سەرنووچە:

قوربانی دانا کەسانێن داخازکەرێن مافێن مە وەکى مسریان لێ نەکەین

5/20/2019 1:45:34 PM
2893 جار خوێندراوەتەوە
هەڤال ئیبراهیم
+ -

وەک ھەمی خویندەڤانێ ئاسایی دزانیتن کوردستان(میزوبوتامیا) دلێ روژھەلاتا ناڤینە، وەکی چاوان روژھەلاتا ناڤین دلێ جیھانێیە! پێکھاتەیێ گەلێ کوردستان، کو کورد بەشێ وان یێ بنیاتیە، ڤی گەلی رول و دیرۆک و شارستانیەت و کولتورێ خوەیێ زەنگین و ھەری تژی باندورەکێ ساخ و چالاک ھەیە، ئەگەر تەماشایی دیرۆکێ و رویدانێن وێ بکەین، چ ل دێروکا گەڤنار یان ل دێروکا ناڤەند و نویدا ژی، ھویر تەماشا بکەین، ئەڤ وەلاتە(کوردستان) و ئەڤ گەلە و بنەخاسمەیی، گەلێ مەیی کورد، توشی ھێرش و بیڤەلەرزێن مەزن و ھەوێن قرکرنێ و ژناڤبرنێ بوینە، وەلات برەنگەکێ دراماتیکی و جەرگبر کەڤتیە ناڤا ھەوێن داگیرکاریێ، گەل کەڤتیە بن ھێرشێن قرکرنێ و ژناڤبرنێ و ژێبرنەکا نەژادپەرستیا زور گران و جەرگ ھەژین... لێ دناڤا ڤان ھەمی نەڤیانی و دوژمنکاریێن مەزندا، کوردستانێ، کوردستانیبونا خوە پاراستیە، گەلێ کوردستان و کوردی دیسان ھەبوون و نەژادێ خوە پاراستییە، بزەحمەتی و رەنج و تێکوشینەکا دژوار ژیان کریە و پێکڤەژیان بھەبونەکا خوەزایێ خوە کوک و بنیات ئەزلەیەتا خوە، وەکی بەرخوەدانەکا نیشتیمانی و مروڤایەتی، بھیڤیا ھەبونەکا بجەسارەت خەبات و تێکوشانا خوە بەردەوامی دایێ و ل سەر ریا خوە بەردەوام دمەشەکا دژواردا دچن و دەربازی کەنارێ رزگاریێ دبن، ئەڤروکە ژی ژ کەرەما وێ خەبات و تێکوشانا کولاتیا سالان، بسایێ سەرێ وێ شھادەت و وان قوربانیێن ھاتینە دانێ، ئێدی ھەستا ھندێ بنەجھبویە کورد و گەلێن کوردستانی، کوردستان و ئاخا میزوبوتامیا خەریکە ناڤ و نەخشەیێ خوەیێ بنەجھی وەربگریتن و جھبگریتن دناڤا ناڤ و نەخشەیێن جیھانا ھەیی دا، بونا تێگەھشتن و شروڤەکاریێن خوە، ل گورەی دیتن و بویەرێن ھەیی رونتر و بەرچاڤترێ بێخینە بەردەستێ خاندەڤا و خەلکێ خویێ ھێژا و خەباتگێر و خەمخور، ئەم دێ ھندەک دیتن و بەرچاڤکرنێن زێدەترێ ل خارێ وەکی سەرە خال ئێخینە بەرچاڤ و بن دەستێ خاندەڤانێ گراڤی، بمەرەم و مەقسەدێن بجھکرنا ئەرکەکێ نیشتیمانی و بروحەکا مروڤ پەروەری، دخزین یێن شارەزا و یێن پسپور بابەتی زێدەتر زەنگین و پر ئالی بکەن و شروڤەکاری و خاندنێن خوە بئاوایەکی زانستی بدەنە خویا کرن.

 ل باشور کولانیایەکا میراتگری یان بنیاتێ دەستھەلاتەکا خومالی ئاڤەدانی دبیتن ....!!

