سەرنووچە:

شنگال و گوتن، دانە ب کرێ یان هاتە فروتن؟

8/3/2020 4:56:37 PM
1937 جار خوێندراوەتەوە
خەتاب عومەر
+ -

شەش سال کۆ تەمەنێ زاروکەکێ یە دشێت باخڤیت تێبگەھیت و بابەتان ب باشی ببینیت، شەش سالێن کارەساتا گەلێ مە ل شنگالێ نەکەسێ ل وێرێ خودان و رێڤەبەر و نە کەسێ ب تمامی تێگەھشتی و نە کەسێ ب باشی دیتی بەحس کر ؟ ئێدی بێ دەنگی و خوە تێنەگەھاندنێ و خوە کورەکرنێ گەلەک پەیامێن زێدەتر گەھاندن.
ئەم تێگەھشتن بەرپرس و رێڤەبەرێن مە ھندی ئەو خوە مەزن دبینن ھند بچویکن و ھندی ئەو خوە تێگەھشتی دبینن ھند نەزانن و ھندی ئەو دبینن ھند بێ چاڤ و روینە، ئێدی دڤێت بھێتە رونکرن:
شنگال ھاتە رادەستکرن یان ژی ھاتە داگیرکرن ؟

داگیرکرن ب رامانا شەر و خوەگوریکرنێ دھێت ھەتا کۆ لایەنێ بەرامبەر ب زوری ژێ دستینیت و رادەستکرن ب رامانا بەردان و رادەستکرنا وژدان و ناموسێ دھێت ئەگەر کۆ ناموس ژی ھاتە رادەستکرن ئێدی ھیچ پیروزیەک نینە مروڤ و بمینتە ساخ ناموس ژی ب رامانا ئاخ و نیشتیمان و وژدان و مروڤایەتی ، ئێدی رونە مرنێ خەلکێ سڤێل سێ ھندی شەرکەران نیشانا رادەستکرنێ یە زێدەتر ژ داگیرکرنێ.
شنگالی زێدەبون ؟ یان ژی کالەکێ باش بوون بو مامەلێ ؟

ستراتیجیەتا نەھێلانا ھیلالا شیعی و پورژێ سینی و یاریێن ناڤدەولەتی ل لایەکی و بازرگانیا پشتی رادەستکرنێ ژی ل لایەکێ دی، گریمان بەرپرسێن مە د ناڤ ھاوکێشەیا ناڤدەولەتی دا نەشاینە خوە بکەنە تشت و بەردەوام کار ل سەر چنەبوونا خوە و مە دکەن ؟ ئەرێ ستراتیجیەتێن مەزن کار ب ئاخ و سنورێن جوگرافی ھەیە یان ژی ھەتکبرنا کارەمەتا مروڤی تە لسەر ئاخا تە و ب دەستێن تە ؟ د ھەمی سیستەمێن دونیایێ دا دڤێت لەشکەر یان ژی سەرباز بمرن داکۆ خەلکێ سڤیل ساخ بمینن دانە کوشتن و رادەستکرنا خەلکێ سڤیل و مانە ساخا سەربازان چ شەرمەزاریەکە مێژوو دنڤێسیت؟

شنگالی و زووماری و کەرکوکی و مەخمموری و ..ھتد، ئەڤە د چاڤێ دەستھەلاتا کوردی دا ھەنە یان ئامادەکرینە ھەمی گاڤەکێ بو قوربانیکرنێ ؟

