سەرنووچە:

مەسروری دوماهیک ب سەربەخوییا ئابورییا نێچیرڤانی ئینا

11/27/2019 9:01:51 PM
5667 جار خوێندراوەتەوە
ئەکرەم گولی
+ -

دەما نێچیرڤان بارزانی بوویە سەروکێ حکومەتێ د دوو کابینێن پێشتر دا بانگەشا وێ چەندێ کر کو ھەرێمێ پێدڤیە سەربەخویا ئابوری ھەبیت ، ئێدی چاڤێ وێ ل دەستێ بەغدا ومیزانیا بەغدایێ نەبیت ، بێ منەت بیت ، ب بەھانا ھندێ بەغدا دوژمنە و ھەمی دەما ھەرێما کوردستانێ لبن مەترسیێ دایە ، ھەر دەما دەستھەلاتدارێن بەغدایێ بڤێن دشێن ھەرێما کوردستانێ برسی بکن، ھەرەشا ل ھەرێمێ بکن ئەگەر ب دلێ وان کار نەکن، ھەر وەختێ بڤێت دێ ھەرێمێ توشی کیشەکا مەزنا ئابوری کەن.

سەربەخویا ئابوری یان ئابورەکێ سەربەخو ، مەزنترین و گرانترین بانگەشا نێچیرڤان بازرانی بوو وەکو سەروکێ حکومەتێ د وی دەمی دا ، ب ھاریکارییا تورکیا بوریەکا نەفتێ کێشا بو بەندەرێ جەیھان و رێکەفتنەکا ڤەشارتی تانوکە ژی کەس ناڤەروکێ نزانیت دگەل تورکیایێ کر، ل جھێ بەغدا ببیت وێستگەھێ ھاتنوچونا نێچیرڤان بارزانی سەروکێ حکومەتا وی دەمی ، ئەنقەرە کرە شوینگرا بەغدایێ، ھوسا خەیال ئاڤاکر ب رێکا ئەنقەرە دێ سەربەخوییا ئابورییا ھەرێمێ ژ دایک بیت ، د ناڤا ھولا نشتەرگەرییا تورکیایێ دا دێ جاڤێن خوە ڤەکەت!.

لێ ژ دەرئەنجامێ ڤێ سیاسەتا بێ پلان ، بێ بەرنامە، بێ شەفافیەت، ب خرابترین و شکەستی ترین سیاسەتا کارکرنێ، لبن ڤێ سیاسەتا کارکرنا نێچیرڤان بارزانی ھەرێما کوردستانێ کەتە ژێر قەرزێن کەمەرشکێن یێن کومپانیێن نەفتێ، دەما چوارسالان ب دەھان ملیار دینارێن فەرمانبەران کو مووچە و تاکە ژێدەرێ ژیانا وان بوویە، بییە نیڤە و روبع مووچە، جاران ژی ئەو روبع مووچە چەند ھەیڤان نەدا و پاش دئێخست، ب ھزاران کومپانیێن بیانی ژبەر خرابیا رەوشا ئابوری ژ ھەرێمێ دەرکەتن، ب سەدان کومپانیێن ناڤخوە توشی ھەرفینێ و ئیفلاس بوونێ بوون، وەبەرھێنان گەھشتە نزمترین رێژە، کار لسەر پروژان ڕاوەستییا ژبەر نەدانا پارێن بەلێندەران، ھەمی کەرت ب تمامی توشی ھەرفینێ ھاتن، رێژا بێ کاریێ ئاستەکێ ھند مەترسیدار و بلند تومارکر ئێدی حکومەتێ داتایێن رەسمی یێن رێژا بێ کاریێ بەڵاڤ نەدکرن .

تا ڕیفراندۆمێ ژی ھێشا ڤێ خەوێ پارتی و نێچیرڤان بارزانی بەرنەدابی، وان ھزردکر تورکیا ئەو دەرگەھە یێ تێرا دەربازببن و خەونا خوە کو ئابورییەکا سەربەخویە بگەھنێ، لێ پشتی ڕیفراندۆمێ، رەوش ھاتە گوھارتن مەترسیەکا مەزن لسەر پێگەھێ پارتی دروست بوو، دەما مەسرور بارزانی وەکو سەروکێ حکومەتێ دەست بکاربوو، دەستپێکا پەیام و گوتنێت وی زڤرین بی بەرەڤ بەغدایێ، تێگەھشت ئەو ئابورییا سەربەخو یا کو نێچیرڤانی بانگەشە بو دکر بتنێ گوتنەک بێ ھەبونا چ ناڤەروکێ بی ، ژبلی دروستکرنا مەترسیێ لسەر پێگەھێ پارتی، چ ژێ بەرھەم نەھات، بەرھەمێ وێ بتنێ قەرزداربین بی ب دەھان ملیار دولاران، دەست برن بۆ بڕینا بێ وژدانانە یا مووچەیێ فەرمانبەران و دروستکرنا کارەساتان و مەزنترین شکەستن.

