سەرنووچە:

بلند بریفكانی: ئەگەر چ تشت ب دەستێ هرچێ نەکەڤیت ژی زیانێ ناگەهینیت مروڤان

فۆتۆ: 
2021-02-24

3097 جار خوێندراوەتەوە

سەرۆکێ رێکخراوا کوردی ئەمریکی ڕاگەهاند، "چیایێ گارە گونجاوترین جهە بۆ هرچان و پرۆژەیێ مە سەد ژ سەدێ سەرکەفتنا ئیناتی "، هەڤدەم دبیژیت ژێ، "ئەگەر چ تشت ب دەستێ هرچێ نەکەڤیت ژی زیانێ ناگەهینیت مروڤان بەلکو ب خارنا بەلگ و داران خۆ دەربازدکەت".

بلند بریفکانی سەرۆکی رێکخراوا کوردی ئەمریکی یا ل ١١ی سباتا دەربازبووی شەش هرچ ل چیایێ گارە ل پارێزگەها دهۆكێ ئازادكرین د گەشتا گەرمە نوچەیێن دەمژمێر ١٠ی ئەڤ شەڤەدا لسەر شاشەیا ئێن ئاڕ تی ئاماژە ب وێیەکێ کر، "ژ شەش هرچان ب تنێ دوو هێشتا نەچووینە سەر ژینگەها خۆ یا سرۆشتی، بەریا نها یەک ژ وان هرچان ڕەخێ خالەکا پێشمەرگەی و هەر دیسان چەند جاران هاتنە دناڤا گوندێ ئاشەوا دا، لێ چ زیان نەگەهاندنە وەلاتیێن گوندێ ئاشەوا، هەڤدەم وەلاتیان ژی چ زیان نەگەهاندینە هرچێ".

بریفکارنی دبێژیت ژی، "من پسیارا چەند دکتورا یا کری، ئەگەر چ بدەستێ هرچێ نەکەڤیت ژی هرچ زیانا ناگەهینیتە مروڤان بەلکو بەلگ و داران دخۆت و خۆ دەربازدکەت، لێ وەختێ هنگڤینی دبینیت ئەو تشتەکێ دی یە، مروڤ ژی هنگڤینی بینیت قەستێ دکەتێ تشتەکێ نورمالە، لێ چیایێ گارە گونجاوترین جهە بۆ هرچان و پرۆژەیێ مە سەد ژ سەدێ سەرکەفتنا ئیناتی و بوویە فوکسا میدیا و کەنالێن جیهانی".

ئەو سەرکەفتنە کو هرچ نەزڤریتە دناڤ گوندان دا، یان فوکسا جیهانێ لسەر چالاکیێ بیت سەرکەفتنە؟ دەربارێ ڤێ پرسێ  بلند بریفکانی دبێژیت، " ئەز نەشێم گوهێ خۆ بدەمە شەش چالاکڤانان کو ل ئەلمانیا خۆ دانن چالاکڤان و دبێژن بلندی جی پی ئێس ب هرچان ڤەکریە کو ل مەقەرێن فلان و فلانی بدەتن، ئەڤە خۆ دانن چالاکڤان، تە چالاکڤان دیتیە ل هەمی دونیایێ سیخوریێ بکەتن، دناڤبەرا من و برایێ مندا تێک بدەت، و د بنیات دا کەسێ هاش بابەتی جی پی ئێ سی نینە".

هەڤدەم دبێژیت، "ئەوکەسێن رەخنێ ل ڤی پرۆژەی دگرن هەمی ئەون یێن ل ئەلمانیا، کەس نزانیت ئەڤە کینە و کورێ کینە، هەر وەکی ل دهۆکێ و زاخۆ مەیێ ل موخلکەکێ داین و ئەڤێن بهێن ژ وان دهێت مە هاڤیتینە وێرێ، ئەو ئاریشەیین ل دهۆکێ چێدبن و رەخنەیێن لسەر هرچا و کارێ سیاسی دهێن هەمی ئەڤە ئەگەرن، بەرۆڤاژی ئەڤە باشترین جهە بۆ ئازادکرنا هرچان".

ل داویێ ژی بەحسا وێیەکێ دکەت، "ل هەمی دونیایێ تە دیتیە چالاکڤان و ژۆنامەڤان سیخوریێ بکەن؟، و ئەڤ ئاریشەیێن بۆ خەلکی مەیێ دهۆک و زاخۆ چبووین دڤی دەمی دا هەر ئەوبوون کو مە زارۆک و خیزانێن وان دیتین شەریفن و هەمی کەس دنیاسن".

ئەڤە د دەمەکی دایە، ل ١١ی ٢ی ٢٠٢١ێ رێکخراوا کوردی ئەمریکی شەش هرچ ل چیایێ گارەیێ سنورێ قەزا ئامێدیێ ل پارێزگەها دهۆکێ ئازادکرن، و ئەڤرۆ یەک ژ وان هرچان هاتبوو دناڤ گوندێ ئاشەوا دا و زیان ب مێشێن هنگڤینی و مریشکێن وەلاتیان گەهاندبوون.

هەڤدەم، رۆژەکێ بەریا وێ بەروارێ واتا ل ١٠ی ٢ی  ٢٠٢١ێ تورکیا ئوپەراسیۆنا پەنجێن بازێ دوو دژی هێزێن پەکەکێ ل چیایێ گارە ڕاگەهاندبوو، بۆ چار رۆژان شەر ل وی چیایی بەردەوامبوو.

و.ح