سەردەمێ زێرینێ گەلێ کوردستان لباشور ل پاش سەرھەلدانا سالا١٩٩١ز دەست پێ دکەتن، ل سالا١٩٩٢ز و بسەردا دەستھەلاتەکا بناڤ پەرلەمانی ھەلبژارتی ل ھەرێمێ دھێتن پەیادەکرن، سەرەرایی وان ھەمی شەروشور و ناکوکی و پێکدادانێن ھەیی، لێ خوبرێڤەبەریەکا خوبخویی ل ھەرێمێ(پارێزگەھێن دھوک، ھەولێر، سلێمانی)، ببەردەوامی ھەبون و رێڤەبەریێن خوەبخویی ھەبوینە و بئیرادە و ئیدارەدانەکا کوردی و کوردستانی(ژبلی کێم و کاسیێن ھەی)، بەردەوام بوینە تاکو روژا ئەڤروکە، نوکە ژی و ل پاش ئەنجامدانا گەرا پێنجێ یا ھەلبژارتنێن پەرلەمانتویێ ھەرێمی، خەریکە زێدەی(٨)ھەشت مەھان دەرباز دبن، لێ ھێشتا سەروسیمایێن کابینەیا نوی ئاشکرا و بەلی نەبوینە، نەوەی نوێ برەنگەکی ژ رەنگا ئوپەزیسیون بونا خوە راگەھاندیە، یەکگرتووی ئیسلامی ژ بلی ئوپوزیسیون بونا خوە راگەھاندیە، لێ برەنگەکی ژ رەنگا ناڤدەستی و ژێربەژێریێ بو پارتی و ینک دکەتن، بوێ مەرەمێ ژ ئالەکی شکەستنا خوە ساخ بکەتن و ژئالیێ دی، ژێر بەژێر پاخلێن خوە داگریتن و سولتانێ ئاق پارتی ژ خوە رازی بکەتن...کومەلا ئیسلامی، بزاڤا ئیسلامی، حزبا شویعیا کوردستنی...ھندەک ئالی و کەسایەتیێن دی، ل ناڤبەرا حانە ومانە، مانە ھەلاویستی و تاما دەڤێ خوە خوش دکەن، بو شاباشەکێ چەور و شرین...بزاڤا گوران ژی ھەرچەندە بفەرمی شکەستنا خوە رانەگەھاندیە( ١٢ کورسیک، دزھنیەتا واندا ھەر ٢٤ کورسیکن)، لێ دوارێ کریاری دا، شکەستنا خوە پەژراندیە، شاباشەکا باش وەرگرتیە و پارتی ب برا مەزنێ خوە قەبیل کریە، ژ بلی ھێرڤە و وێڤە، بەحسا وێ ناکەین...لێ ئەوا ئەم دکارین بئاشکرایی رونڤەکرنێ بدەینێ، شەرێ دەستھەلاتێ نوکە کەڤتیە ناڤبەرا پارتی و ینک( ئەو دوھێزێن ژ سەرڤە برا و ژ بنڤە دوژمن، ھەڤگورێن بەندوپەیمانا بناڤ ستراتیژیک....)، ھەرچەندە رەھەندێن ڤی شەری، دێروکەکا تراژیدی ھەیە، قولایەکا فکری و دەرئەنجامەکێ مشتی سەرنشیڤی و سەر ئەڤرازی ھەیە...لێ لپاش مالئاڤاھیا رێبەرێ روحیێ ینک( نەمر مام جەلال تالەبانی)، خەریکە روحەکا نوی لناڤ رێزێن یەکێتی نیشتیمانی ئاڤادبیتن و سەرھەلددەتن، سەخمەراتی وان جوداکاری و دابران و ژێک چونێن بویی، چ ژ جودابونا بزاڤا گوران و ھاوپەیمانی یان ھندەک کەسایەتیێن دی...لێ ڤەگەر و سەرژنوی بینا کرنا(ینک) خەریکە ببیتن ئاڤاھیەک و بەروبیاڤەکێ خورت تر و رێک و پێک ترێ، نەخاسم پشتی بەرێز سەرکومار(دکتور بەرھەم سالح) ڤەگەریایی ناڤا پارتیا خوە، گەلەک ھاودید و کەسایەتیێن دی یێن رەسەن و نیشتیمان پەروەر ژی خەریکە بگەھنە ناڤا رێزێن(ینک) و سەرژنوی پەرەپێدان و نویژەنکرنەکا باشترێ و گەشترێ بدەنە ناڤا رێزێن ئێکەتیا مام جلال و ھەڤالێن وی یێن دامەزرێنەر( ناوشێروان، عادل مراد، فوئاد مەعسوم، عەبدالرزاق فەیلی، عومەر شێخ موس، ھەڤالێن دی..).

ئەوا راستی بیتن ل دوماھیک ھەلبژارتنێن عێراقێ و ھەرێمێ، سەختەکاریەکا زور ھاتە کرن، سەرەرایی پەسند کرنا بەرئەنجامێن دوماھیکێ، لێ سیبەر و رەھەندێن وان حیلە و سەختەکاریێن ھاتینە کرن، نەھاتن نخافتن و زیق ل سەر پێلێن دەریایی خو دھەلاڤێتن و سەر ئاڤ دکەڤن، ئەڤێ چەندێ دئالیەکی دا برینەک کویر پەیدا کر و دئالیەکێ دی دا بێ متمانیەکا مەزن پەیدا کر، ئەڤ بێ متمانیە زێدەتر زەق دیار بو، ل دەمێ لایێ سەرکەڤتی(پارتی دیموکرتی کوردستان)، خو دسەردا بری و کەڤتیە ناڤ ھەول و بزاڤێن جدی تاکو ھەمی پوستێن بەغدایێ بو خوە وەربگریتن و لایێن دی پشت گوھڤە پاڤێژیتن، نەخاسم یەکێتی نیشتیمانی، ئەڤ ھەول و بزاڤە ژ بلی بێ متمانەیی کویر کرن، سەر ژ نوی ھەڤرکی و ئازرندنا برینا سەر لێ ھەودا و پیلانگێریێن ناڤخویی بنیات بو ھاتنە دارێتن، لەومانێ ئەڤ قوناغە دبیتن ببیتن سەرەتایەکا قوناغەکا نوی، لێ بنەمایک و رێگەچارەسەریێن گونجایی و زانستی ناھێنە دیتن...بویە خەریکە مەترسی زێدەتر و مشتی پێترین نەھامەتی و رەش بینی ببن، چونکی عێراق بگشتی و ھەرێم بتایبەتی ل بن تاقیکرنەکا زور مەترسیدار دەرباز دبیتن، کومکرنا ھێزێن ناڤدەولەتی و زەبلاح، لێکدان و پێکنەکرنا بەرژەوەندیێن ئەمنی و ئابوری و جیواری...ھەردیسان ھەرەشەیێن شەرەکێ کاڤل کەر و تژی مالوێرانی نەدویر ل دەڤەرێ بقەومیتن، زیان و زەرەرێن کوردستیان نەدویرە دوو ھندە و سێ ھندە بن.

