PM:07:40:06/12/2021
856 جار خوێندراوەتەوە
+
-
پشتی دەربازبوونا نێزیکی ١٠ مەهان ژ بڕیارا قەزابوونا باتیفا؛ ئیدارا
سەربەخۆیا زاخۆ ڕاگەهاند، فەرهاد مەحمود وەکی قائیمقامێ وێ قەزایێ هاتە دیارکرن.
ئەڤرۆ دووشەمبێ، د ڕاگەهاندنەکێ دا ئیدارا سەربەخۆیا زاخۆ ڕاگەهاند، ب
بەرهەڤبوونا گوهدار شێخۆ سەرپەرشتێ ئیدارا سەربەخۆیا زاخۆ جڤینەک دەربارەی باتیفا
هاتە لدارخستن و تێدا فەرهاد مەحمود وەکی قائیمقامێ وێ قەزایێ ب وەکالەت هاتە
دیارکرن.
ئاماژە ب وێیەکێ ژی کریە، بۆ بەشێن دی یێن برێڤەبرنا کاروبارێن ئیداری
دێ رێڤەبەرێن پێتڤی هێنە دانان و ژ ئەڤرۆ و پێدا وەکی قەزا سەرەدەری دێ دگەل
باتیفا هێتەکرن.
هەڤدەم، د پەیڤەکێ دا گوهدار شێخۆ سەرپەرشتێ ئیدارا سەربەخۆیا زاخۆ ژی
گوت، "دڤێت ئەم هەمی پێکڤە هەڤکار و هاریکاربین بۆ ئاڤاکرن و سەرئێخستنا
سنورێ ئیدارا سەربەخۆیا زاخۆ، دێ بزاڤان کەین پرۆژەیێن مفادار بۆ بەرژەوەندیا گشتی
و خەلکێ دەڤەرێ بهێنەکرن، بتایبەتی ژی پرۆژەیێن گەشت و گۆزاری یێن باش".
ئەڤە د دەمەکێ دایە، ل ١٠ی ٢ی ٢٠٢١ێ جڤاتا پارێزگەها دهۆکێ ب کۆما
دەنگان بڕیاردا ناحیا باتیفا ببیتە قەزا و کۆمەلگەها بێگۆڤا ژی ببیتە ناحیە، پشتی
نێزیکی ١٠ مەهان شنو قائیمقام بۆ وێ قەزایێ هاتە دانان و دێ سەرەدەریا قەزابوونێ
دگەلدا هێتەکرن.