سەرنووچە:

کۆرۆنا زەر و کۆرۆنا کەسک

2/12/2020 9:50:30 PM
6863 جار خوێندراوەتەوە
عەلی خەلیل
+ -

ل چینێ تنێ ئێک جۆرێ کۆرۆنا بوویە بەلا سەرێ وان، لێ بەلێ ل ھەرێما کوردستانێ دوو جۆرێن کۆرۆنا بووینە بەلا سەرێ خەلکی، وەسا دیار دبیت ژ دەستپێکا سالێن پشتی سەرھلدانێ کارێن دزی و گەندەڵیێ ژلایێ ڤان دوو ڤایرۆسانڤە دەستپێکر، شەفەل و ترۆمبێل و ماکینەیێن فەرمانگەھێن میری ھەموو بەرەڤ ئیرانێ برن، تاکو نەماین و سەدامی ژلایێ خوەڤە ئابلۆقە دانا سەر ڤان ھەردوو بنەمالا، و لسەر کەنالێن خوە گۆت نابیت چ ماکینە بەرەڤ ھەرێمێ بچن، چنکو ھەر تشتێ چوو بۆ ئیرانێ ھاتە رەوانەکرن، ئەڤجا ئێدی ب قاچاخی ژی رێک نەدا چ جۆرێن ترومبێلا بھێنە ناڤا ھەرێمێ.

پشتی ھەردوو بنەمالان چ ئامیرە و ترومبێل و ماکینە نەھێلاین، دەرگەھێن دەولەتێن جیران کەڤتینە دەست وان رابوون شەڕ سەرا وان ھەردوو دەروازەیان کرن و پتر ژ ٣٠ ھزار کەس بوونە قوربانیێن ڤی شەڕی، ئەڤ دزیکرنە کەتە د قوناغەکا نوو دا، پشتی کانزا و پەترۆل کەڤتیە دەستێن وان، لێ وەسا دیارە کو ئەڤ ھەردوو بنەمالە ژ وان ژی نێچیرڤان بارزانی و قوباد تالەبانی تووشی شکەستنەکێ بووینە د رێککەڤتنا پەترۆلێ دا دگەل تورکیا ئەوا بۆ ماوێ پێنجی سالان ھاتیە ئیمزاکرن.

ھەر بۆ زانین تورکیا ب چ رەنگا قەبوول ناکەت و رێکێ نادەت نێچیرڤان بارزانی ژ دەستھەلاتا ھەرێمێ دوورکەڤیت، ژبەر کاغەز و نھێنیێن ڤێ رێککەڤتنێ یێن د دەست وی دا و ھەتا نھۆ ژی ئەڤ دۆسەیە رادەستی حکومەتا مەسرور بارزانی نەکریە و ناکەت ژی، ئەڤجا مە ئەڤ سالێن دەستھەلاتا ھەردوو ڤایرۆسان دیت و ھەموو ئاشکرابوو، ھەروەسا بۆ وان ژی ئاشکرابوو، ئەوێ ژیێ خوە د چیای و شکەفتانڤە بۆراندی ژ پێخەمەت رزگارکرنا وەلات و نەتەوا خوە، نەکو ژبۆ پاراستنا بنەمالەکێ.

ھەروەسا ب سەدان ھزار کوردان جانێ خوە کرنە قوربان سەرا پەیڤا کوردستان و کەسێ نەدزانین ئەڤ دوو بنەمالە یێ وان دخاپینن و ئەو قوربانیدانە ھەموو ژ پێخەمەت بدەستڤەئینانا مال و سەروەتەکێ بوویە و چ گرێدان ب کێشەیا نەتەویڤە نەبوویە، نھۆ ژی ئەڤ ھەردوو ڤایرۆسە باش دئاشکرانە ئەو کار و کریارێن دژی ڤی مللەتی دکەن و دوبەرەکیا ئێخستیە ناڤ چەند پارێزگەھێن ھەرێمێ ژبۆ پاراستنا دەستھەلاتا خوە و بەردەوامیدانا دزی و گەندەلیێن خوە.

یا گرنگ ل ڤێرێ دڤێت ھەر کەس بزانت، پارتی و ئێکەتی وەکو حزب نەماینە و ئەو کوردێن ب دلەکێ کوردینی و شۆڕشگێر تەڤلی ڤان ھەردوو حزبان بووین نوکە دەستێ لبن بەرییە و نەشێن ئێدی چ بکەن تنێ یێن رۆژێن ژیانا خوە د خەمێن گرانێن پەشێمانیێ دا دبورینن، گەر ئێک بێژت لایەنگرێن ڤان دوو بنەمالان چنکو نەشێم ئێدی بێژم حزب، تنێ ئەون یێن دشێن خوە بۆ پارەی بفرۆشن و کریارێن تیرۆرێ دژی مللەتێ خوە ئەنجامدەن، ژ پێخەمەت پاراستنا دەستکەفتێن وان بنەمالان.

ل دووماھیێ ژی دێ بێژم ھەموو تشت ب دۆماھیک دھێن، ئەڤجا ھەر کوردەکێ ب کەرامەت بزانت و کەرامەتا خوە بپارێزت و قوربانی بەرژەوەندیا نەکەت، چونکو د دۆماھیێ جھێ وی ل ناڤ چ مللەتان نابیت.