سەرنووچە:

چەند تێبینی ل سەر گوتنێنن پارێزگارێ دھۆکێ

5/19/2020 10:14:09 PM
6259 جار خوێندراوەتەوە
محەمەد سادق مەهیدی
+ -

د کۆمبوونەکا بەرێز (فەرھاد ئەترۆشی) پارێزگارێ دھۆکێ دا دگەل میدیاکار و دەزگەھێن ڕاگەھاندنێ دەربارێ خۆنیشاندانێن فەرمانبەران و ب تایبەت مامۆستایان ل دھۆکێ، چەند تشت ژ لایێ جەنابێ ویڤە ھاتنە گوتن، وەک راگەھاندکارەک ئەز دێ چەند خالان ل سەر گوتنێن وی بێژم:

خالا ئێکێ: جەنابێ پارێزگاری گووت: ئەو خۆنیشاندانە یا حزبی بوویە و یا بێ لایەن نەبوویە، د ھەمان دەمـدا جەنابێ وی ھندی کو ب زمانێ حزبی ئاخفتی، ھندە ب زمانەکێ ئیداری نە ئاخفت، کو ئەو بخۆ بەرپرسەکێ ئیدارییە و گرێدای حکومەتا ھەرێمێ یە.

خالا دووێ: ھەرچەندە من نەڤێت ببمە پارێزەرێ چ کەس و لایەنەکی، لێ جەنابێ وی گوت: پشکداریکرنا پەرلەمانتاران د خۆنیشاندانێ دا، نیشانەیا لاوازیا وی پەرلەمانتاری یە، لێ ھـزر ناکەت کو نەدانا مولەتێ ب خۆنیشاندانەکا ئاشتیانە یا فەرمانبەران ل سەر داخوازەکا ڕەوا و دڤیابا ئەو بخوە وەک کەسێ ئێکێ یێ ئیداری، بەرسڤا خۆنیشاندەران دابایە و روونکرن ل سەر بارودوخێ ھەرێمێ دابانە.

د ھەمان دەمـدا ل شوینا کو پشتەڤانیێ ل داخوازیا ڕەوایا فەرمانبەران بکەت، جارەکا دی مامۆستا و فەرمانبەر ب تێکدەر و ئاژاوەگێر بناڤ کرن.

هەر دیسان ئاماژە ب ھندەک ناڤان کر و گووت: ئەڤە پۆلیسن و چ پەیوەندی ب مامۆستایان ڤە نینە، لێ دیارە ئاگەھـ ژ ڕەوشا ژیانا پۆلیسان نینە و ئەو نـزانیت کو پۆلیس ژی فەرمانبەرەکێ حکومەتێ یە و پێدڤییە حکومەتا ھەرێمێ مووچەیێ وی دابین بکەت، وەکو ھەر فەرمانبەرەکێ دن.

خالا سیێ: جەنابێ پارێزگاری چەند لایەنەکێن کوردستانی ب پشتەڤانیا خۆنیشاندانێ توھمەتبار کرن، د ھەمان دەمـدا گوت: دەستێ دەرەکی ل پشت بوو، لێ نزانم کیژان حزبا کوردستانێ یە، جەنابێ وی ب حزبەکا دەرەکی دزانیت؟.

خالا چارێ: پارێزگارێ دھۆکێ گوت: ئەڤ حکومەتە حکومەتا پارتییە، لێ ژبیرا وی چوویە کو چەندین لایەنێن دن یێن کوردستانی د حکومەتا ھەرێمێ دا پشکدارن، ئەگەر مەبەستا وی ئیدارەیا پارێزگەھا دھۆکێ ژی بیت، دیسان یەکگرتوویا ئیسلامییا کوردستانێ ژی د ئیدارەیا پارێزگەھێ دا پشکدارە و چەندین پۆست ژی ھەنە.

ھەروەسا گوت: پارتی بتنێ خۆدانێ خەلکێ دھۆکێ یە، لێ دیارە ئاگەھـ ژێ نینە کو ب دەھان بارەگەھێن حزبێن کوردستانی ل دەڤەرا بادینان ب گشتی ھەنە و ب ھـزاران کادر و ئەندام و لایەنگر ھەنە، ئەگەر ئەڤ خەلکە ھەر پارتی ب خۆدانێ خۆ بزانیت، بۆچی گەھشتینە حزبێن دن؟.

خالا پێنجێ: پارێزگارێ دھۆکێ ناڤێ بەرێز لاھۆر شێخ جەنگی ئینا و ئاماژە ب وێ یەکێ کر: کو چەند کادرێن ئێکەتیێ ل دھۆکێ چووینە سلێمانیێ و دگەل شێخ لاھۆر کۆمبووینە و ئەو کادرە ھانداینە کو پشکداریێ د خۆنیشاندانێ دا بکەن، لێ جەنابێ پارێزگاری ژبیرکریە، کو ئەڤە دەمێ زێدەتری دوو مەھایە قەدەغەیا ھاتن و چوونێ دناڤبەرا پارێزگەھێن ھەرێمێ دا ھەیە، پرسیار لڤێرە ئەوە ئەرێ ئەو کادرێن ئێکەتیێ چاوا ل دھۆکێ چوونە سلێمانیێ و جارەکا دی ڤەگەریانە دھۆکێ بۆ پشکداریکرن د خۆنیشاندانان دا؟.

خالا شەشێ: جەنابێ پارێزگاری گووت: حەقە فەرمانبەرێن کوردستانێ پرسیارێ ژ کاک قوباد تاڵەبانی، جێگرێ سەرۆکێ حکومەتا ھەرێمێ بکەن کا بۆچی مووچە نینن، چونکی ئەو سەرۆکێ شاندا ھەرێمێ یە ل بەغدا بۆ دویڤچوونا مووچەیێن فەرمانبەران و گەھشتن ب چارەسەریێ دگەل بەغدا، لڤێرە دیار دبیت کو دیسان ھەر ئێکەتی یە خەمخۆرا ژیانا خەلکێ و چارەسەرکرنا ئاریشەیێن وان، ئەگەر وەسا نینە، بۆچی سەرۆکێ حکومەتێ بخۆ ھەتا نھا سەرەدانا بەغدا نەکریە بۆ چارەسەرکرنا پرسا موچەیێ فەرمانبەران و باشترکرنا ژیانا خەلکێ کوردستانێ؟.