سەرنووچە:

ڕووڕەشکیا سیاسى

PM:03:58:18/12/2021
43560 جار خوێندراوەتەوە
جاسم محەمەد شەرنەخی
+ -

ڕووڕەشکیا سیاسى

جاسم محمد شرنەخى

ژ ڤەڕێژا سیاسەتا ئنتیکە و سەیر ئەوا ل کوردستانێ ب تنێ هەى، ئەوە: هەر دەمێ بەرپرسێن (دەستهەڵات ڕەها) دکەڤنە داڤێن شکەستنان و دئەنجامدا ڕوى ب ڕوى پێلێن نەڕازیبوون و تۆڕەرییا خەلکێ دبن؛ خۆ ژ هەلگرتنا بەرپرسییا تەمام و ڕەها دەنە لایەکێ، قەبارەکێ زێدە ژ شکەستنا خوە ب خوە و جاران ژى هەمیێ دهاڤێژنە سەر ملێت هندەک لایەنێت دیترێت دەستکورت ژ دەستهەڵاتێ، ڤێجا ئەو لایەن چ کەسایەتی بن یانژى سازى و دەزگەهـ بن، مینا: پارتێن سیاسی، وەزارەتان، ئەها ڤێ رۆلێ دەستکورت دگێڕن ئەز بـ: (ڕۆڕەشکیا سیاسى) ناڤ دکم، ئەڤێن ل خوارێ هندەک نموونەیێت زۆر بەرچاڤ و زیقن ل سەر وێ یەکێ.

ئێکەم: ژبەرکو (حزبێن مەزن) و (دەستهەڵاتا ڕاستەقینە) ژێک ناهێنە جوداکرن، (حزب حکۆمەتە) و (حکۆمەت حزبە)، لەوا د هەمى کابینەیێت حکۆمەتێت پێکهاتى (کوئالیشیۆنى)ـدا، دەستهەڵات ل ڤێ زۆنێ و ل وێ زۆنێ د لەپێن حزبا مەزن ب تنێ دایە، لێ گەلەک جاران مە دیتیە دەمێ ڕەخنێت توند ژبۆ پارتا حوکمڕان دهاتە ئاڕاستەکرن، دا ئێکسەر بەزنە چەکێ (ڕورەشکیا سیاسى) و بێژن: حکومەت نە ژ مە بتنێ"پێکهاتیە"، فلان و بێڤان لایەن ژى ل گەل مە شەریک و هەڤپشکن، دڤێت ئەوژى بەرپرسیێ هەلگرن، ژ سەرێن حزبا (دەستهەڵاتدار) گۆتنەک هەمى جاران دووبارە بوویە: ل سەرکەفتنا هەڤپشکێت مە گەلەکن، واتە د تەنگاڤیاندا دڤێت ئەو پشتا حوکمڕانا بگرن، ئەو لایەنێت هەڤپشک بهێنە پێش، ببنە پاڕێزەر و ڕویێ شکەستنا پۆڵش بکن، جاران ژى خرابکاریان پاڤێژنە سەر ملێت خۆ، نە بەس خۆ ل سەرکەفتنا بکنە خودان، هەر چەندە نەهاتە زانین: کا ئەو چ سەرکەفتنن بەحس ژێ دکن: یێت ئابوورینە؟!، یێت سیاسینە؟!، یێت پیشەسازینە؟!، یا خۆشگۆزەڕانینە؟!، ژبلى شکەستنا بلا ئێک بیاڤێ بێژن: سەرکەفتنەکا ڕاستەقینە تێدا چێبووی بەلێ ب مەرجەکێ گۆرەى شیانێت زەبلاحێت ماددیێت بەردەستدا بت، لێ چەوابت یا دهێتە داخوازکرن ژ ڕەخێ لایەنێت پێکهاتا حکۆمەتێ تەنها (ڕووڕەشکیا سیاسیە) و د بەرامبەردا هندەک بەرژەوەندیێت نە ڕەوا یێت خلۆلە، زوى ببنە هەلم ڕۆڕەشک وەرگرن و باجەکا مالویرانکەر بدن.

دووەم: جاران ژى ڕووڕەشکی بکارئینانا هندەک وەزیران دهاتە کرن و دبوونە شەلێت چپکان، ئەلبەت دهاتە خواستن خۆ بدەنە بەرسەرێ حکۆمەتێ، ڕۆلێ شەرمزاریا سیاسى ب ئاوایەکێ نایاب بگێڕن، نێزیکترین ورۆهنترین نموونە ژى بۆ مە هەمیان ئەوە: ل دەمێ خۆنیشادانێت قوتابیان یێت ل 21-11-2021 و ڕۆژێت دویڤدا، ڕوى دایین پێناڤ ڤەگەڕاندنا دەرمالەیکێ کێم یێ ب بڕیارا ئەنجۆمەنێ وەزیران ، ب ژمارە (1018) ل (11-2-2014) قۆتکرى، لێ بەرێ خۆ بدە بزاڤێت ڕووڕەشکیا سیاسى بەرەڤ کورڤە چوو؟!

