سەرنووچە:

باژارێ دھۆکێ گورستانە بۆ ھندەک کەسان و ئاشتی و پێکڤە ژیانە بۆ ھندەکێن دی

11/17/2019 2:23:56 PM
1532 جار خوێندراوەتەوە
فاروق عومەر
+ -

ئەڤرۆ د چەند سایت و مالپەرێن کوردی دا ب تایبەتی ئەوێن راستەوخۆ سەر ب پارتینە یان ب ئاوایەکێ ژێ د نیزیکن، وەھا بەلاڤدکەن کو دھۆکێ خەلاتی باژارێ ئاشتیێ یێ جیھانی بدەستڤە ئینایە، دبێژن دھۆک باژارێ پێکفەژیانێ دھێتە نیاسین، ھەر ب دیتنا مانشیتان من باوەر ب نەکر کو وەھا ب ساناھی سفکاتی ب چەمکێ ئاشتی و پێکڤەژیانێ بھێتە کرن، پسیارا من، ئەری ئەو چ ناڤەندەکە وەھا بریاریارەک دای و ئاگەھداری وی باژاری نەبووی:

ب رۆژا ڕۆن رۆژنامەڤان دھێنە تیرۆر کرن و بکۆژ ب ئاشتی و سەربەستی دگەرن دز و گەندەل دیار و ئاشکرانە و یاسا ژی تنێ ھەژار و بێ دەستھەلاتان ڤەدگریت و ب سەدان کەسێن بێ گونەھـ د کوژیێن زیندانان دانە و چاڤەرێی یەکئالی کرنا کەیسێن خۆ دکەن چالاکڤان لسەر کۆمێنتەکێ یان پۆستەکێ رەخنەیی دھێن دەستەسەرکرن و سڤکاتی پێ دھێت کرن.

مۆلەتێ بۆ رێکخستنا خونیشاندانان ناھێت داین و ھەر دەما خونیشاندانەک ل دژی دەستھەلاتا باژێر یان ژی بەرژەوەندیێن وان دھێت ئەنجام دان، رێکخەران و خونیشاندەران دەستەسەردکەن و سڤکاتی پێ دھێت کرن و ب ھێجەتا نەبوونا مۆلەتێ بۆ زیندانان دھێن برن. ھەر فەرمانبەرەک رەخنێ بگریت یان ژی داخوازا مافێ خۆ بکەت، دھێتە دەرکرن یان بۆ جھەکێ دی دھێت ڤەگوھاستن چالاکڤان و رۆژنامەڤانان دەستەسەر دکەن و دھێن لێدان و سڤکاتی پێ دھێت کرن و ھەیا کو دھێن تیرۆر کرن ژی ، ئەم دشێین ب بێژین دھۆک گۆرستانا پیشەیا رۆژنامەڤانانە و چالاکڤانێن رەخنەگر و نەرازیە.

سیاسەتمەدار و ئەندامێن تەفاھیا حزبان (ژبلی وان یێن کو ب ڤەشارتی دگەل پارتی شول دکەن) ژبلی پارتی، ژیانا وان گەرەنتی نینە و پرانیا وان رووبرووی گەفا گرتن و لێدان و ھەیا کو کوشتنێ دبیت. نێزیکی ٢٠ بنگەھێن میت و سوپایێ تورکیا ل سنورێ پارێزگەھێ ھەنە و نێزیکی نیڤا ئاخێ دبن ھەژموونا دەستھەلاتا خوجھی نینە و بەردەوام دھێتە بۆمبەباران و تۆپاران کرن.

ب چ پیڤەرەکێ دھۆکێ د نھا دا ب باژارێ ئاشتی و پێکڤە ژیانێ نابینم، ئەگەر ئەو پیڤەر کو دزی و گەندەلی و بکوژ و مافیا و یاساشکێن و زوردار و ئاخفرۆش ب ئاشتی و ب پێکڤە بژین و خەلکێ خێر ژ خۆ نەدیتیە پارێزگەھـ د گورستانێ دا دژیت.