سەرنووچە:

قەولێ نەبی سێ نە لێ ل رۆژئاڤا چارن

5/9/2020 3:11:41 PM
4548 جار خوێندراوەتەوە
ئیبراهیم ئادەم
+ -

بەلێ ئەڤ چارەم ھەولا پشتی ھەولێر یەک و ھەولێر دوو ل سالێن  ٢٠١٢، ھەروھا رێکەفتنا دھۆک یا ناڤبەرا تەڤدەم و ئەنەکەسە ل سالا ٢٠١٤، بۆ گەھشتن ب رێکەفتن بۆ برێڤەبرنا رۆژئاڤایێ کوردستانێ، و دروستکرنا یەک رێزی ل وی بەشێ کوردستانێ، ھەرسێ رێکەفتنێن بەرێ یەک شێواز بوون، و ھەرسیان رۆک نەدیتن و د پێچەکا خوە دا مرن.

لێ پشتی ٧ سالان رەوشێ دیسا ئەڤ ھەردوو ئالی ل سەر مێزەکێ ل ھەڤ کۆمکرن، و ناڤبینکارەکی بھێز ل سەرێ مێزێ روونشتیە و دخوازە لھەڤکرنا وان جۆداتر ببە، و یا د رۆژەڤێ دا دیارە ئەڤ رێکەفتن دێ جودا بە، ژبەر ئەڤ لھەڤکرن ب ئاستێ یەکێ خوەستا گەلێ رۆژئاڤایێ کوردستانێ یە، ئەڤ خوەست زەمینسازیە ھەری گرنگە ژبۆ رێکەفتنێ، پشترە فشارا ئەمریکا و پشتەڤانیا فرنسا و بریتانیا، و ھەماھەنگیا چەند ئالیێن کوردی ل ھەرێما کوردستانێ ھەم ل ھەولێر و ھەم ل سلێمانی، ھەڤکار دبن داکو رێکەفتنەکە نوو رۆژێ ببینە.

لێ یا جھێ پرسیارێ ئەوە چ بەرژەوەندیا ئەمریکا د ڤێ لھەڤ نێزیکبوونا تەڤدەم و ئەنەکەسێ دا ھەیە؟

بەرژوەندیا ئەمریکا خوە د دوو خالان دا دبینە، یا یەکێ ئەم بخوازن  نەخوازن ھەبوونا ئەمریکا نھا ل سوریایێ نەیاساییە، ژبەر حکومەتا سوریایێ ژ ھەبوونا وێ نەرازییە، و دیمەشق ب خوە داخواز ژ ئەمریکا نەکریە دەربازی ناڤ سوریایێ ببە، بەلکۆ ئەمریکا ب حجەتا شەرێ داعشێ ل سوریایێ یە، و واشنتۆن دخوازە ھەبوونا خوە ژبۆ پێشەرۆژێ بکە یاسایی، ژبەر وێ یەکێ  دخوازە ب رێیا رێکەفتنا ڤان ھەردوو ئالیان بکاربە رۆژئاڤایێ کوردستانێ بکە ئەمرێ واقع د سوریا نوو دا و پشترە ب رێیا رۆژئاڤایێ کوردستانێ ل سوریا بۆ دەمەکە درێژ بمینە، و پلانا خوە ل سوریایێ جێبەجێ بکە، و دووبارە شاندنا ھێزێ و زێدەکرنا ھێزێ ل وێ ناڤچەیێ بەلگەیە کو ئارتێشا ئەمریکا ژ بریارا ڤەکشانا ژ سوریایێ پەشیمان بوویە.

خالا دووێ، ئەمریکا ناخوازە دڤەرا دبن کۆنترۆلا وێ دا ب وی ئاوایی بمینە یان ناکۆکی تێدە ھەبن، ژبەر ب ھەبوونا ناکۆکیان روسیا یان تورکیا یان ئالیەکی دن دکارە دەستوەردانێ بکە، لێ دەما ناڤچە یەکگرتی بە، ئەمریکا سەرپەرشتیا وێ بکە چ ئالی نکارە دەستوەردانێ بکە، یان چ ئالی نکارە رەخنە ل برێڤەبرنا ئەمریکا ل سوریایێ بگرە.

"کوردان سەرێ خوە ژبەر خوە راکرن"

ھەردوو ئالی چ تەڤدەم و چ ئەنەکەسە، پشتی چەندین سال گەھشتنە وێ باوەریێ ئیدی ھەر ئالیەک ب سەرێ خوە نکارە رۆژئاڤایێ کوردستانێ برێڤەببە، ژبەر ھەرچەندە تەڤەدەم ب رێیا ھەسەدە بەرگریەکا مەزن کر ب تایبەتی ل دژی تورکیا ل سەرێ کانیێ و عەفرین، لێ ھەر ھەردوو دەڤەر ژ دەست دان، ئەڤ ب شکست بۆ تەڤدەم تێ زانین، ھاڤدەم ئەنەکەسە ژی نکاری چ تشتەکی بکە ژبۆ خەلکێ ڤان ھەردوو دەڤەران پشتی داگیرکرنا وان ژ ئالیێ تورکیا ڤە، ئەڤ خالەکا پر گرنگ بوو داکو ئەنەکەسە وتەڤدەم ل خوە ڤەگەرن، بزانبن کو ھێزا وان ب یەکبوونا وان دایە.