نوکە راستە، ھندەک ژ سەروسیمایێن دەستھەلاتێ خەریکە دیار و ئاشکرا بوینە، ل ١٠/٦/٢٠١٩ز، رێورەسمێن سەروکێ ھەرێمێ دێ ل ھولا سەعد عبداللە(نە ل ھولا پەرلەمانی) برێڤە چن، نێچیرڤان بارزانی دێ بیتن سەروکێ ھەرێمێ، مەسرور بارزانی دێ ھێتن راسپاردن داکابینا نویا حکومەتێ دروست بکەتن، لێ تاکو نوکە ھێزێن سەرەکی و شریکێن ستراتیژی و خودان ھێز و ئەزمون(بئاوایێ تایبەتێ خوە)، نەگەھشتینە چ ئەنجامێن دوماھیکێ، لەومانێ گەرەنتی کرنا رەوتێ دەستھەلاتێ و ئاڤاکرنا کابینا نوی، بێی(ینک) نەھەر حکومەتەکا کێم و شاشە، بەلکی دەستپێکەکە و سەرەداڤەکە بو بژارەدە و داھوریان و ژێگرتەیێن دی و تژی خەتەر و مەترسی، نەبتنێ بو کابینا نوی، بەلکی بو گەلێن کوردستانی و بو ھەمی دەڤەرێ، چونکی ھەرێما باشور بھەمی ئالیان ڤە خویکەکا گران دایە، چ خویکا ھێزێن ناڤخویی یان ژی خویکا ھێزێن دەرەکی و ناڤنەتەوەیی، دبیتن زێدەترێ بەرگریا خویک و سەرانەیێن گرانترێ نەکەتن...بویە بئاشکرایی دشێین بێژین، رەوشا نوکە جھێ دل خوشیێ نینە...دئالیەکی دا وەلات و گەل لبن مەترسیێن ناڤدەولەتی و ھەریمینە، دئالیێ سیان دا، دەستھەلاتدارێن ھەرێمێ مژویلی شەخێەنەکرن و کویرکرنا ئێش و ژانێن گەلێن خوەنە و بھیچ رەنگەکی داگەریانان بو ئێک دوو ناکەن، بو ھێزێن ناڤدەولەتی، بو دوژمن و دەولەتێن ھەرێمی خەریکە ببن مالویتە و لیسێن وان بو خوەش بکەن، نەخشەسازیان ل گورەی بژادە و خاستەکێن وانان دکەن...بو خوە ژی، بو گەل و بو وەلاتێ خوە ژی خەریکە ببن دەرد و کولە سەری....سەد سالێن خەباتا خویا سیاسی، حەفتێ سالێن خەباتا چەکداری، ئەنفال و کیمیاباران، رەشە کوژی و گرتن و مال وێرانی، ھندا کرن و بەرزەکرن، تەعریب و تەتریک و تەفریسێن ھاتین کرن...خەریکە بھێن ژبیر کرن و بھەدەر بچن، کوریسک ببیتن میراتگری، پوست و پارە ببن ئارمانج و بەرنامە، بویە ھەردچیتن، دەم دچیتن و ھیڤی دھێنە ھندا کرن، بویە دبێژین و گوتنەکا راستە ژی، ھەردەم کورد شەرکەرەکێ باشە، ل شەرا نەشکەستیە، لێ دسیاسەتێ دا، ل سەر مێزان یاریکەرەکێ دورا و شکەستیە.

 ژ شورەشگێریا سەرێ چیا ن بو سیاسەتا  کورسیک و پشتا مێزان

راستە کوردستان دناڤا دوخەکێ نالەبارێ ناڤنەتەوەیی دا توشی دابەشبوون و ژێکڤەبونێ بو، شەرێ چالدیران(١٥١٤ز)و کومەکا پەیمانێن ناڤدەولەتی و پاشی ژ بەرئەنجامێ شەرێ جیھانیێ(١،٢)وێ دا، ئەو بو لوزان جارەکا دی دوو چارچە کرنە چار پارچە، لێ دڤێتن ئەم وێ ژی بێژین، دەرفەتێن زور مەزن ژی بو گەلێ کورد و بو خەلکێ کوردستانێ ھاتن، ئەگەر ئەو دەرفەت ھاتبانە وەرگرتن، گەلێ کورد، خەلکێ کوردستانێ ل گورەی کاودانێ وی دەمی خوە رێک خستبایە، دبو گەلێ کورد دەولەتا خوە ل سالا١٩١٦ز دا دامەزراندبا، ھەردیسان ئەگەر گەلێ ئەرمەن و گەلێ کورد پەیمانەکا خوەیا مجد ھەبایە، نەکەڤتبانە ناڤا پلانێن نەیاران...دیسان دبو ل سالا١٩١٨ز و بسەردە، ببانە خودان دەولەتا خوەیا ھەڤپشک ل سەر ئاخا(میزوبوتامیا و ئاخا ئەرمنستانێ)، لێ مخابن، گەلێ ئەرمن و گەلێ کوردی، ھەڤرێزیا خوە دروست نەکرن و مانە بدویڤ پلانێن نەیاران ڤە، بون عەبدالێن چ نەکرنا ھەڤدوو، بویە ڤان گەلا دەرفەت ژ دەست چوون و بونە قوربانیێن سەرھشکیا خوە، بونە قوربانیێن دێروک و بەرژەوەندیێن گەلێن ھەرێمی و دونیایێ، تاکو نوکە ژی ئەو تەحلی و کارەساتێن وان دمێژن و دبنە  گوریێن پشکا ھەریی مەزن بو خەلەتیێن وی سەردەمی ، لێ ئەوا جھێ داخێ و برینا مەزن دجەستەیێ کورد و کوردستانیان، پرانیا ھێز و تەڤگەرێن سیاسیێن کورد و کوردستانی ل ڤێ سەدسالیا نوکە، خوەزایێ کورد و کوردستانێ نینن، لبن ھەژموون و کارتێکرنێن ناڤدەولەتی و ھەرێمی، نە بتنێ دئالیێ سیاسیی دا، بەلکی دئالیێ لەشکەری و رێڤەبەری ژی دا، لبن ھەژمونێ دوژمنێن ھەرێمی و ناڤدەولەتی دا ئاڤابونە و برێڤە دچن، دوژمنێن مە، نەخاسم ل باشور چاوان ھێز و تەڤگەرێن مە ئاڤاکرنە، ھەر وەسان برێڤەدبەن و ل گورەی بەرژەوەندیێن خوە دیزاین کرنە، لەومانێ ھەردەم ئالیێ ھەرێمی و ناڤنەتەوەیی دھێتن پشت گوھھاڤێتن و ئالیێ ناڤخویی، ناکوکی و جرەبرا ناڤخویی، خوتیژ کرن و بەربونا گیانێ ئێک دوو کریە بەراھی و سەرپشک کریە، ھەر ئەڤە ئەگەرێ وێ چەندێ شکەستی، خو شکەستی نەبینیتن و شکەستنا خوە ژی بکەتن بەھرا خەلکێ دی، خو بکەتن پالەوان و سەرکەڤتی، بویە ھەر دەە پازدەسالان شکەستنەک ببەر مە دکەڤیتن و شکەستی ھەر بەراھیکێ کاروانیە، نەناڤ و نە ژی ناڤەروکا شورەشێن مە دھێتن گورین و دورانێن مەژی نابن دوران و مروڤێن دورایی ل پێشیا مە دچن و ئەم ژی خاس و عام دکەڤینە دویڤ پێن وانان.

