سەرنووچە:

نەتەنیاھۆ ب زمانێ فارسی پەیامەک ئاراستەی ئیرانێ کر

نەتەنیاھۆ ب زمانێ فارسی پەیامەک ئاراستەی ئیرانێ کر
فۆتۆ: ئەرشیڤ
2019-02-10

1082 جار خوێندراوەتەوە

بنیامین نەتەنیاھۆ سەرۆک وەزیرێ ئیسرائیلێ پەیامەک ب زمانێ فارسی ئاراستەیی ئیرانێ کر و ڕاگەھاند، دێ بەردەوام بن لسەر شکاندنا خۆ مکوکرنێن ئیرانێ د ناڤخۆیا سوریایێ دا.

 سەرۆک وەزیرێ ئیسرائیلێ ئەڤرۆ یەکشەمبیێ (١٠ێ سباتا ٢٠١٩ێ) د جڤینا حەفتیانەیا حکومەتا خۆ دا ڕاگەھاند، دێ پشکداریێ د کۆنگرەیا ئاسایش و ئاشتیێ دا کەن، کو بریارە ل ١٣ و ١٤ێ ڤێ مەھێ ل پۆلەندا برێڤەبچیت.

بنیامین نەتەنیاھۆ سەرۆک وەزیرێ ئیسرائیلێ د تویتەکێ دا کو بزمانێ فارسی بەلاڤکریە و دیارکریە، د کۆنگرەیێ دا دێ گۆتۆبێژان دەربارەی ڕێکارێن شکاندنا بەرھەڤیێن خۆموکمکرن و ھەبوونا ئیرانێ د ناڤخۆیا سوریایێ دا کەت، ھەروەسا بەرسڤا دستدرێژیێن ئیرانێ و ڕێگریکرن ژ وێ یەکێ کو نەکاریت چەکێ ئەتۆمی بدەست بێخیت.

سەرۆک وەزیرێ ئیسرائیلێ بەحسا وێ یەکێ ژی کریە، ب مەرەما گۆتۆبێژکرن دەربارەی چەاوانیا ڕۆبرووبوونا ئیرانێ د دەڤەرێن ڕۆژھەلاتا ناڤەراست دا، دێ د کۆنگرەیێ دا ھەڤدیتنان دگەل ھەریەک ژ مایک پێنس جێگرێ سەرۆکێ ئەمریکا و مایک پۆمپیۆ وەزیرێ دەرڤەیێ وی ولاتی و ھەژمارەکا سەرکردەیێن جیھانێ پێکئینیت.

دەما دوو سالێن بووری ئیسرائیلێ چەندین جاران ب ڕێکا موشەک و بالەفرێن شەری بنگەھێن گرۆپێن گرێدایی ئیرانێ و حیزبۆڵایا لوبنانی ل دەڤەرێن جودایێن سوریایێ کرنە ئارمانج.

د مەھا بووریدا مایک پۆمپیۆ وەزیرێ دەرڤەیێ ئەمریکا، داخوازا سازدانا کۆنگرەیەکێ بۆ ڕۆبرووبوونا سیاسەتێن ئیرانێ د دەڤەرێن جودایێن ڕۆژھەلاتا ناڤەراست دا کر، بریارە کۆنگرە ل باژارێ وارسۆیا پایتەختێ پۆلەندا بڕێڤەچیت.

س.م