سەرنووچە:

پەرلەمانێ عێراقێ دەرگەھێ خوە بەربژێرکرنێ بۆ پۆستێ سەرۆکاتیا کۆماری ڤەکر

شەش مەرج هاتنە دیارکرن
فۆتۆ: 
2018-09-17

6521 جار خوێندراوەتەوە

فەرمانگەھا ڕاگەھاندنا پەرلەمانێ عێراقێ ئەڤرۆ د ڕاگەھاندنەکێدا، دەرگەھێ خوە بەربژێرکرن بۆ پۆستێ سەرۆک کۆماری ڤەکر.

د ڕاگەھاندنێدا ھاتیە، پەرلەمانێ عێراقێ دەرگەھێ خوە بەربژێرکرنێ ڤەکر بۆ پۆستێ سەرۆک کۆماری، ڤێجا ھەرکەسەکێ حەزا خوە بەربژێرکرنێ ھەیە و مەرجێن یاسایی تێدانە، دکاریت داخۆازیەکێ ب ھەڤباری بەلگەنامەیێن فەرمی و ژیاننامەیا خوە پێشکەش ب سەرۆکاتیا پەرلەمانی بکەت د ڕۆژێن ١٨ و ١٩ و ٢٣ێ ڤێ مەھێ.

د داوییا ڕاگەھاندنێدا مەرجێن خوە بەربژێرکرنێ بۆ پۆستێ سەرۆک کۆماری دیارکرنە، بڤی ڕەنگی:

١-دڤیت ئەو کەسە ڕەگەزنامەیا عێراقی بیت و ژ دایک و بابەکێ عێراقی دایک ببیت.

٢-ب تەمامی یێ ھەژی بیت و ژیێ ٤٠ سالیێ تەمام کربیت.

٣-خوەدی ناڤودەنگەکێ باش بیت و شارەزایێ سیاسی ب دەستپاکی و دادپەروەر و دلسۆزی بۆ نشتیمانی ھاتبیتە ناسین.

٤-نابیت ئاستێ خواندنێ ژ خواندنا زانکۆیێ کێمتربیت و ژئالیێ وەزارەتا خواندنا بلند و ڤەکۆلینێن زانستی یا عێراقێ ڤە دانپێ ھاتبیتە دان.

٥-نەھاتبیتە سزادان ب تاوانەکا بێ ڕۆمەت.

٦-نابیت ئێک بیت ژوان کەسان کو حوکمێن یاسایا لێپرسینێ و دادپەروەریێ ڤەگریت.

پەرلەمانی ڕۆژا ٢ێ مەھا تشرینا ئێکێ یا داھاتی وەک  داوی دەم بۆ ھەلبژارتنێن سەرۆک کۆماری دیارکریە، وەک جێبەجێکرنا مادەیا ٧٢ یا دەستوری.

ئەڤە ژی ددەمەکێدایە د ڤێ حەفتیێدا سەرۆکێ پەرلەمانێ عێراقێ و جێگرێ وی ھاتنە ھەلبژارتن، بڕیارە ژی سوباھی پەرلەمان دەست ب وەرگرتنا سیڤیێن وان کەسان بکەت کو خوە بۆ پۆستێ سەرۆک کۆماری بەربژێر دکەن.

س.م