سەرنووچە:

ل سالا دەربازبووی ب سەدەمێ‌ له‌هیان زەرەر ب ٣١ جهێن گشتی کەفتیە

فۆتۆ: 
2021-03-01

198 جار خوێندراوەتەوە

ب سەدەمێ‌ باران و له‌هیان سالا دەربازبووی ب كوژمێ‌ پتری ملیاره‌ك و ٥٠٠ هزار دیناران ٣١ جهێن گشتی و ئاڤا ل سنوورێ‌ پارێزگه‌ها دهۆكێ‌ خراب بوینه‌.

 خالد رێكانی، جێگرێ‌ رێڤه‌به‌رێ‌ گشتیێ‌ باژێرڤانیان ل پارێزگه‌ها دهۆكێ‌ ڕاگەهاند، "سالا دەربازبووی ل وه‌رزێ‌ بارینا باران و درۆستبوونا له‌هیان ل زڤستان و بهارێ‌ ب تایبه‌تی ل هه‌یڤا ئادارێ‌، ب سەدەمێ بارینا بارانێن بهێز و درۆستبوونا له‌هیان زیانێن زۆر ب كه‌رتێ‌ گشتی و وه‌لاتیان ل سنوورێ‌ باژێرڤانیێن سه‌ر ب ڕێڤه‌به‌ریا گشتی یا باژێرڤانیان كه‌فت كو زیانێن وێ‌ پتری ملیاره‌ك و ٥٠٠ هزار دیناربوون و ٣١ جهێن ئاڤه‌دان و گشتی و پرۆژه‌یان بخوڤه‌ دگرتن، ئه‌ڤه‌ ژبلی وان زیانێن ب وه‌لاتیان و مال و مولک و خانو و باخچه‌ و جهێن وان كه‌فتی".

 بەحس لوی یەکێ ژیکر، "مه‌ هه‌موو زیان بۆ جهێن شوله‌ژێ‌ هنارتنه‌ داكو دووباره‌ جاره‌كا دی بهێنه‌ دروستکرنڤه‌، زیانێن مولك و مالێن وه‌لاتیان ژی ب رێیا ناحی و قایمامیان هاتینه‌ خه‌ملاندن، ‌لێ‌ جهێ‌ داخێ‌ یه‌ هه‌یا نها چ ژ وان جهان نه‌هاتینه‌ دروستکرن، ئه‌ڤ ساله‌ داكو زیان كێمتر بن ب هه‌ڤكاریا كومپانیێن پاقژكرنێ‌ هه‌موو به‌رهه‌ڤی هاتینه‌كرن".

 جێگرێ‌ رێڤه‌به‌رێ‌ گشتیێ‌ باژێرڤانیان ل پارێزگه‌ها دهۆكێ‌ دیاركر ژی كو زێدەترین زیان ب قه‌زا ئاكرێ‌ كه‌فتینه‌ و گۆت، "زیانێن جهێن گشتی و ئاڤه‌دان ل سنوورێ‌ سێمێلێ‌ زێدەتری‌ ٢٢٠ ملیونان كو پڕانیا وان ژی دكه‌ڤنه‌ ناحیا مسێریكێ‌، ل ده‌ڤه‌را ئاكرێ‌ ژی زیانێن باران و له‌هیان زێدەتری‌ ٤٢٨ ملیونان و پڕانیا وان ل ناحیا دینارته‌ و كه‌لاتێ‌ بوون، ل ده‌ڤه‌را ئامێدیێ‌ ژی زێدەتر ژ ٢٩١  ملیونان زیان هه‌نه‌، دیسان ل ده‌ڤه‌را زاخۆ ژی نێزیکی ٣٠ ملیون دیناران زیان هه‌بوینه‌ و ل ده‌ڤه‌را شێخان ژی ١٢ ملیون دیناران، دیسان ل سنوورێ‌ باژێرڤانێن سه‌ر ب قه‌زا دهۆكێ‌ ژی كو ئه‌و ژی ده‌ورۆبه‌ران بخوڤه‌ دگریت ٣٢ ملیون دیناران زیان ب جهێن گشتی و پرۆژه‌یان كه‌فتنه‌، كوما گشتی دبیته‌ زێدەتری ملیاره‌ك و ٥٧٧ ملیون دینار).

هـ.إ