حکومەتا هەرێمێ نە وژدان هەیەو نە عەقل و نە حیکمەت...
PM:08:41:12/11/2021
46332 جار خوێندراوەتەوە
فەرھاد عەلی حەمید
+
-
ڕاستە دەسپێکا ژیان سەر هەلدای و دگەل هەبوونا مرۆڤایەتیێ کۆچکرن بۆ ژیانەکا
باشتر هەبوویە، لێ ئەوا نها ئەم دبینین نە کۆچکرنە بۆ ژیانەک شایستەترو خۆشتر بەلکی
ئەڤە ڕەڤینە ژ دەستهەڵاتەکا دزو گەندەڵ و مافیاو زاڵم.
ڕاستە کۆچکرن سرۆشتیە لێ ڕەڤین کارەساتەو دگەل ڕەڤینێ جارا کارەسات دروست
دبن، ئەڤ کۆچ کرنە، نە حالەتە،بەڵکۆ دیاردەیەو دیاردەژی د کەڤیتە قالبێ نە سرۆشتیبوونێ
دا.
ژێرخان و سەرخان و عەردوو ئاسمانێن وەڵاتێ مە پێت و بەرەکەت و خێرو بێرە، لێ
ئەڤ خێرو داهاتە بتنێ د خزمەتا سەد کەسەکانەو ژدوو بنەماڵا زێدەتر کەسێ خێر ژ
داهاتێ هەرێما کوردستانێ نە دیتیەو جاران ژی هندەک هەستێن گۆشتی یێن ڤەڕۆتی دهاڤێنە
بەر دەڤێ سەیێن خوە یێن هار ئەوژی ژبوی وێ یەکێیە دەمێ پێتڤی ب ئەوان سەیا ببن داکۆ
کشکەنە ئازادی خازو ماف پەروەر و دلسۆز و کورد پەروەرا.
ل هەرێما کوردستانێ ژبلی داهات و سەروەت و سامانی. کورسی و بڕێڤەبرنا دەستهەڵاتێ
ژی یا بویە ڕادەستکرن ژ باپیری بۆ بابێ و ژ بابێ بۆ کۆڕی و ژ کۆڕی بۆ نەڤی و ژ نەڤی بۆ نەڤی چڕکی، ئەڤجا ئەڤ کۆرو نەڤییە بکێربێن یان
ژی بکێر نەهێن، بڤی ئاوایی حکومڕانی یا هاتیە بارڤەکرن دناڤبەرا بنەمالا تالەبانی
و بارزانی دا.
ئەڤە ب سەدان ساڵە کورد یێ خوینێ د ڕێژن و خەبات و شۆڕەشێ دکەن داکۆ ژبن زۆڵم
ستەما بیانیا ڕزگار ببن، لێ د نەتیجەیدا مللەتێ کورد ژبن دەستێن زاڵم و دکتاتۆرەکێ
بیانی کەفتنە ژێر دەستێ دەهان ئەژدەها و خۆین مژێن خۆیانی.
دکتاتۆریەت و زۆڵم یا گەهشتیە وی ڕاددەی،
گەنجێ کورد دناڤبەرا سنۆرێن بیلا ڕۆسیاو پۆڵەندا ئاسێ ماینەو برسێ و سەرمایێ و ترسێ
یێت دوورپێچ کرین و چاڤەڕێی مرنێ نە، لێ هەر ئەڤ گەنجە یێ هەواردکەن و دبێژن بلا
بمرین و سەو بەڕاز گۆشتێ لاشێ مە بخۆن ئەم ناڤەگەڕینەڤە کوردستانێ، گەر خاندنەکێ بۆ
ڤان جۆرە ئاخافتنا بکەین دێ دیاربیت کا حکومڕانیا کوردی چەند زۆڵم و زورداری ل گەنجێ
خۆ کریەو چەند مافێ وان خاریە و چەند نادادی جیاوازی هەبویە حەتا ڤێ ئاخافتنێ بکەن
و بێژن؟!
ڕۆژنامەڤانەک ل ماڵپەڕا خۆ یا فیسبۆکی بنڤێسیت و بێژیت:
ئەز هەلگرێ دبلۆم و بەکالۆریۆس مە و خودان خانی و ترۆمبێل و مووچەو مال و
حاڵ بووم، لێ بەلێ مانا من ل هەرێما کوردستانێ یان دڤیا مینا (وەداد حسێن و شوکری ڕێکان
و کاوە گەرمانی و زەردەشت عۆسمانی و ئامانج بابان و...هتد هاتبامە کۆژتن یان ژی مینا(شێرێن
بادیناو ژێرگرتیێن بادینان) ب شەش ساڵان هاتبامە زینداکرن و لژێر چارەنڤێسەکێ بەرزە
و نادیار من ژیان کربا!!
بکۆرتی و ب کوردی... یان دڤێت ل هەرێما کوردستانێ ببی کویلەو هەر تشتەکی لسەر
خۆ قەبیل بکەی، نەبینا گازێ و غازێ و کارەبێ و ئاڤێ و ب نەبوونا مووچەی و بێ کاریێ
و زۆڵم و زورداریێ ڕازی بی و سەرێ خۆ بۆ هەر بێشەڕەفەکی بچەمینی، یان ژی دڤێت دناڤا
زیندانێن پارتی ویەکێتی دا ب ڕزی ! یان ژی ڕێکا قەدەرەکا نەدیار بگریە بەر و قەستا
دلۆڤنیا دەریا تاریا ئیجەو سڕو سەرماو برسا سنوورێن بیلاڕۆسیاو پۆڵەندا بکەی و چاڤەڕێ
بکەی مەرگێ زاڕۆکێن تە ل پێش چاڤێن تە ببنە شاپەرێن عەورەکێ تاری و بەرەف ئاسمانێ
بێ دادیێ بڤڕن.