ل ڤێرە پسیارەکا جدی دھێتن پێش، ئەرێ گەلا چ ئەگەرن بوری و کارەساتێن مە زوی ژ بیرا مە دبەن!!
لڤان سەد سالێن بوری(لباشور)، گەلەک ھێز و حەرەکە دروست بون( کومەلا لاوێن کورد، کومەلا دارکەر، جزبا ھیوا، شورەش، ئازادی، جزبا دیموکرات، ینک، سوشیالست، کومەلە، پاسوک، ستێرکا سور، تێکوشین...گەلەک پارت و کومەلێن دی)، دئالیێ حەرەکی ژی دا(حەرەکاتێن شێخ مەحمودێ نەمر، حەرەکاتێن بازان، شورەشا ئەیلولێ، شورەشا گولان، سەرھەلدانا جەماوەری ل سالا١٩٩١ز، پەرلەمان و حکومەتا ھەرێمێ...)، لێ دیسان دەرفەت نەھاتن وەرگرتن، سالا ١٩٩١ و ٢٠٠٣ دیسان دوو ھەلێن دێروکی بو گەلێ مە ھاتن، لێ دیسان ئەڤ ھەلە نەھاتن وەرگرتن و قوناغا خەباتا مە دژوار و پر ئاستەنگی کر، بو دەمەکێ دی کێشەیا مە پاش ئێخست....ئەو ھەول و بزاڤێن بناڤێ دەولەتداریێ و ریفراندوما سەرخوەبونێ ژی، مەرەم و پالدەرێن دی ل پشت بوون، ھەردیسانێ ھیچ ئامادەسازیەکا زانستی و ژیواری بو نەھاتبونە کرن، بویە کێشە زێدەتر ئالوز و ئاسێ کر و ھێز دا نەیاران و دوست ھاتنە تورە و زویر کرن، بەرئەنجامی ژی، ژبلی(٩١%)ئاخا کوردستانێ ھاتە ژ دەست دانێ، پلانێن دوژمنکاریێ ھاتنە کویر کرن، ھەستا نەتەوەیی و باوەری بخوەبون دیسان ھاتە ھندا کرن، کێشا وەلاتەکێ دێرین و گەلەکێ رەسەن و مەغدور دیسان ھاتە پشت گوھھاڤێتن و کێشە ژی ھاتە سڤک کرن و کێم کرن، ژ بلی کوکا نەیارتیێ ھاتە زێدەکرن و نەیارێن مە، نەخاسم یێن ھەرێمی ل سەر ئێک مێز ھاتنە خرڤەکرن.

بەرئەنجامێ ھەری ل پێشیێ، ڤێ سیاسەتا باشوری، ھەمی ئەو حزب و سیاسەتا ھاتیەکرن، ھەمی بزاڤ و حەرەکاتێن ھاتینە برێڤەبرن، بەرئەنجامەکێ باش وەرنەگرتن، بونە ئەگەرێ ژ دەستدانا پشکا ھەری مەزنا ئاخا کوردستانێ، گەل دەربەردەر بو، ژ سەر ئاخا خوە مھاجر بو و بو غەریبە، کوشت و کوشتار پەیدا بوون، ئەنفال و کیمابان ھاتنە ئەنجامدانێ، دەربەری و بەرزەبونێن مەزن دروست بون، کول و دەردو کوڤان لناڤ خەلکی مشەبوون، ھەزارەھا ئێش و ژان بەربونە ستوکورا گەلی، ژبلی وێ چ گوھورین کاری پەیدا نەبوون، پەرێ برێکا بەرێ...سەرکردە ھەریێن بەرێ بوون، حزب و رەھبەر ھەرئێن بەرێ بوون، رێک و رێگەچارەسەری ژی ھەریێن بەرێ بوون...بویە نەچارەسەری و بێ رێبەری بوونە رێک و شوپ و ھندابون بونە سەمیان و سەروەری، لەومانێ بوری زوی ھند ابو! ئێش و ئەلەم بێ دەرمان مان! بویە چارەیا بێ چارەسەریێ لباشور بویە ئێشەکا بڤەگر و ھەردەم بودەمی ھەو ددەتن و ناخێ مە دھەژینیتن و برینێن مە یێن کول کیسەگرتی دکەتن و سەر ژنوی وەبایا مە سەر ھەودەەتن.

