سەرنووچە:

ل پێشانگەهێن تڕۆمبێلا یێن دهۆکێ زێدەتری یەک ملیۆن دۆلار هاتنە دزین

فۆتۆ: 
2020-09-26

765 جار خوێندراوەتەوە

ل یەک ژ پێشانگەهێن دهۆکێ چاچیەکێ کۆمپانیایەکا تڕۆمبێلان ب فێلبازی پارە و تڕۆمبێل بناڤێ کۆمپانیێ ژ خەلکی وەرگرتنە، کو کۆژمێ زێدەتری ملیۆنەکا دۆلارانە.

نووچەگەهانێ ئێن ئاڕ تی ڕاگەهاند، دەما حەفتیەکێ یە ئەڤ ئاریشە ل دهۆکێ پەیدابوویە، کو چاچیەکێ یەک ژ کۆمپانیێن دیارێن تڕۆمبێلان ل دهۆکێ کو کارێ فرۆتن و کڕینا تڕۆمبێلان کریە، هەروسا ئەو چاچیە بوویە ژ کەسێن باوەرپێکریێ خودانێ کۆمپانیێ و چەندین جاران بۆ وەرگرتن پارە و مامەلەیێن کۆمپانیێ هاتیە ڕاسپاردن.

دیارکر ژی، لگۆری زانیاریان ئەو چاچیە بەریا چەند ڕۆژان ڕابوویە بناڤێ کۆمپانیێ پارە و تڕۆمبێل ژ نێزیکی ٢٥ کەسان وەرگرتنە و گوتیە دێ گەهینیتە کۆمپانیێ، لێ ژ وی دەمی وەرە چاچی نەدیارە و خودانێ کۆمپانیێ ژی دبێژیت ئەو پارە نەگەهشتنە دەستێ وان.

بەحسا وێ یەکێ ژی کر، کو هەیا نها پێنج سکالا لسەر چاچی و کۆمپانیێ هاتنە تۆمارکرن و ئەو خەلکە داخوازا پارەیێ خۆ دکەن، هەڤدەم، خودانێ کۆمپانیێ دبێژیت وان چ داخوازیێن وەسا ژ چاچی نەکرنە و ئەو ئاگەدار نینە و چ پارە نەهاتنە دەستێ وان.

هەروەسا دزانین، کو هندەک ژ وان کەسێن دی یێن پارە ژێ هاتینە وەرگرتن گوتنە، دێ ئەو ژی سکالایێ تۆمارکەن و داخوازا زەلالکرنا چارەنڤیسێ پارەیێ خۆ کەن.

هەڤدەم، دەربارەی دیارنەمانا ڤی کۆژمێ پارەی، پۆلیسێن دهۆکێ چ هوورکاری نەدانە و ئەو دبێژن، دێ کار لسەر سکالایێن وان وەلاتیان کەن و د نها دا وان دیڤداچوون بۆ ڤی بابەتی دەستپێکریە.

س.م