سەرنووچە:

جوداهیەک د ناڤبەرا بڕیارا نەوەی نوێ و ئالیێن دی دا

PM:10:31:27/03/2022
3348 جار خوێندراوەتەوە
عەبدولعەزیز زێباری
+ -

کۆمبینا ڕۆژا شەمبیێ یا پەرلەمانێ عێراقێ هەمی تەخ و چینێن جودایێن هەرێما وکوردستانێ کرنە خودان دیتن و هزر و شرۆڤەکار و من ژی دڤێت دیتنا خۆ د ناڤ ڤان کارڤەدانان دا بدانم، کو هند هەڤبەرکرن و سینارۆیان دکەمە نموونەیەک بۆ بڕیارا ڤان سێ حزبان (نەوەی نوێ - یەکگرتوو- کۆمەل).

گوپیتکا دابەشبوونا ئالیان و تەمام نەبوونا نیسابا روونشتنا پەرلەمانی ژبلی شیعە و سوننەیان کورد بخۆ ئەگەرن و ب تایبەت یەکێتی و پارتی، ژبەرکو ئەو دوو حزبە د هەڤڕکیا بدەستڤەئینانا پۆستەکێ دانە جودایە ژ هەڤڕکیکرنا لسەر خزمەتکرنا خەلکی و مافێن هەرێما کوردستانێ د عێراقا فیدرال دا.

پارتی و یەکێتی کو هەر ئێک ژ وان بەرەیەک گرتیە و خودایە دگەل دوو جەمسەرێن ئاریشەدار و ناکۆکێن عێراقێ، میدیا و ئالیگر و ئەندام و کادرێن خۆ ب پارە و نەچارکرن خستینە کار داکو ل دژی وان بەرەیان کار بکەن کو ئاستەنگن لسەر بدەستڤەهاتنا پۆستێ سەرۆک کۆماریێ بۆ ئێک ژ وان، بڤێ ژی یەکگرتوو و کۆمەل و نەوەی نوێ کو خۆ ب ئۆپۆزسیۆنا هەرێمێ و خزمەتکارێن خەلکێ هەرێمێ ل بەغدا بناڤ دکەن، بووینە ئارمانجێن هێرشێن ڤان دوو حزبان و هەر ئێک ژ وان ژی ب شێوازەکێ.

نەوەی نوێ وەک میناک ئەم بینین، کو پترین چاڤ و ڕەخنە لسەربوون د ڤان هەڤڕکیان دا ئەو ژی کو بڕیاردا بچنە د کۆمبینا پەرلەمانی دا کەفتنە بەر رەخنە و هێرشان ب وێ ئاراستەیێ کو دروستکریا پارتییە و ل ژێرڤە کار بۆ وێ دکەت و دوورە ژ بەرەیێ راستیێ خەلکی، یا ئەز دبینم نەوەی نوێ کارێ خۆ یێ سیاسی کریە و خۆ تەرخان نەکریە بۆ خزمەتکرنا پارتی، بەلکو مافێ وێیە و یا راستا کری، ژبەرکو خودان بەربژێرێ خۆیە و کارێ ئۆپۆزسیۆنێ ژی ئەو نینە بێ ئالیبوونا خۆ لسەر ژکارخستنا پەرلەمانی دیار بکەت، بەلکو دروستبوونا حکومەت و کارابوونا سازیان ئەرکە لسەر وێ داکو ببیتە چاڤدێر لسەر کارێن حکومەت و سازیان و حکومەت بکەڤیت خزمەتا خەلکی، ژبەرکو ئەڤ بەربژێر و پەرلەمانە نەهاتیە پێکئینان و هەلبژارتن کو دەمی ببورینن بێ بەرپرسیارەتی و تنێ دەم بووراندن و پارە وەرگرتن بیت... بگرە ئەڤا نەوەی نوێ کری د پێشکەشکرنا پرژەیەکێ ١٧ خالی دا یەکەمجارە و گەرەنتیا جێبەجێکرنێ ژی وەرگرتیە کو وەک ئەو حزبە و هەڤپەیمانیا وێ دبێژیت، بڤێ ژی ئەگەر بهایێ سوتەمەنیێ و پرسا مووچەی و چەندین بابەتێن دی کو ب تەمامی ژیانا وەلاتیێن هەرێمێ زەحمەت و ئاستەنگری چارەسەر ببن، کەنگی ئاریشەیە کا سەرۆک کۆمار کییە؟.

یەکگرتوو و کۆمەل، کو وەک بێ ئالی و بێ تەرەفگیر ژ پارتی و یەکێتی خۆ بناڤ دکەن، ئەگەر وان ژی ب میناک بگرین دڤێت بێژین ئەو دوو حزبێن هە ژی بوونە ئالیگر و بەرەیێ یەکێتیێ و ژکارخستنێ گرت کو ئەڤە ڕاستەڕاست پێناسەیا ئالیگرتنا یەکێتی هەلدگریت، لێ نەکەفتنە بەر رەخنەیێ و ب ساناهی د ناڤ دیتن و توانجا جەماوەرێ گۆڕان و یەکگرتوو و کۆمەل و یەکێتیێ دا دەربازبوون و ب شەریفێن هەرێمێ هاتن بناڤکرن، لهەمبەر وێ کو خاستا پارتی بۆ نەچوویە سەری، بەروڤاژی ل دەف ئالیگرێن پارتی ب جاش و خزمەتکارێن ولاتێن بیانی دهێنە ل قەلەم دان.

د دەمەکێ دا، ئەگەر تۆ ئۆپۆزسیۆن و بێ ئالی بی، ئەرکێ تە ب پشکداریێ زێدەترە ژ ژکارخستنێ داکو نیساب و ڕێکار تەمام بن، بلا تە بەربژێر ژی نەبیت، لێ ل وی دەمی دا پرسا سەرۆک کۆماریێ دەربازبیت کو تۆ خودان هەلبژارتنا وی نینی و دەنگنەدەری و دا پرۆسەیا سەرۆک کۆماریێ دەربازکەت کو گریا کوورەیە و ب ساناهی ناڤەبیت و دیڤدا پێکئینانا حکومەتێ ساناهی و نێزیکی تەمامبوونا پێکئینانا کابینەیێ بیت، وی دەمی دا کارێ تەژی وەک ئۆپۆزسیۆن هێتە پێش کو خزمەتکرنە ب ڕێکا دەنگێ جادەیێ و پێشکەشکرنا پرۆژەیێن بەرژەوەندیا خەلکی و چاڤدێریکرنا کارێن حکومەتێ.

ل داویێ ئەگەر ب واقع تەماشەی ڤێ پرۆسەیێ بکەین گیرۆکرنا دەربازبوونا پرسا سەرۆک کۆماریێ و پێکئینانا حکومەتا عێراقێ نە کارێ ئۆپۆزسیۆن و بێ ئالیانە، بەلکو کارێ وان ئالیانە کو هەڤڕکیێ بدەستڤەئینانا زۆرترین پۆست و ئیمتیازاتان دکەن.


 

گەلەری