لەومانێ ل ڤێرە بێ ناڤبر دبێژم! چاوان ھەوێن ھەلبژارتنێن مە وەکی تلیلی و گەرێن شەھیان و داوەتانە، پەرلەمان و حکومەتێن مەژی وەکی زاڤا و بویک و بەربویکانە، رێورەسمێن داناندنا سەروک و رێڤەبەرێن مەژی چەپرەپانێ و دەست قوتان و خوھەلاڤێتن و پێ گوتن، دویری بنەمایکێن زانستی، دویری عورف و عاداتان، دویری رێسا و یاسایان، ئەرێ گەلا ھەرێمەک وەکی باشور بقادێ دەولەتەکا مەزن و خودان سەروەری قوربانی داین...چ ئەگەر ھەبوینە ئەڤە زێدەی(٢٨)بیست و ھەشت سالایە نەبویە خودان یاسا، بێ عورف و بێ بنەما دھێتن سەردەری کرن، شەخێ و مالبات دزێھن و ئەقلێ خوەیێ مالباتی دا دھێتن بەرنامە دکەن و برێڤەبرن، براستی سەیرە و سەیر و سەمەرێن جەرگ ھەژینە! چاوان ل دەڤەرەکا ھوسان، گەلەک ملیونی، خودان ئاخ، خودان زمان، خودان دێروک و کەلتور، خودان ئابور و بوری، خودان دیانەت و خودان ھزروبیر! چاون دبیتن دچاخێ(٢١)بیست و ئێکێ دا! چاخێ ئەلەکترون و پێشکەڤتنێ! ئەڤ ھەمی پاشکەڤتن و ھندا کرنە، بوچی بەروکا مە بەرنادەن! براستی ھەم بێ خودانی ھەیە و ھەم ژی ھندا کرن ھەیە!

ھەر ئەڤێن ھەبوینە! حزب و حەرەکەت و سیاسەتا باشوری چنەکریە و سەنگ و بھایێن باشوریان بێ رەواج کرینە و ئێشا ھندا کرن و ژبیر کرنێ بویە موبتەلا بو رابردویێ مە، بو نوکەیا مە، بوداھاتێ مە! پسیارا دی یا ھەری جدی ئەوە گەلا ئەرێ ئەڤ ئێشا مەزن، ئەڤ بەرزەبونە تاکو کەنگی دێ دجەسەتیێ مە دا بەردەوام بیتن! تاکو کەنگی بەرزەبون دێ ھەستێن مە ژ مە دزیتن و لناڤا بەرزەکرنێ دا مە گیرو کەتن..!!

ئەم گەلەک بێ شانێین یان ژی بێ سەروەرین...!!

د دێروکا مەیا بوری دا، چاوان ئەم خودان حزب و حەرەکەت بوینە، ھەر وەسان ل گورەی زروف و سەردەمێ خوە، مە سەروک و رەھبەری ژی ھەبوینە، نە ل باشور بتنێ بەلکی ل ھەمی کوردستانێ، ل روژئاڤا ابراھیم ھەنانو، بنەمالا نەبیل بەری، بنەمالا جانپولا، بنەمالا بەرازی، دورزیان...بدەھان کەسایەتی و بنەمالکێن کوردی چ لناڤا دەستھەلاتا(سورێ، لبنان، ئوردنێ..) یان ژی لناڤا ئوپوزیسیونا وەلاتێ شامێ بگشتی دا، کەساتی و ھزرمەندێن مەزنێن کوردی رول و سەروەریا خوە ھەبویە، ھەردیسانێ لباکور، بنەمالا بەدرخانیان، یونس پاشایی، شێخێن پیران، سەید رەزا، تاھایێ شەمزدینی، شێخ عوبەیدولاھێ نەھری و بدەھان و بگرە بسەدان کەسایەتی و ناڤدارێن کوردی جھگرتیە دناڤا دەستھەلات و ئوپوزیسیونا باکور( ل تورکیا)دا، ھەردیسان گەلێ مەیێ روژھەلات ژی، بەھرەیەکێ زور مەزن دفکر و رامانێن دەستھەلاتداری و ئوپوزیسیونا گەلێن ئیرانی ژی دا ھەبویە، نەخاسم کەریمخانێ زەند، سمکویێ شکاک، قازی مەحەمەد، شێخ عوزەدین حوسەینی، رێبەر قاسملو، شەرف کەندی و بدەھان رێبەر و سەرکردێن دی...ھەر بوی ئاوایی و نەخاسم ل ڤێ دوماھیکێ، گەلەک سەرکردێن کوردێن باشوری باندورا خوە ھەبویە، وەکی شێخ مەحمودێ حەفید، شێخ بەھائودین، ابراھیم احمد، سالح یوسڤی، مەلا موستەفا وەکی رێبەرێ شورەشا ئەیلولێ، مەسعود بارزانی، مام جەلال تالەبانی و ناوشێروان مستەفا،  وەکی دوو رێبەرێن نویخاز و ھەڤچەپەر، گەلەک کەسایەتیێن دی...لێ ئەو ژی راستە ڤان ھەمی کەسایەتیان نەکاریە رێکەک و رێبەریەکا بقادی  خەبات و قوربانیێن گەلێن کوردستانی، بفکر و رامانەکا خوسەر و برێک و بنەکوکیەکا پرانیا ھەری زورا ڤان حزب و حەرەکە و سەروەری و رێبەریێن ھەی، مژارێن رەخنەیێن زورن و لبن بارانا گازندەیێن گەل و خەلکێ کوردستانێ گوھشی و مات و دامایی ماینە و دمینن و دفەتسن...بویە ڤی وەلاتی، ڤی گەلی رێبەری، سەروەری، رێگەچارەسەری بو دڤێن....!!

 عبدولا ئوجەلان و نمونەیا رێبەری و سەروەریا کوردستانی...!!

