سەرنووچە:

عەشیرەتکرنا دەزگەھێن حکومەتا کوردی

9/16/2020 11:21:26 PM
1239 جار خوێندراوەتەوە
تیرێژ کێستەی
+ -

گۆمان تێدا نینە کو دیرۆکا کوردا یا پڕە ژ سەرکردەیان، پتریا وان پاشناڤێ عەشیرەتان یێ پێڤە دیارە یان ئەگەر پاشناڤێ عەشیرەتێ پێڤە نەبیت ژی سەرۆک عەشیرەک بوویە.

 پترییا ڕەوشەنبیر و دیرۆکنڤیسان ژی دھەڤبیرن ل سەر وێ ئێکێ کو کوردان دمەیدانا شەڕی دا سەرکەفتن ل سەر ھەر دوژمنەکی تومارکریە لێ ل سەر مێزەیا گفتوگویان ھەر تشت ژدەست دایە، کورد شەڕکەرێن بێ وێنەنە لێ نەمەلەڤانێن دەریایا سیاسەتێ نە ئەڤە گۆتنێن مللەتێن بیانی نە.

خالا جھێ سەر ڕاوەستیانێ ئەوە کو پشتی دەلیڤە بۆ کوردان چێبوویی و شیاین ببنە خوەدی حکوومەت و ئەو بخوە حوکمی ل خوە بکەن پشتی چارێک ژ سەدەیا دیرۆکا خوە دووبارە کر.

 جارەکادی ئەڤ پارچا دبێژنێ ھەرێما باشور یان حکوومەتا ھەرێما کوردستانێ پشتی بیست و نەھ سالان ژ حکومێ سەرۆک عەشیران ئەڤ دەڤەرە بەرەف ئاقارەکێ نەدیارڤە برییە.

کو عەشیرەت و بنەمالە بووینە خوەدی پێگەھ و دەستھەلاتەکا ڕەھا گرتییە دەست ئێدی ل ژێر ناڤێ خەباتێ ھەر گەندەلی و تالانکرن و بھەدەردانا سامانێ گشتی دکەن.

حکوومەتەک نەکاریت بژێویا ژیانا ھاولاتیێ خوە پەیدا بکت حکوومەتەک ھیچ پڕۆژەیەکێ ناسیونالیزمی نەبیت پشتی چارێک سەدەی ئیفلاسا خوە ڕابگەھینت و سەرۆکێ حکومەتێ ب دەڤێ خوە بێژیت ئەم ب ٢٧ملیار دۆلاران قەرزارین پشتی سیاسی کرینە بازرگان و بھزاران ملیونێر و ملیادێر پەیدابووین ژ سەدەمێ دەستھەلاتا بنەمالەی.

ئێدی گەنج ڕێز ب ڕێز یێ وەلاتی ب جھ دھێلن کو دناڵن ژدەستێ دەستھەلاتەکا ئازادییا ڕادەبڕینێ بەرتەنگ کری حکومەت بوویە ئێخسیرا دەستێ دوو بنەمالەیان مللەتەک کەفتییە بەر ڕەحما دوو پسمامان ھەر یەک ژ وان کۆمپانیەک دامەزراندییە بۆ قوڕغکرنا سامانێ سەر ئەردی و ژێر ئەردی بەھەشتەک ژ بۆ خوە و بنەمالەیا خوە ئافراندییە و جەھنەمەک ژی بۆ مللەتێ ڕەڤ و ئەنفاڵ و کیمیاباران و شەڕ و قوربانی ب سەری ھاتین ئافراندییە.

ئێدی ب سایا سەرێ پێگەھێ بلندێ بنەمالەیێ تەڤ موئەسەسات توشی لەنگیێ بووینە جڤاک ژی دنالیت ژ دەستێ زاڕۆکێن ڤان بنەمالەیان ھەتا گەھشتییە وی ڕادەی شۆڕەش و خەبات ل سەرناڤێ خوە تۆمارکرینە و ھەتا پەڕتۆکێن قوتابخانەیان ژی دپڕن ژقارەمانیێن وان یێن ئەفسانەیی یێن کو دبنەرەت دا چ ڕاستی بۆ نەھاتینە دیتن.

ئێدی کومپانی و زانکویێن ئەھلی و سەرێن پرانیا گران و جھێن خوەش و گوزاری و شۆقە و ڤیلا لێ ئاڤاکرینە و ترۆمبێلێن گران بەھا دبن وان دانە و ل سەر ناڤێ زاڕۆیێن ڤان بنەماڵەیان وەلات یێ ھاتیە تاپوو کرن، جھێ ئاماژێ یە کو چ وەڵات ب حوکمڕانییا عەشیرەتان ب ڕێڤە نەچووینە ئێدی ڤێت ئەڤ مللەتە خوە ژ ڤێ ئێشا گران قورتاڵ بکەت ھزرێن خوە بگۆھوڕن چونکی ئەڤ بنەمالەیە ل سەر نەزانینا ڤی جڤاکی دژین ئەگەر ملـلەت تێگەھشت و حکوومەت کرە موئەسەسە دێ وی دەمی ژ ڤێ پەنجەشێرێ ڕزگار بین، ئێدی زەمەنێ حوکمێ عەشیران نەمایە زەمەن زەمەنێ عەقلێن گەنج و کەسێن خوەدی باوەرنامە و کەسێن بسپورە د بوارێ سیاسەتێ و ئابورێ و پێشکەفتنا مـللەتان دایە.