لەوا ب نەچاری بەروڤاژی پسمامێ خوە وێستگەھێ ھاتنو چوونا خوە کرە بەغدا و پشت ل ئەنقەرە کر، باش دزانی گەر بەغدا د ھەوارا وی نەھێت، وی ژ حکومەتەکا شکەستن خاری و قەرزدارا دەھان ملیارا دولارا رزگارنەکت، ئەو سیاسیەتا بناڤێ سەربەخۆیا ئابوریا نێچیرڤانی ھاژوتی دێ وی لاواز کت، دێ حکومرانیەکا ژ جورێ خرابترین نمونە پێشکێش کەت، ئەڤەژی ئێکەم ئەزمونا وییە وەکو سەروکێ حکومەتێ وی نەڤێت ب چ رەنگان ئەو توشی ڤێ ببیت ودێ ھەمی ڕێکان گریت نمونەکا باشتر پێشکێشکەت ، مەسرو بارزانی تێگەھشت گەر رێکا بەغدایێ نەگریت جارەکا دی دڤێت مووچەیێ فەرمانبەران ببڕیت و ھەرێما کوردستانێ بکەت د قەیرانەکا دژوارتردا ژوێ یا پسمامێ وی برێڤەبری و ھەرێم کرییە تێدا، ئەڤەژی دێ بیت ئەگەرێ دروست بونا خونیشاندانان، ھاتنا خەلکی لسەر جادان ، بلندبونا دەنگێ نەرازی ، توڕەبونا خەلکی ، ب ئارمانج گرتنا کەساتییا وی ژلایێ ڕاگەھاندنا بەرامبەرونەیارا سیاسی و دەرئەنجامێ وێ دروست بوونا بەرەیەکێ مەزنێ ئۆپزسیونێ ژ لایێ پارتێن دیتر ڤە، و ئێکەم بەیانناما وان ژی بێگومان داخازا دەست ژکارکێشانا وی یە ژ سەرۆکاتیا حکومەتێ، ل دوماھیێ ژی یان دڤێت گورەپانا ھەرێمێ بکەت گەرێن خوینێ ب ھێزا خوە یا چەکداری و خوینا خەلکێ ب رێژیت، یان ب نەچاری دەستا ژ کار بکێشیت، ئەڤە ھەردوو بژاردە ژی دێ دوماھیێ ب دەستھەلاتا پارتی دیموکراتی کوردستان ئینن، ئەو دێ بیت ئەگەرێ نەمانا ڤێ دەستھەلاتێ کو زێدەتری ٧٠ سالانە دەسھەلاتا ئێکجاری ھەی، یان دێ گەلەک لاواز کەت.

ژبەر ڤێ مەترسیێ مەسرور بارزانی وەکو سەرۆکێ حکومەتێ ب نەچاری رێکا بەغدا گرت، شاند ل دیڤ شاندی رەوانەی دەڤەرا کەسکا بەغدایێ کرن، ب شێوەکێ گەلەکێ روھن و ئاشکرا ئنیەتا خوە بۆ بەغدایێ ئاشکرا کر کو یا نێچیرڤان بارزانی کری ئەو ناکت ،ل جھێ ئەنقەرە ئەو بەغدایێ ب مالا مەزن دزانت، دوماھیک ب وێ سیاسەتا سەربەخوییا ئابوری ئینا یا نێچیرڤان بارزانی ڕاگەھاندنی و ب سالان بانگەشە بۆ کری، ئەو ژی ب ئیمزاکرنا رێکەفتنا دگەل بەغدا و ڕادەستکرنا نەفتا ھەرێمێ ب بەغدا، کو چ جاران نێچیرڤان بارزانی ئامادەنەبی ڤێ بکت د حوکمرانیکرنا خوە دا وەکو سەرۆکێ حکومەتێ.