عبدولا ئوجەلان(ئاپو)، ئەو زاروکێ ژ بەدەنا دەیکەکا تورک و بابەکێ کورد ل گوندێ ئەمرالی ژدایک بویی، دناڤا شەرەنیخا دەستھەلاتەکا تورک تورانی و رەگەز پەرستی دا، ژیانا ھەژاری و زەحمەتیاندا ئافراندن کرین، بفەلسەفەیەکا نمونەیی خویانی بینا کری، زانست و دێروک کریە ڤەھاندنەکا ھزرا خومالی، دناڤا زیندانێ دا  تەڤگەرا ئاپوچی دگەل مەزلوم و عەگید و ھەڤچەپەرێن خودا رێک و رێگەچارەسەریەکا بنیاتی و دیموکراسی، شورەشگێری ل گورەی خوەسەریا شوپەکا دێروکی و شوناسی و زانستەوایی ئاڤەدانی کری، ژ باکوربو سەھلول بیقاع وبەرەڤ ئەوروپا و پاشی دکومپلویەکا شوم و لبن زولمەکا ناڤنەتەوەیی دا، بەرەڤ تورکیا و زیندان کرن دگرتیگەھا، گزرتا ئیمرالی دا، ئەڤ کەلە سەرکردێ کوردی، راستە زێدەی(٢٠)بیست سالایە لناڤا زیندانێ و لبن شەرت و مەرجێن گران ژیانا زیندانێ بسەر دبەتن، لێ ئەو رابەر و داھێنەرێ ھزروبیرەکا زانستی و فەلسەر و دامەزرێنەرێ پارتیکێیە بناڤێ(پارتیا کارکەرێن کوردستانی)، بئەو پەرێ زانابون و شارەزایەکا بلمەتییانە رێکەکا شورشگێری و بیروھزرەکا فەلسەفی و زانستی، ئەڤی ئینسانێ مەزن خەباتەکا شورەشگێری بداھێنانەکا نمونەیی و رێڤەبەریەکا پێشکەڤتی و خودان مقاوەمەکا گەریلایی و ئاخ پەرستی داھێنا و سەروەری لێ کر! فکر و رامانێن ڤی سەرکردەیی رێکخستنەکا سیاسی و چەکداری و بناڤ و ئەرناڤەکێ نویخاز و موکوم و تێکەلی ئاخ و خوینێن وەلاتپارێزی بجەستەیەکێ پیلایی ھاتە بینا و ئاڤا کرن، خورسکی و ئەێالەتا ڤێ رێبازێ ھەر جھێ کوردستان لێ، ھەر جھێ کوردستانی لێ ژیانێ دکەن، خەبات و رێک و تەڤنێ ڤێ رێکخستنێ لێ ھاتە راچاندن و رێبەری کرن( سەرەرایی کێم و کاسی و رەخنەیێن ھەیی، لێ ئەڤ حەرەکەیە بفکر و رامانێن خوە، بو حەرەکەکا کوردستانی و جیھانی و برەنگ و تەڤنێ چیایێن پیلایی تەڤن و نەخشەیێن خوە موکوم راچاندن..).

بھەول و بزاڤێن ڤی سەرکردێ مەزن، رێکخستنەکا جەستەیی و ھزری، دجەستەیێ کەسەکی و درێکخستنا رێکخستنەکێ دا، بو رێکخستەنەکا روحی و ژیانەوەیی بئافرین و خودانی، دناڤا کاکلا روحێ دا ھاتینە ئاڤاکرن، ئوجەلانیەت کریە ئاڤاھیەکێ ئەزەلی و بەردەوام دناڤا روحا مروڤاتیەکا پیروز و ئاخ پەرست دا، ھوسان ھەر تاکەکێ ڤێ رێکخستنێ بو ئاپوچیەک و بگرتنا بەرێز(عبدولائوجەلان) ئەڤ بزاڤە نەھاتە بەربەست کرن، بەلکی وەکی گورەبایەکێ روحی بەلاڤ بو، جھوار و تەڤگەرا خوە خورت و بنەجھی کرن، شورەشەکا سەرانسەری و وەکی پەیامەکا روحی و وەکی پەیمبەرەکێ زەمانێ ڤێ سەدێ، پەیام و رێکا وی ھاتن بەلاڤ کرن، بویە مروڤ نەحەق نینە بێژیتن ل پێنج سەد سالا بوری و ل سەدسالێن بھێن ژی، پەیامەک و رێبەرەیەکا بقادی زانست و فەلسەفەیا ڤی سەرکردێ مەزن نەھاتینە و ناھێن...لەو گرنگە کورد و کوردستانی خو دەینداری ڤی ئینسانێ مەزن ببینن و مروڤایەتی ژی سودمەند ببیتن ژ فکر و بھایێن فەلسەفە و زانستێ ڤی مروڤێ مەزن.

نوکە ژی ل ھەرچار پارچەیێن کوردستانێ، ل ھەر جھێ کورد و کوردستانی لێ دھێن دیتن، فکر و رامان و کارتێکرنا ڤی سەرکردەی دھێتن دیتن و بھیستن، لباکور ژبلی وێ زولم و زورداریا دەولەتا تورکی دکەتن، بئەوپەرێ دورندایەتی و نەژادپەرستیێ بەرھنگاری گەلێ کورد و گەلێن ئازادیخوازیێن تورکیا بویی...لێ خەبات و تێکوشانەکا مەزن دناڤا زەحمەتی و ئاستەنگیاندا، بەردەوام دپێشداچوون و دناڤا سەرکەڤتنێن مەزندا بەرەڤ سەرفرازیەکا مەزن دچیتن و دەستکەڤتیێن مەزن تومار دکەتن...ل روژئاڤا، سێکا ئاخا سوریێ رزگار کریە و چەندین کانتونێن خوبرێڤەبری و برەنگەکێ سەرکەڤتی و نمونەیی رێڤەدبەن و نمونەیەکا ھەری ژێھاتی و سەرکەڤتی ئاڤا دکەن، راستە تیرورەکا دژوار بەرھنگاری وان بویە، دناڤا شەرەکێ گرانێ ئیسلاما ئیخوانیا ئەردوگانی دا ژیانەکا تژی زەحمەتی و دناڤا خەباتەکا مشتی ئاستەنگی دا خەبات و بەرخوەدانا خوە ددومینن، لێ سەروسیمایێ ئیدارەدانەکا پێشکەڤتی و سەرکەڤتی دناڤا رێڤەبەریەکا گەلی دا، بەردەوام بشانازی سەرکەڤتنان تومار دکەن و جھێ خوە ب چاکی دگرن لناڤ گەلێ خوە و لناڤا گەلێن ناڤدەولەتی ژی رەنگ و سیمایێ خوە وەرگرتیە، خەریکە ژی دەستکەڤت و سەرکەڤتنێن مەزن بچنن و مسوگەر بکەن.