ئەو کوردێن د سنورێ مادێ ١٤٠ێ دا ئەوێن ل عێراقێ کورد و ل کوردستانێ عێراقی؟ دیارە کۆ تا چ دەم دێ خالێن خوە دەرێخستن و مزایەکرنێ بن ، دڤێت بپرسین ئەوێن بۆ قوربانیکرنێ دروست مانە دڤێت ساخلەم بن ، ئەرێ چەند جاران گوھێن ڤان دەڤەران ھاتینە بڕین ؟ ئەرێ چەند جاران ددانێن ڤان دەڤەران ب خەلکڤە ھاتینە دەرێخستن و شکەستیننە؟ ئەرێ ئەڤە چەندین سالە ئەو نساخێن یاریێن ھەوەێن گەمارن ؟ ما ئەڤە دێ چاوا بو قوربانیکرنێ ھەر و ھەر باجێ دەن؟ باجدانا وان ژ بەری داعش ئەو ھزرکرنا داعشانە یان وان کەسانە بوویە لسەر خەلکێ ڤان دەڤەران کۆ بەردەوام د مەیدانێن یاریێن سیاسیدا وەکۆ کالەکێ باش دھاتنە بەحسکرن ھەتا کۆ خرابترین بکڕ لێ دەرکەفتی و ب کێمترین بھا و بەرھەنگاری شیایی ببەت و بدەت.
لیژنەیێن ھاتینە پێک ئینان گەھشتنە چێ و کێ و بوکێ و بۆ چێ ؟

د گەرما بازاریدا و پشتی ئاخ و نیشتیمان و ئالا و مروڤێ کورد ب کێمترین بھا کەتینە مەیدانکێ ؟ ئێدی بەشا مروڤ و ئاخ ونیشتیمانێ مای ژی کەفتە بەر ب کرێدان و بازرگانیەکا نەتمامکری و چەندین قوربانیێن بازرگانیێ و پیرەیی ژی ھاتنە دان ئێدی ب روونی ژنێن خوە خویشکێن خوە ژ بکڕێن وە دکرین و دفروتن ؟ ئەوان کەرامەتا مە بربوو و بەرپرسێن مەژی بۆ قەلاندنا کەرامەتا مە نەفت و کارەب ددایێ ؟ لیژنە ھاتە پێک ئینان ئەوێ لیژنێ کارەسات تومارکرن دبیت ئاشکەراکرنا خالێن ئەو لیژنە گەھشتیێ بچویکترین پلەدار ب مەزنترین بازرگان دیار بکەت، لیژنە و ئەنجامێن وێ وەکی خەلکێ سڤیل ب ساخی ھاتنە بن ئاخکرن و ئاخەک کۆ ھەتا دمریت دێ باجا ژ دەستدانا کەرامەتا خوە دەت ژ دەست فروشیار و کێم بھایێن بەرپرس لێ و مێژوو دێ ئانجامێن لیژنێ باش دیارکەت و سزا ژی دێ باشتر ژ نوکە ھێتە وەرگرتن.

شنگال و کەرکوک و دەڤەرێن دی ھاتنە ئازادکرن یان ھاتنە رزگارکرن یان ھاتنە رادەستکرن ؟

ئازادکرن ب خوە بو تشتەکی دھێت کۆ مروڤی بخوە تشتەک گرتبیت دشێت ئازادکەت نە ئێکێ دی ئەگەر ئازادکرن ب راست دبینن کەواتە ھەر وان گرتبوو ؟ رزگارکرن ژی بۆ کارەکی دھێتە کۆ ژ دەست ھاتبیتە دەرێخستن و مروڤ بچیت رزگار کەت ئێدی ئەڤێ ژی رامانا خوە نینە دەست نەھاتیە دەرێخستن تا بھێتە رزگارکرن چونکی سفرا حازر بۆ برنێ رزگارکرن بۆ نەڤێت، یا دمینیت رادەستکرنە کۆ ب جوانی و خشکوکی چاوا برن وەسا رادەست بکەنەڤە دڤێت باش د ڤێ بگەھین و ئێدی قوناغێن ژیانێ باشتر رێک بێخین و تێبگەھین ئەم وەک تاک خوە پارێێن چ جورە بیرکرن و سیسەتمەدارانە.