خەلکێ ب گۆهـ و چاڤێت سەرێ خۆ دیتن چەوان گازیەکا گۆمانەوى ل پەرلەمانى بلندبوو، دوو یاداشت هاتنە بەرهەڤکرن ژبۆ داخوازکرنا وەزیرێ خواندنا بلند و وەزیرێ دارایى هەر زوى ل بەرامبەر پەرلمانتارێ کوردستانێ حازرببن و ڕۆهنکرنا بدن: کا چما ماڤێت قوتابیان قۆتبووینە؟!، هەر چەندە خوەدیێت یاداشتا باش دزانن، هیچ پارێ تەرخانکرى ژ بۆدجێ بۆ دەرمالەیێت قوتابیان ل بەر دەستێت هەردۆ وەزیرا نینە، بەلکى هەر د بونیاتدا ژ ساڵا 2014 وەرە و هەتا نها بودجە ژبۆ پەرلەمانێ بەلەنگاز نەهاتیە ڕەوانەکرن دا بهێتە پەسەندکرن، ئەڤجا هەردوو بەرێز ب دەستێن ڤالا و نەخوەدى بڕیار دێ شێن چ بکن؟!

ئەڤێت مە گۆتین تەنها نموونە ژ سیاسەتکا پڕاکتیکیا پەیڕەوکرى، مەرەم و ئارمانج ژێ ئەوە: دوو باڵەفر ب بەرەکێ بهێنە نێچیرکرن، یێ ئێکێ بەرپرسێ ڕاستەقینە ژ کێشە و تاوانێت نەهامەتیان قورتال ببت و ب کراسەکێ زۆها بچیتە وێ دەرا هە، یێ دوویێ لایەنێت سیاسیێت بچویک شکەستنێ ببینن دا ژ مەیدانا ملمانێ بچنە دەرێ، ڕەسیدێ وان ژ جەماوەرى ببتە هیچ چنە.

دبینم ژ وەڵاتیان ڕا گرنگە چاڤدێڕ و شۆلەژیێت سیاسى دەینن ل سەر بەڕکێ و بێژن: ئەگەر یەکگرتوو خۆ ژ داڤێن ڕوڕەشیا سیاسى ڤەنەدابا دا ڤێ جارێ سزایەکێ پشتشکێن، دژوارتر ژ یێ ساڵا 2018 خۆتن، دەمێ ژ دەهـ کورسیکا کریە پێنچ، ب باوەرم ڤێ گەڕێ دا کادر و ئەندامێت وێ ددەستێت کاڕاکتەرێت سیاسیێت نەهەنگدا بنە لەگلەگە، بەس دا شەرمزارى و ڕووڕەشکی بۆ وان مینت.

دیسان زۆر یا پێدڤێە ڕۆهن ببت کۆ: تەڤگەڕا (گۆڕان) وانەیەک بۆ خوە ژ غەیرى خوە وەرنەگرت، لەوا باجەکا زێدە زێدە مەزن و وێرانکەر د هەلبژارتنێت عیراقێدا پێشکێش کر، ب ڕێژا 100% قازانج و دەستکەفتیێت جەماوەرى و سیاسى هوندا کر، ژ (4) کورسیێن پەرلەمانێ عیراقێ گەهشتە زیڕۆیێ.

ئەڤە ژ ئەنجامێت وێ چەندێیە خەلکێ ڤى وەڵاتى یێت بەڕەڤ تێگەهشتەن و هوشیاریەکا قەنچڤە دچن، هەر چەندە لڤێنا وى یا گرانە لێ بڕاستى گەلێ باشوورێ کوردستانێ ئێدێ بەرهەڤ نینە ڕۆلەکێ نزم و ڕەزیل ژ هێزێن خۆ ب چاکسازى و گهوڕینێ نیشان ددن ڕازى ببت.

ل سەر هەر حالەکێ ڕا دکارین بێژین: نها مومکنە ژ دەولەت سەرێ سیاسەتمەدارێن کوردستانێ زاڕاڤەکێ دیتر ل فەرهەنگا سیاسیا کوردى بهێتە زێدەکرن کو (ڕووڕەشکیا سیاسیە).

گەلەری