سەرنووچە:

بیست و نەھــ سالێن بێ ناڤ و نیشان

2/16/2020 4:09:13 PM
4283 جار خوێندراوەتەوە
سەردار ھێتوتی
+ -

ل ژێر رەحما فرۆکان، د ناڤا شکەفت و دول و نھالان، دیر ژ شارستانیەت و مرۆڤبوونێ، بێی ھەبوونا پاریەکێ نانی، فرەکا ئاڤا تەژی، بێی ھەبوونا چ ناسناڤەکێ مرۆڤاتیێ، ژ پێخەمەت دوزەکا رەوا، ل ڤان دول و نھالێن دیر دیر، بابێ ژیان دامە و دا پێشمەرگاتیێ، وی د دلێ خۆدا وەلاتەکێ مەزن و بھێز و ئاڤەدان و خۆدان ماف ئاڤاکربوو، ئەو د وێ ھزرێ دابوو کو ژ بۆ زاروک و ناسناڤا ھەبوونا گەلێ خۆ بژیت، لێ ئەنفال و کیمیابارانێ، جاش و لەشکەرێ داگیرکەر ئەو نەچاری رێ قەدەرەکا نەدیار کرن، وی ئەم ژی دگەل خۆدا بەرەڤ وێ قەدەرێ برین.

هەروەسا مە ژی پشت دا ژیانێ و ب پێین خۆ یێن بچویک توخیبێ وەلاتان شەقاند، مە ھند دیت کو ئەمێن د ناڤا کەمپەکێ دا، ئەو جھـ ژی وەلاتێ مە بوو لێ ل ژێر دەستەکێ دیترێ داگیرکەریێ دابوو، مە ل وێرێ تامکرە سرا مەزن، ژورێن بەرتەنگ و سپی، ب راستی مە تامکرە سەمونێن ب ژەھر و گەرما ب کومری، لەورا دووبارە دگەل وی بابی، مە رێ قەدەرا وەلاتەکێ دیتر گرتە بەرەڤ کومارەکا ب ناڤ ئیسلامی چوین، مە خۆ دیت ئەم زاروک د ناڤا پیساتیێن ژیانێ دا دژین لێ مە دەست دا خاندنێ و دگەل بورینا دەمی و سەرما مەزن ئەم ژی مەزن بوین و مە زانی وەلاتەک ھەیە ب ناڤێ وەلاتێ د کیراتیا ھزرێن مەدا لێ ئەو ژی مە زانی کو مەیدانەک ژ کلوخێن مروڤان ل وێرێ ھەیە و شەر شەرێ براکوژیێ یە، لێ دگەل بریارا ڤەگەرێ مە ئاخا پیرۆز ھەمبێزکر، بەس بیست سالێن ژیێ مە لسەر ڤێ ئاخا پیرۆز و نەھێن بوری ھێشتا مە نەشیایە وەلاتێ خۆ ب ناڤەکی ناڤ بکەین.

وەلاتێ من، ھێشتا ئاڤا ڤەخارنێ نینە, کەرتێ ساخلەمیێ یێ ھەرفتیە، کەرتێ پەروەردێ گەلەکێ لاوازە، کارەب مە گوتن لسەر نینە چونکی ھێشتا مە نەدیتیە، و ب گشتی ماف نەدیارن و ھێدی ھێدی وەلاتێ بەرەڤ وەلاتەکێ عەسکەرتاری ڤە دچیت، ئەو وەلاتێ کو مە ھەلبەست ب ناڤی وی د مێشکێن خۆدا ژبەر دکرن، ئەو وەلاتێ کو بابێ مە ژبەر ناڤێ وی ژیان لمە تاری کری، ھێشتا ژ دایک نەبویە و ئەڤا ھەی وەلاتێ مافیا و گەندەلستانە.