PM:09:29:20/05/2022
1200 جار خوێندراوەتەوە
+
-
وەزارەتا بازرگانی و پێشەسازیا حکومەتا هەرێما کوردستانێ ڕاگەهاند، رۆژا چارشەمبی ٢٥ی٥ی ٢٠٢٢ێ ئێکەم رۆژا وەرگرتنا گەنمێ جوتیارێن هەرێمێ یە.
ئەڤرۆ ئەینی، وەزارەتا بازرگانی و پێشەسازیا حکومەتا هەرێما کوردستانێ ڕاگەهاندنەک بەلاڤکر و تێدا هاتیە، پشتی گۆتۆبێژ و راگۆهڕینان دگەل حکومەتا فیدڕالی، رۆژا چارشەمبی ٢٥ی٥ی ٢٠٢٢ێ ئێکەم رۆژا وەرگرتنا گەنمێ جوتیارێن هەرێما کوردستانێ هاتە دیارکرن.
ئاماژە ب وێ یەکێ ژی کر، بۆ ڤێ مەرەمێ وەزارەتا بازرگانیا هەرێمێ تەڤایا جوتیارێن هەرێمێ هایدار دکەت ژ دەمێ دیارکری گەنمێ بەرهەمهاتی رادەستی سایلۆیێن هەرێما کوردستانێ بکەن.
ئەڤە ددەمەکیدایە، بەریا نها نەوزاد کامل رێڤەبەرێ گشتی ل وەزارەتا بازرگانیا هەرێمێ ڕاگەهاند، وەزارەتا بازرگانیا عێراقێ ل تەڤایا سایلۆیان دەست ب ئامادەکاریان کریە بۆ وەرگرتنا گەنمێ جوتیاران بۆ سالا ٢٠٢٢ێ گوت ژی عێراق دێ تەڤایا کەنمێ جوتیاران وەرگریت.
ئاماژە ب وێ یەکێ ژی کر، بۆ هەر تەنەکا گەنمێ پلە ئێک کوژمێ ٧٥٠ هزار دینارێن عێراقی هاتینە دیارکرن، هەروەسا ژ ئەگەرێ بلندبوونا بهایێ گەنمی ل جیهانێ وەرگرتنا گەنمی ل ناڤخۆ ب رێژەیا ٢٠% دێ هێتە زێدەکرن.
وەزارەتا بازرگانیا عێراقێ بڕیار ژی دایە، ئەڤ سالە ل دەمێ ١٠ رۆژان پارەیێ گەنمێ جوتیاران ب مەزێخیت.
هەڤدەم، رێبوار ئەورەحمان پەیڤدارێ فراکسیۆنا نەوەێ نوێ ل پەرلەمانێ عێراقێ و ئەندامێ لژنەیا داراییا پەرلەمانی ڕاگەهاند، ئەڤرۆ حکومەتا عێراقێ کوژنێ ١٠٠ هزار دیناران بۆ هەر تەنەکا گەنمی زێدەکرن، ب وێ یەکێ ژی هەر تەنەکا گەنمی دێ ب کوژمێ ٨٥٠ هزار دیناران وەرگرن.