سەرنووچە:

دوو وەلاتیێن کورد ل تەقینێن ئەڤڕۆ یێن بەغدا ژیانا خۆ ژدەستدانە

فۆتۆ: 
2021-01-21

563 جار خوێندراوەتەوە

نوچەگەهانێ ئێن ئار تی راگەهاند، دوو ژ وان کەسێن ل تەقینا ئەڤرۆ یا بەغدا ژیانا خۆ ژدەستدای وەلاتیێن کوردن و ئاکنجیێن باژێرێ دهۆک و هەولێرێ نە.

بریار نێروەیی نوچەگەهانێ ئێن ئار تی سەرەدانا بنەمالا وی کەسی کر کو ئاکنجیێ کۆمەلگەها رزگاریە ل پارێزگەها دهوکێ بناڤێ غازی حازم و کەس و کارێن وی دبێژن، کوڕێ وان بازرگانە و بو وی کاری ژی سەرەدانا بەغدا کریە . دبێژن ژی، ژدایکبوویێ ١٩٧٤ێ و دەما ٢٠ سالا یە بەرهەمێ خۆمالی کوردی بۆ باژێرێن خواروویا عێراقێ و ب تایبەتی بەغدا دبەت.

ژ ئالیەکێ دی، لدیڤ زانیاریان، کەسەکێ دیێ کورد کو ئاکنجیێ باژیری هەولێرێ یە ل تەقینێت ئەڤڕۆ یێن بەغداد گیانێ خو ژدەستدایە، لێ هێشتا چ زانیاریێن وەها د وی باری دا نینن.

ئەڤڕۆ پێنجشەمبێ، ل بەغدایا پایتەختێ عێراقێ دوو تەقین ل ناڤچەیێن باب شێخ و گورەپانا تەیران روویدا و هەروەسا لدیڤ ئاخفتنا وەزارەتا ساخلەمیا عێراقێ، ژ ئەگەرێ وێ چەندێ ٣٢ ژیانا خۆ ژدەستدایە و ١١٠ کەس ژی برینداربوون.