سەرەرایی وان ئاستەنگ و رێگریێن لباشور و ل روژھەلاتێ ل بەر ڤێ تەڤگەرێ، لێ دیسان برەنگەکی ژ رەنگان دیسان خەبات و زەحمەتی بەردەوامن و ل روژھەلات پێشکەڤتن ژی برێڤەنە.

دەرفەتێن سێکوچکەیەکێ سەروکاتیێ بو گەلێ مە ھێشتا ھەیە..!!

مە ل دەما بوری بەحسا سەروکایەتی و رێبازا ئوجەلانی کرن، خەریکە ئەڤ رێبەرە سەروەریەکا ناڤنەتەوەیی و کوردستانی بنەجێ تومار بکەتن، لێ ل سەر وەلاتێ مە، ل سەر گەلێ مە پلانگێری ھەیە، دوژمنکاریا بەردەوامە، نەیارتیەکا زور و دژوار بەردەوامە، لێ ل گورەی ئەگەر و کاودانێن نوکە ھەی، دبیتن تێرانەکتن و بەرگەگرتن قورس و خودان خویکەکا زورا گران بن...لەومانێ ھەما ھەنگی و سەروەری و خودانەیکا کوردی و کوردستانی زور تر و مجدترێ پێویستە، دئالیێ دی ژی دا رەنگە پلان و بەرسنگرتنێن نەیارێن مە ژی ھەبن، نەخاسم ئەو دەستھەلاتدارێن خوە دبیتن ددەستھەلاتداریا(عەرب، تورک، فارسی)دا، ل عێراقێ ئەڤ وەلاتە ناڤەگەرھیتن دوخێ خوەیێ جاران، خەریکە بەغدا لاوازببیتن و عێراقەکا فدرالی، بھەرێمداریەکا(کوردی، سونی، شیعی) جھبگریتن و بنەجھببیتن، دیسان سوری ژی ناڤەگەھیتن دوخێ خوەیێ بەرێ، دبیتن ل وێرەژی دەستھەلاتەکا فدرالی(کوردی، سونی، شیعی)، ژ سێ یان چار ھەرێمان دروست ببیتن، دیسان خەریکە کورد جھێ خوە دنەخشەیێ سوریێ دا بنەجھبکەن، رەوشا تورکیا و ئیرانێ ژی ل گورەی نەخشە و پلان و خاستەکێن وان برێڤەناچیتن، ئیرانێ بفەرمی ھەرێما باشور و روژئاڤا قەبیل کریە، نەدویرەژی ل روژێن بھێتن ھەرێما روژھەلات ژی بھێتن دروست کرن، نەیا بەرئاقلە ژی تاکو دوماھیکێ دەولەتا تورکی ھەبونا کوردان رەد بکەتن، چ دویر یان نێزیک خوبرێڤەبەریا کوردێن باکور ژی دێ ئاڤا بیتن...بویە دەلیڤەیا خوبرێڤەبەریەکا کوردی و کوردستانی ئەگەر و بنەمایکێن وان ھەنە، ل عێراقێ سەرکومار کوردە ‌( دکتور بەرھەم سالح) کەسەکێ چالاک و بەرنیاس و خودان تەجروبەیەکا مەزنە، رول و چالاکیێن وی زور ھەنە، باوەریا من ئەوە ھەول و بزاڤێن وی ژی دناڤا تەڤگەریا ناڤنەتەوەیی، ھەرێمی و کوردستانی دا مجد و بکرداری ھەنە و برێڤەیە بیاڤەکێ باش بو عێراقەکا بھێز، بو کوردستانەکا بەختەوەر بنیات و فەراھەم بکەتن، ھەول و بزاڤێن وی ژی برێڤەنە و بەرەڤ پێشدا دچن، مایە ھێز و کەسایەتیێن باشور، کورد و کوردستانی پشتەڤانیا وی بکەن، دەستێ وی بگرن، دەرفەتێ نەدەن بکەڤیتن ناڤا زەحمەتی و ناڤا تەلھە و خەفکێن دوژمنان، ل بەغداژی ھەم دەرفەت ھەنە و ھەم ژی ژلایێ ھەرسێ سەروکاتیان ھەڤکاری و ھاریکاریەکا باش دھێتن دیتن..دەرفەتێن ناڤنەتەوەیی ژی ھاریکارن، لێ بمن وەرە مایە سەروکاتیا ھەرێمێ، دەستھەلاتا باشور، ژ ڤی قەوارەیێ خوە دەربچیتن و سەر ژنوی بھزر و رامانەکا واتادار خو نویژەن و ئاڤا بکەتن، ئەوێ چەندێ ژی بزانن، شەخێەنەکرن و بنەمالی و حزبایەتیا بەرتەنگ و دەمار گیر...نکاریتن سەرگێریا گەلەکێ وەکی گەلێ کورد و کوردستانی بکەتن، باشور ل دەمێ نوکە مەلبەندێ رێڤەبەریا کوردستانێ یە، ئەگەر سەرگێریەکا ساخلەم و ل گورەی ھەل و مەرجێن ھەیی، ل گورەی سەرگێریەکا کورد و کوردستانی بھێتن کرن، بێ شکە بەرھەمەکێ باش و دەست کەڤتێن نیشتیمانی و نەتەوەیی و دیموکراسی دێ بەرھەم گرن و دپاراستی بن.

