AM:10:09:08/12/2021
704 جار خوێندراوەتەوە
+
-
بەرێ سپێدەهیا ئەڤرۆ چارشەمبێ، هێزێن
پێشمەرگەی و سوپایێ عێراقێ، ئۆپەڕاسیونەک ل هەردوو میحوەرێن گەرمەسێر و قەرەتەپە
بۆ سەر جهێن ڤەشارتی یێن گرۆپێن چەکدارێن داعش دەستپێکر.
د ڕاگەهاندنەکێ دا، وەزارەتا پێشمەرگەیێ
حکومەتا هەرێمێ ڕاگەهاندیە، "سەرێ سپێدەهیا ئەڤرۆ ل هەردوو میحوەرێن ئێک یێن
گەرمەسێر و دوو یێ قەرەتەپە، هێزێن پێشمەرگەی ب مەرەما دورخستنا مەترسیا چەکدارێن
داعش و ژناڤبرنا جهێن وان، ئۆپەڕاسیۆنا ژناڤبرنا وان دەستپێکر، کو دکەڤنە دەڤەرێن
گرنگێن ئەولەهیێ دناڤبەرا هێزێن پێشمەرگەی و سوپایێ عێراقێ".
وەزارەتا پێشمەرگەی دڕاگەهاندنا خۆدا
دیارکریە، د ئۆپەراسیونەکێ دا ل میحوەرێ گەرمەسێر هەر ئێک ژ لیوایێن سێ و پێنج یێن
پیادە و ل میحوەرێ دوو یێ قەرەتەپە ژی لیوایێن ١٧ و نەهـ یێن پیادە یێن سەر ب وەزارەتا پێشمەرگەی ڤە دگەل چەند
یەکەیێن هێزێن ٧٠ بەشداربوون.
ئاماژە ب وێیەکێ ژی کر، ئۆپەڕاسیۆن دێ
بەردەوام بیت هەیا ئەو دەڤەرە بهێتە پاقکرن ژ داعش، دبێژیت ژی، ئۆپەڕاسیۆن لسەر وێ
لهەڤهاتنێ هاتیە کرن ئەوا بەریا نها دناڤبەرا پێشمەرگە و سوپایێ عێراقێ دا هاتیە
کرن".
ئەڤە د دەمەکێ دایە، ل ٢ی ڤێ مەهێ چەکدارێن
داعش هێرشکرنە سەر گوندێ خدرجیجە و د ئەنجامدا ١٣ پێشمەرگە و وەلاتی شەهیدبوون و
چەند کەس ژی برینداربوون.
هەڤدەم، ل ٢٧ی مەها دەربازبووی ژی، ل ناحیا
کۆلەجۆ ل گەرمیان داعش هێرشکرە سەر چەپەرێن پێشمەرگەی، دەما کو هەڤکاری بۆ وان
چووی بۆمبەکا چاندی پێ ڤە تەقیا و پێنج
پێشمەرگە شەهیدبوون و چارێن دی ژی برینداربوون.
ل ٢٩ی مەها دەربازبووی ژی، ل سنورێ کفری ژ
ئالیێ چەکدارێن داعش هێرشی چەپەرێن پێشمەرگەی هاتە کرن و د ئەنجامدا دوو پێشمەرگەی
شەهیدبوون و سێیێن دی ژی برینداربوون.