"دیمەشق و ئۆپۆزسیۆنێ دەردێ کوردان زێدەترکرن"

خالەکا دن ئەوە پشتی زنجیرەک لێدوان چ ژ ئالیێ ئۆپۆزسیۆنێ ڤە کو سڤکایەتی ب کوردان کر، و ب دەھان بنپێکرنێن مەزن ژ کوشت و رەڤاندن و داگیرکرنا مال و سامانێن کوردان ل عەفرین و سەرێ کانیێ، ھەروھا حکومەتا سوریا ھەبوونا کوردان وەک کیانەکێ رەدکر و تەنێ وەک کۆچبەر ژ تورکیا ب ناڤکرن، پشتی ڤی ئاوایێ سەرەدەری دگەل کوردان دا، ھەردوو ئالی گەھشتنە وێ باوەریێ کو نە ئۆپۆزسیۆن دێ مافێ وان بپارێزە و  نەحکومەت، ئەگەر ئەو ب خوە چارەنڤیسا خوە زەلال نەکەن، دێ جارەنڤیسا کوردان د پێشەرۆا سوریایێ دا بێ زەلال بمینە.
"قامشلۆ قەرەبوویا ھەولێر و دھۆکێ دکە"
گەلەک شۆپێنەرێن و ھەڤسۆزێن رۆژئاڤایێ کوردستانێ بەحسا وێ دکەن، چ کەرنتیە کو رێکەفتنا قامشلۆ ھەڤئاوایێ رێکەفتنێن ھەولێر و دھۆکێ نەبە وشکشت نەھینە؟!

چ زەمانەکە فەرمی نینە، لێ گەشوھەوایا جڤین و دانوستاندنان ئالیکار دبە، ژبەر د دەما رێکەفتنێن دھۆک و ھەولێر دا، تشنوجکا مەزن دناڤبەرا ھەولێرێ و رۆژئاڤایێ کوردستانێ دا ھەبوو، یان ب ئاوایەکی دن دناڤبەرا پارتی و پەکەکە دا، لێ ڤێ جارێ گۆھەرتنێن چێبوونە، بۆنمونە دناڤبەرا سەرۆکێ ھەرێمێ نێچیرڤان بارزانی و فەرماندەیێ ھەسەدە مەزلوم کۆبانێ چەندین پەیامێن دەستخوەشیێ ژ ھەڤرە شاندنە، جاران ئەڤ ھەلوێست و نێزیکبوون نەبوو، بەلکۆ بەردەوام ھەولێر و رۆژئاڤا لێدوانێن توند ل دژی ھەڤدوو ددان.
ھەروھا لگۆر ھندەک ژێدەران سلێمانی ژی ڤێ جارێ ھەماھەنگە د رێکەفتنێ دا، و دخوازە ئەڤ رێکەفتن بچە سەر.

"یەپەگە و لەشکەرێن رۆژ"

ب راستی ئەڤ خالا ھەری گرنگ و گرانە د ڤان دانوستاندنان دا ھەروھا د پرۆسەیا ژ ھەڤ نێزیک بوونا ئەنەکەسە تەڤدەم، ژبەر ب راستی ھەبوونا دوو ھیزان گەلەک مەترسیدارە ھەروھا ژبۆ رۆژئاڤا نەگونجایە، و بژاردەیە ھەری باش پێشمەرگەیێن رۆژ وەک ھێزێن دن یێن ناڤ ھەسەدە چ سۆپارتوو یان ھێزێن ئەنجومەنا منبج یا سەربازی، ھەر ھەیکەلا خوە ھەبە، لێ دبن سەرپەرشتیا گشتی یا ھەسەدە دابە، و پشترە ھێدی ھێدی ئەو ھێز ب تەمامی بچە ناڤ ھەسەدە، ژبەر یا گرنگ ئەوە ھێزەکە ھەبە پێکھاتێن ناڤچەیا باکورێ سوریایێ بپارێزە، نەک ب سەر چ ئالی ببە، ھەروھا عەقیدا وێ ھێزێ بۆ خەلکێ و سینۆرێ ناڤچەیێ بە، نەک ئالیێن سیاسی، ژبەر ژبلی کوردان مەسیحی و عەرەب ژی ل ناڤچەیێ ھەنە، واتە ھێز ژبۆ ناڤچەیێ بە، نەک ژبۆ ئالیەکی سیاسی.

"تورکیا رێکەفتنا چارێ دشکینە؟"
ب نەرینا من ئەڤ رێکەفتن دێ سەرکەفتی بە، ئەگەر تورکیا ژێ دوور بە، ژبەر دەما تورکیا دەستوردانێ د دانوستاندنان دا بکە دێ شکستێ پێ بھێنە، و دەما ئەز دبێژم دەستوردان نایێ ب واتایە کو تورکیا دێ ل سەر مێزێ دگەل ئەنەکەسە و تەڤدەم روونە و دانیشە، نا ئەو ب خوە دگەل وان دا ناروونە ژبەر ئیعتیرافێ ب وان ناکە، لێ چەند ریێن دن ھەنە دەستورادانێ  بکە، بۆنمونە ب رێیا پێدانا مەرجێن خوە ب ئالیێ سەرپەرشتیارێ جڤینان، یان ژی ب رێگایێن دن، لێ ئەگەر تورکیا دوور بە دێ سەرکەفتی ببن، و وی وەختی ئەم ھەلا رێکەفتنا پێنجەم یا ناڤبەرا تەڤدەم و ئەنەکەسە نابینن.