سەرنووچە:

بادینان ل بە‌ر دە‌رگە‌ھێ شۆڕە‌شە‌ك نوی !

6/2/2020 9:27:41 PM
2404 جار خوێندراوەتەوە
عە‌گید سە‌لیم
+ -

سەرەرایی شێوازێ حوکمرانیا ب ناڤ کوردی و خۆمالی کو ب دەھان سالە ل باشوورێ کوردستانێ بەرقەرارە و یەکە ژ مودێلێن ھەرە نەشرینێن حوکمرانیێ ل دەڤەرێ و جیھانێ ب گشتی، لێ د ماوێ چەند سالێن بووریدا د قووناغا نوکە دا ھندەک نێرین و بۆچوون و تێگەھێن تازە د ناڤ جڤاکێ مەدا و ب تایبەت ل دەڤەرا بادینان، د ئاستەکێ باش یێ گەشەکرنێ دانەو بووینە پشکەک گرنگ ژ پێکھاتا ھزری و ئەخلاقی و فانتازیا مرۆڤێ کورد.

بێ گومان ئەڤ گورانکارییە و کەلەکبوونا ڤێ ھێزا عەقلی و مورالی و مەعریفی دێ بنە ژێدەرێن گورانکاریێن گرنگ و رادیکال! واتە دەربازبوون ژڤێ قووناغێ دێ بیتە پێتڤیەکا جڤاکی و ئەخلاقی و حەتمیەکا دیرۆکی. گرنگترین ئەو پێشھات و دیتن و تێگەھێن دناڤ جڤاکێ مەدا پەیدا بووین، دێ ھەوڵ دەین گەلەک ب کورتی ئاماژە ب چەند خالان کەین:-

١-ھەڵوەشیانا وێنێ دەستھەلاتا کوردی وەک دەستھەلاتەک پاتریارک. ژبەرکو ب دەھان سالە ئینتیماو و ئیرادا مەیا سیاسی د پارتێن سیاسیدا بەرجەستەیە و حیزبا کوردی درێژەپێدەرا ستراکتورا عەشیرەتێ و خێزانێ بوویە و یا بەدەر بوویە ژ ھەر تێز و تیورەک سەردەمانە، حیزبا کوردی خوە مینا بابەک ب وەفا و ئاغایەک دلسۆز ل قەلەمدایە و ئەندامێن خوە ژی وەک زارۆکێن خوە و ملکێ خوە ھژمارکرییە! دنوکەدا و دبەرێخوەدانا پرانیا تاکێن جڤاکی و ب تایبەت یێن دەڤەرا بادینان ئەڤ بابەتێ ھەنێ کو مەبەست سەرۆکێن حیزبی و نوخبا سیاسینە، بووینە باب  و ئاغایێن گەندەڵ و دز و مافیا و چەتە و ژێدەرێن گەلەک نەھامەتیان بۆ جڤاکێ مە، ئەھا ژبەر ڤێ یەکێ ئەڤ مودێلا پاتریارکیا سیاسی و بنەمایێ روحی و بایلوژیا دناڤبەرا خەلکی و حزبێن کوردیدا ب داوی ھاتییە.

٢-خالا دوویێ دژاییتیکرنا کوێلایەتیێ ئەڤرۆکە و دڤێ قووناغێدا دژایەتیکرنا مەلاقیێ و مورالا کوێلایەتیێ و کلتور و ئەخلاقێ خوە بچووک دیتنێ بوویە خواستەکا ھەری خورت دناڤ جڤاکێ مەدا. ب درێژاھیا سیھـ سالێن حوکمرانیێ ژ تیڕۆرو ترساندنێ و دەست برن بۆ قووت و نانێ خەلکی و پەنابرن بۆ دین وسیاسەت وڕاگەھاندن و تیڕۆرا ھزری، دەستھەلاتێ ڤیایە خەلکی بێ ئیرادە و بێ کەسایەتی بکەت، ڕاستە تا نوکە ژی ڕێژەیەکا باش ژی ب ناڤ رەوشەنبیر و میدیاکار و مامۆستا و فەرمانبەر دبەردەوامن لسەر ژەنینا ئاوازێن کوێلایەتیێ لێ بڕاستی بابەتێ ئازادیێ و کەرامەتا مرۆڤی بوویە ڕاستیەکا پیرۆز و پرانیا مە د خوازن وەک مرۆڤەک ئازاد بمرین نەک وەک کوێلەک بژین.

٣-خالەکا دیتر یا گرنگ خورتبون و بەرفرەھبوونا ئاستێ ھوشیاری و رەوشەنبیریا سیاسی ل دەف تاکێ مە و ئاشنابوونا مرۆڤێ کورد دسەدێ بیست وێیەکێ دا ب ھندەک بھا و نرخێن دۆنیایا مودێرن و مافێن مەدەنی و سیاسی و دیموکراسی! ئەڤێ چەندێ وەکرییەکو خەلکێ مە ب جەریئانە ھندەک پرسێن گرنگ بکەن دەربارەیی ماف و ئەرکێن خوە و داھاتێ وەلاتێ خوە پارێ نەفتێ و داھاتێن نافخو و گومرک و رۆلێ حکومەت و پەرلەمان و دام و دەزگەھێن دیتر و دیسان پلان و پڕۆژێن دەستھەلاتداران بوو کەرتێ پەروەردێ و ساخلەمیێ و کشتوکال، ژبوو ڤێ ڕەوشا نالەبارا دارایی و ئابوری و دەرونیا کو ئەم تێدا دژین دەستھەلاتا کوردی ھیچ جورە بەرسڤەکا عەقلانی و لوژیکی  بۆ ڤان پرسیارێن ل سەری و دەھان پرسیارێن دیتر نینن.

ئەڤان خالێن مە بەحس کری و چەندین خالێن دیتر وەکریە ئەڤرۆکە دئاستێ سوشیال میدیا و دئاستێ جەماوەریدا روحەکا یاخیبوویی و ھەلویستەکێ نەرازیبوونێ یێ توند بەرجەستە ببیت و دبیت د تەمموزەکا گەرم دا یان د کانوون و شوباتەکا گەلەک سار دا دەستھەلاتا کوردی خوە ل بەردەم لافاوەکا توندا جەماوەری ببینیتن، بلا دەستھەلاتا کوردی ڤان راستیان باش بزانیت ئێدی نەب میدیایەکا پروپاگەندەکەر و نەب گوتارەکا ئاینی یا ساختە و نەژی ب دیوان و کینێن ئاغا و دەرەبەگان نەشێن خواستا دەھان ھزار دەرچوویێن بێ کار وخەلکێ برسی و ھەژارێ کوردستانێ بگریت.