگەھـ و جھێ وەزارەتا دەرڤە بوویە، د پەیوەندیێن دەرڤە دا، ب دیتنا من پێدڤیە جھـ و پێگەھێ وەزارەتا دەرڤە وەک بابەتەکێ چارەنڤیسساز بھێتە پاراستن، ژ پێخەمەت پاراستنا ئاسایشا نەتەوەیی یا ئیرانێ".

وەزیرێ دەرڤەیێ ئیرانێ دیارکر ژی، "من وەھا دیت و ب ئەرکێ خۆ دزانی پارێزگاریێ ژ بەرژەوەندیێن نەتەوەیێن ئیران و ھێزا ئیرانێ بکەم، د ھەمبەر دا ژی نابیت پێگەھـ و جھێ وەزارەتا دەرڤە بەرچاڤ نەھێتە گرتن".

د پشکەکا دی یا گوتنێن خۆدا وەزیرێ دەرڤەیێ ئیرانێ دازانین، ژ چ کەسان یێ دلگران نینە و پێدڤی ب ڕازیبوونا چ کەسەکێ ژی نینە.

چەند مالپەر و تورێن جڤاکی بەلاڤکرنە، دەست ژ کارکێشانا زەریفی ھەڤدەم بوویە دگەل سەرەدانا بەشار ئەسەد سەرۆکێ سوریایێ بۆ ئیرانێ، کو د ھەڤدیتنێن دگەل بەرپرسێن ئیرانێ دا محەمەد جەواد زەریفی نەھاتیە دیتن، ئەڤە ژی وەھا دھێتە تەخمینکرن کو کەسێ یەکێ یێ دیپلۆماتێن ئیرانێ د وان ھەڤدیتنا دا پشتگوھـ خستنە، کو یا پێدڤیبوو بەرھەڤ ببیت.

شەڤا بووری جەواد زەریف لسەر ھەژمارا خۆ یا ئینستاگرامێ دەست ژ کارکێشانا خۆ ژ پۆستێ وەزیرێ دەرڤەیێ ئیرانێ ڕاگەھاند، بێی کو سەدەمێ ئاشکرا بکەت.

جەواد زەریف تەمەنێ وی ٥٩ سالن، پێشتر نووینەرێ ئیرانێ بوو د نەتەوەیێن ھەڤگرتی دا، ل سالا ٢٠١٣ێ حەسەن ڕۆحانی سەرۆک کۆمارێ ئیرانێ زەریفی وەک وەزیرێ دەرڤە دەستنیشانکر.

س.م