ئاوارە بوون و تیرورا ھزری و دەروونی خەلکێ مە ل وان دەڤەران؟

پشتی ئاوارەبوونێ و جینوسایدکرن و کومەلکوژکرنا خێزان و تاکێن بنەمالێن خەلکێ مە ئێدی دەست ب جینوسایدا ھزر و دەروونی یا وان ژی ھاتە کرن، روونە کۆ بێژن مە ھاریکاری کر و دمالێن خوەدا حەواندن ئەڤە بۆ من ئەرکە و ئەرک ژی کۆ دھێتە بەحسکرن مروڤ پێ بچیک دبیت، پشتی نیشتیمانێ وان بوویە خێڤەتەکا ھاریکارێن بکەران ئێدی دناڤا وان خێڤەتان دا ژی دەست ب تیرورکرنا دەرونێ وان ھاتە کرن نابیت باخڤن ئەوا دیتین ئەوا زانین دڤێت بھێتە ژێبرن و ئەوا کۆ دێ زانن ژی دڤێت خوە تێنەگەھینن ئێدی ژ بلی کۆ باژار و ئاخ و کەرامەت چوون دەمە دەست ب نەھێلانا دەرونێ وان ژی بھێتە کرن، ئەنجام بۆ  زورینە بچنە دەرڤە و ل وان وەلاتان باخڤن و یا دروست بێژن و رویێ دەستھەلاتدارێن ڤی وەلاتی وەکو رەش رەشتر بکەن ئێدی شەرم ژی دەما کۆ زێدە ھەناسە تەنگ دبیت شەرم شەرمێ ژخوە دکەت کۆ یان خوینا مە و ڤان ئێکە یان ناڤێ مە دگەل ئێک دھێت ئەڤێن کو د راستیدا بازرگان و د درەوێ دا دەستھەلاتدار. 
میدیا کوردی و کارەساتێن مروڤی؟

بخوە دیارە میدیا کوردی ھەر د چارچوڤێ عەقلێ کوردی دا دەرنەکەفتی یە و نە کەس زمانێ مە دزانیت و نە مە شیایە کەسێ د زمانێ خوە بگەھینین یان ژی ب زمانێ وان بەحس ل ژیانا خوە بکەن ، زێدەتر میدیا ھاریکار بوون لسەر ھەرفاندنا کەرامەتا تاکێ کوردستانی ب شێوەیەکی کۆ زانیاریێن راستێن پشت ھەمی مایک و کامیرەکێ بەرژەوەندیەکا سیاسی گەنی ل پشت بوو کو تنێ چاڤ ل خودانێ خوە کربوو.
گرنگە چ بکەین و چاوا یا مای ژ دەست نەدەین ؟

جینوسایدا گەلێ مە جارا یەکەمین نینە ئێزدی برایێت مە نینن د گەل و نیشتیمانی دا ئەم ئێکین دبیت براینیا مەیا ئاینی بیت کۆ ئەڤەژی نە کێشەیە، دا سیاسەتێ ژ کەرامەتا تاکێن خوە بینینە دەر و خوە نیشا جیھانێ بدەین ئەم ژی مروڤین وەکی ھەوە دبیت دەمێ بوریدا دەستھەلاتدارێن مە کرین و فروتن ب مە کربیت لێ ئەو ژ بچیکیا وان ئەم وان ب بازرگان دزانین نە رێبەر، ئەڤێن کۆ ئەم وەسا ژی دبینین دڤێت ب راستگویانە دان ب بازرگانیا خوە بکەن و ئێدی دەست ژ تیرورا دەروونی یا ڤی گەلی بەردەن بەرژەوەندیێن گەنیێن سیاسی و حزبیێن وان سەرێ وان بخون و کەرامەتا تاکێ کوردستانی یان دەست ژێ بەردەن یان ئەوا مای دەست تێ ڤەنەدەن، ئێدی ئەوا وە بری و بەردای و فروتی و دایە کرێ مێژوویێ دروست یا نڤێسایی ھوون ھەر پەرتوکێن چاپخانێن خوە چاپ کەن روژا سوتنا وان پەرتوکا دێ ھێت باشترە ئێدی یاریا ب کەرامەتا نیشتیمان و ھاولاتیێن خوە نەکەن ئەگەر روژ بھێت نە کەرامەتا ھەوە نەیا زارو روھو ریشاێن ھەوە بەرچاڤ دھێتە وەرگرتن