رێک و چارەسەریێن گونجایی ل گورەی مەرج و کاودانێ ھەیی

ل گورەی دیتانا من و لپاش ھەلسەنگاندنەکا سڤیل و سەرپێ بو ھەل و مەرجێن ھەیی، وەسان دبینم سەرکرد و سەرانێن کورد و کوردستانی یافەرە ل گورەی ڤان خالان نەخشە و پلانێن خوە بو ڤێ قوناغێ جێ بجێ بکەن:

١- ئەگەر چی سەروکایەتی و دەستھەلاتا ھەرێمێ ل گورەی شەخێەنە و بنەمالی کرن و حزباتیەکا قورغکاری ھاتینە دیزاین وئاڤەدانی کرن، لێ دەرفەت ھەیە ل گورەی نەخشە و پلانێن کوردی و کوردستنی خوە دیزاین بکەن، ئیدارەدانە ساخلەم و سازی کری، دویرژ گەندەلی و ل گورەی پرەنسپێن زانستی و سەردەمی و مەدەنی نوێنەریا گەل و وەلاتێ خوە بکەن، کەساتیەکا نیشتیمانی ئاڤابکەن و ل گورەی بەرژەوەندیێن گشتی و مەدەنی سەردەریێ بکەن، ئیدارەدانەکا سڤیل، دیموکراسی، پێشکەڤتی و بپەرەپێدانەکا ئابوری ساخلەم...پەیوەندی و تێکوشانێن ھەڤسەنگ و بەرژەوەندیێن ھەرێمی، ناڤنەتەوەیی بپارێزن و رەوتێ گەل پێشەوایە و ژن و گەنج سەرکردەیە و رابردو و زانست بنەکوکە پەیادەبکەن و تەڤگەرەکا نیشتیمانی ژی ببەشداریا ھەمی ئالیان دروست بکەن.

٢- ل گورەی یاسا و ئەو پرەنسپێن ھەیی، پەیوەندی و دبلوماسیەتا خوە دگەل بەغدا پێش بێخن و دوستایەتیەکا موکوم بینا بکەن، ببن پشتەڤان و ھەڤکارێن سەروک کوماری، دەرفەت زور ھەنە بو کوردان پێشکەڤتنەکا مەلموس بدەست خوە بێخن.

٣- دەمێ وێ ھاتیە کورد وکوردستانی دقولایا وەلاتێ خوەدا، پەیوەندیێن خوە بخورتی پێش بێخن و ئیدارەدانا خوە ژی پێشدا ببەن، ئێکەتیەکا سیاسی و لەشکەری دروست بکەن..ئەڤ دوژمنکاریا ھەیی و نەخاسم ل سەرباشور ژلایێ دەولەتا تورکیا بتەمی بھێتن پروتستو کرن و دەرگەھێ دان و ستاندنا ئاشتیەکا براستی بھێتن ڤەکرن، دەرفەت نەھێتن دانێ باشور ببیتن بنگەھێ دوژمنکاریێ ل سەرئاخ و گەلێ کوردستنی.

٤- دام و دەزگایێن دەستھەلاتا حکومەتا ھەرێمێ ل سەر شەنگەستەیەکێ زانستی و دیموکراستی و گەل پارێزی، سەر ژنوی بھێنە ئاڤاکرن و ساخلەم کرن و ئاڤا ھیێ ئابورەکێ ساخلەم و خورت بھێتن بینا کرن و ئەڤ گەندەلی و شەخێەنا ھەیی بھێتن بنەبر کرن.

٥- راستە کوردستان ل گورەی شەرت و مەرجێن ناڤدەولەتی و دویری ئیرادەیا وان ھاتیە دابەش کرن و ئێکگرتنا کوردستانێ ژی دیسان زەحمەتی و مەرجێن گرانن، لێ ئێکگرتنا کورد و کوردستانیان ژی مەحال نینە و یافەر پێنگاڤێن جدی و کریاری بو بھێنە ھاڤێتن...ھەر نێزیک بونەکا کوردی و کوردستانی ژی دیوارەکێ دوژمنکاریێ دھەرفینیتن و دیوارەکا ئێکگرتنێ ژی ئاڤەدان دکەتن..!!

ل دوماھیکێ ژی دبێژم، ئەگەر سەرکردێن کوردی ژ حەزێن خوەیێن کەسوکی دابەزن و پیچەکێ داگەریانان بو ئێک دوو بکەن، دەستبەرداری شەخێەنەکرنێ و بنەمالی کرنێ ژی ببن، کاودانێ ناڤدەولەتی و ھەرێمی و کوردستانی ژی باش بخوینن و تێگەھشتنا وان ھەبیتن، وەلات پارێزی و گەل پارێزیێ ژی ل پێشیا خوەدانن، رولێ یاسایێ بلند بکەن و داد و داپەروەریێ پیادە بکەن، ئەو خەتەر و بڤاتیێن ھەیی ژی باش ببینن...ھینگێ دەرفەت ھەیە سامان و سروەتەکێ نیشتیمانی ئاڤابکەن، حزب و عەشائیر و بنەمالک و ئەو شەخێەنەیا ھەیی بێخن بن بارێ نیشتیمان و گەلێ خوە...باوەریا من ئەوە ل وی دەمی ئەڤ میراتگریە و قورکاری و بێ سەروبەریا ھەیی ژی، دەرفەت ھنە بنکەن سروەتەکا نیشتیمان و بو گەلی بھێتن بکارئیناندن.