سەرنووچە:

تورکیا رازیبوونا خۆ لسەر ڤەکرنا دەرازینکەکا سنوری دگەل عێراقێ نیشاندا

فۆتۆ: 
2021-02-27

1983 جار خوێندراوەتەوە

وەزیرێ ڤەگوهاستن و ژێرخانا تورکیا د جڤینەکێ دا ل ئیستەنبولێ رژدیا وەلاتێ خۆ نیشاندا بۆ ڤەکرنا دەرازینکەکا نویا بازرگانى دگەل عێراقێ. هەروەسا، دگەل دەرازینکێ نیازا ڤەکرنا هێلەکا ئاسنی ژی نە دناڤبەرا هەردوو وەلاتان دا.

عادل قەرە ئیسماعیل ئۆغلو وەزیرێ ڤەگوهاستنا تورکیا دوهی د کونفرانسەکا رۆژنامەڤانیدا پشتی دگەل ناسر حسێن بەندەر وەزیرێ ڤەگوهاستنا عێراقێ ل ئیستەنبولێ جڤیای ڕاگەهاند، وەلاتێ وی دگەل عێراقێ نیازا ڤەکرنا دەرازینکەکا سنوری بناڤێ "ئۆڤاکۆ" هەبویە، هەڤدەم، رژدیا وەلاتێ خۆ نیشاندا بۆ ڤەکرنا وێ دەرازینکا نویا بازرگانى دگەل عێراقێ.

ژئالیێ خۆ ڤە وەزیرێ ڤەگوهاستنا عێراقێ، نیازا عێراقێ ئەشکراکر بۆ دانانا پەیوەندیێن بهێز دگەل تورکیا د بیاڤێن ڤەگوهاستنا  ئەسمانى، ئەردى و هێلێن ئاسنى دا،  خواست ژى نێزیک هێلا ترانزێت دناڤبەرا ترکیا و ئیراقێ دا بهێتە ڤەکرن.

وەزیرێ ڤەگوهاستنا تورکیا بەحسا وێیەکێ ژی کریە، ژبلى ڤەکرنا دەرگەهەکێ نوى یێ بازرگانى دگەل عێراقێ هەردوو وەلات دێ هێلەکا ئاسنى ژى دناڤبەرا خوە دا دورست کەن.

هەڤدەم، هندەک چاڤدێر وەسا دبینن کو زێدەباری قازانجا مەزن یا ئابووری کو تورکیا ژ هەرێمێ دکەت، ئامادەیە د هەر دەلیڤەیەکێ دا قوربانیێ ب ڤان هەموو دەستکەفتان بدەت هەمبەر لاوازکرن یان ب تمامى ژناڤبرنا قەوارەیا هەرێما کوردستانێ و ل دەمێ سەرەدانا کازمى بۆ ئەنقەرەیێ، ئەردۆغانى دوپاتى ل ڤەکرنا دەرگەهێ ئۆڤاکۆى دگەل عێراقێ کریە. عێراق ژى دخوازیت ڤەکرنا دەرگەهێ نوى بکەتە کارتا گڤاشتنێ داکو هەرێما کوردستانێ بکێشیتە ژێر مەرجێن خوە یێن ڕادەستکرنا پەترۆلێ و داهاتێن  دەرگەهێن سنوورى و ناڤخۆیێن هەرێمێ.

هەروەسا میدیایێن نێزیک ل پارتی ژ زارێ ئەندامەکێ مەکتەب سیاسیا وێ حزبێ کو ئاماژە ب وێیەکێ کریە، "ژ میژەیە چاڤێ عێراق و تورکیا ل ڤەکرنا دەرازینکەکا دی یە، لێ ئەم پشتراستین ئەمریکا و رووسیا ناهێلن و دێ رێکێ لێ گرن، ژبەرکو ل وی دەمی تورکیا چ بەرژەوەندی و پێتڤیێن دی یێن هەڤبەش دگەل روسیا و ئەمریکا ل رۆژئاڤا و باکور و رۆژهەلاتا سوریێ نامینن و تورکیا دێ سنورێت ئاخا رۆژئاڤا دەربازکەتن و پشککەکا دی یا ئاخا هەرێما کوردستانێ یا ماددەیێ ١٤٠ ژی بنپێکەتن".

"ئۆڤاکۆ" ئەو دەرازینکا نوی یا کو کار لسەر ڤەکرنێ دهێتە کرن، دوریا نێزیكی ٢٥ كیلۆمەتران دكەڤیتە رۆژئاڤایێ دەرازینکا سنوریا ئیبراهیم خەلیل ل قەزا زاخۆ یا سەر ب پارێزگەها دهۆکێ ل باشورێ کوردستانێ، ئانكو سێگۆشا سنوری یا ناڤبەرا باشور و باکور و رۆژهەلاتا کوردستانێدا.

ئەڤە د دەمەکێ دایە، ل ١٧ى کانوونێ یا سالا دەربازبووی سەرۆک وەزیرێ عێراقێ مستەفا کازمى ل دیڤ داخوازا سەرۆکێ تورکیا رەجەب تەیب ئەردۆغانى سەرەدانا تورکیا کر و دگەل وی وەلاتی گەهشتە لێکتێگەهشتنێ ل دۆر هەژمارەکا بادەکێن ئابوورى و ئێمناهیێ.

و.ح