سەرنووچە:

ڕۆحا نە‌تە‌وە‌ی یا ددە‌ستێ خۆ‌پێشاندە‌ران دا

7/2/2020 2:24:40 PM
2447 جار خوێندراوەتەوە
عە‌گید سە‌لیم
+ -

دڤێت ئەڤ ڕاستیە بھێتە زانین کو چ جارا نەئاین و کلتۆرەکێ ھەڤبەش و ھەڤزمانی و ھەڤخوێنی و یەک ڕەگەزی نەبووینە و نابنە فاکتەرێ درۆستکرنا نەتەوەیەکێ و قەوارەکێ سەردەمانە کو خواستا ملیونەھا مرۆڤان بجھـ بینیت.

بۆ واتەیەک دی چ جارا ئاینێ یٔیسلامێ نابیتە ھێڤێنێ یەکگرتنا بیست و دوو وەلاتێن عەرەبی، و چ جارا زمانێ ئەلمانی بتنێ نابیتە فاکتەرێ یەکگرتنا ئەلمانی و نەمساوی و ھولەندی و پشکەکا مەزنا سویسرییان، ئەڤ چەندە بۆ گەلەک میناکێن دی ژی ڕاستە وەک ھەردوو وەلاتێن کوری و وەلاتێن ئیسپانی و ئەرجەنتینی پرتوگالی و بەرازیلی.

 ئەڤ چەندا وەکری کو ئەڤ گەل و نەتەوە و وەلاتە سەرەرایی گەلەک نرخ و ڕاستیێن جڤاکی و نەتەوەیی و جوگرافیێن و جودا و ھەڤبەش یەکبگرن سیاسەتە و دیسان ژێک جودا ببن ھەر سیاسەتە!.

باشترین نموونە ژی ژ بۆ سەلماندنا ڤێ ڕاستیێ دامەزراندنا وەلاتێ ئیسرائیلێ و ویلایەتێن یەکگرتیێن ئەمریکا یە.

گەر ئەم سەحکەینە مللەتێ کورد ب تایبەتی ل باشوورێ کوردستانێ و لسەر باندۆر و ڤەڕێژ و دەرھاڤێژێن سیاسەتێ ب تایبەت پشتی سالا ١٩٩١ێ ل سەر ب ڕاوەستین و خواندنەکا زانستیابە بۆ بکەین.

ل شوینا کو سیاسەت ببیتە ئەو چارچووڤە خەون و ھیڤیێن مللەتەکی تێدا بەرجستە ببن و کوردایەتی ببیتە ناسنامەیەک یەکگرتی و لسەر بنەمایێن ھەڤنیشتمانی و نەتەوەبوونێ بنەمایێ یٔەرک و مافان تاکو کچ و کورێن ڤی وەلاتی لسەر ڤان ڕاستیان خوە بنیاسن و پێناسە بکەن، ل شوینا کو تراژیدیێن بەرھەمێ دڕنداتیا داگیرکەران ئەنفال و کوردایەتی و زمان و خاک و ئالای.

ڕۆح و جەستەو ئیرادا ڤی نەتەوەیی وەک چیایێ سەفینی ب ھێز بێخن! سیاسەت ب دڕێژاھییا بیست و نەھـ ساڵێن بووری دا تاکە ئەجندا و ستراتیژ تمامکرنا پلان و قڕێژیێن داگیرکەرێن کوردستانێ بوون ئازارەکا مەزن ب دلێ ڤی نیشتمانی کەفت و ڕۆح و جەستەیێ ڤی نەتەوەیی وێرانتر و خرابتر لێکر.

بەرھەمێ ڤێ شێوازێ سیاسەتێ کوردستانا مەزن یا چار پارچە ڤان کرە پێنج پارچە بوونە داھێنەرێن کلتورەکێ سیاسی کو برا بەرانبەر برایی لسەر دەبابێن دۆژمنی گولەیان د یەک و دوو وەرکەن و بوونە خودانێن حەزا تالانیێ کو ژێر خانا ئابووری یا ڤی وەلاتی وێران ببیت.

ب دەستسەرداگرتنا دام و دەزگەھێن دەوڵەتێ و میدیایێ ل شوینا کو چاند و کلتورێ مە ب پارێزن ھەمی ژناڤ برن.

کەرتەکێ تەندرۆستیێ یێ وێران و پەروەردەکا حیزبی ھێز و باوەری و ئینتیمایا مە بۆ حزبێ و عەشیرەتێ ب ھێزتر  لێکر، لسەر ئاستێ جڤاکی وەلات لسەر دوو چینێن ھژار و دەوڵەمەند دا دابەشکر خۆ لسەر ئاستێ باژێری ژی دام و دەزگەھێن دەوڵەتێ وەک غەنیمە ئیستحقاقێن بنەماڵ و عەشیرەتێ دابەش کرن.

ب کورتی ھەمی ئەو ڕەگەز و بنەمایێن کو نەتەوەیی درۆست دکەن سیاسەتێ وێران کر د ڕەوشەکا وەک نھا یا دابەشبوونا سیاسی و نەبوونا دادپەوەریا جڤاکی و بھا و نرخێن کو کەفتینە ھەڕەشەیا ژ ناڤچوونێ، بتنێ یا کو جارەکا دی پارچێن لەشێ ڤی نەتەوەیی کون دکەت و ئیرادا وی یا تەسلیم بووی ڕاکەتە سەر پێیا و ڤی گەلی ژ نڤستنێ ھشیاربکەت خۆپێشاندانەکا سەرتاسەری یە کو ژ زاخو تا خانەقینێ دەست پێبکەت و ل سەدێ بیست و ئێکێ دا ببیتە ھێڤێنێ وەرچەرخانەکا نوی ل کوردستانا باشوور.