سەرنووچە:

تورکیا ڕاگەهاندنەک لسەر مەزلوم کۆبانێ بەلاڤکر

پشتی جڤینێ دگەل نوورا تایبەتیا نەتەوەیێن هەڤگرتی
فۆتۆ: 
2020-09-18

1961 جار خوێندراوەتەوە

وەزارەتا دەرڤەیا تورکیا ڕاگەهاند، دلگرانن ژ جڤینا مەزلوم کۆبانێ فەرماندارێ گشتیێ هەسەدێ دگەل بەرپرسێن نەتەوەیێن هەڤگرتی دا.

وەزارەتا دەرڤەیا تورکیا د ڕاگەهاندنەکێ دا بەحسا وێیەکێ کریە، ڤێرجینا گامبا نوونەرا تایبەتیا نەتەوەیێن هەڤگرتی بۆ کاروبارێن زارۆکان و ململانیێن چەکداری، دگەل مەزلوم کۆبانێ فەرماندارێ گشتیێ هێزێن سوریا دیموکرات هەسەدە جڤیایە و ئەڤ یەکە ژی بوویە دلگرانیا تورکیایێ.

ئاماژە ب وێیەکێ ژی کریە، ئەڤ سەرەدەریە لادانە ژ بنەمایێن نەتەوەیێن هەڤگرتی بۆ ڕووبڕوبوونا تیرۆرێ، داخواز ژ نەتەوەیێن هەڤگرتی کر، دەملدەست پێنگاڤێن پێدڤی دەربارەیێ وێ جڤینێ بگرنەبەر.

وەزارەتا دەرڤەیا تورکیا ڕاگەهاندیە ژی، د دەما ٣٠ سالێن شەرکرن دگەل پەکەکێ دا، ئەمریکا و نەتەوەیێن هەڤگرتی بەرپرسیارن ل ژیان ژ دەستدانا ٤٠ هزار کەسان.

ئەڤەژی د دەمەکێ دایە، دگەل وێیەکێ کو تورکیا  مەزلوم کۆبانێ و هێزێن سوریا دیموکرات ب تیرۆریست بناڤ دکەت، لێ ئەمریکا  و بەشەک ژ جڤاکا نێڤدەولەتی ب فەرمی سەرەدەریێ دگەل دا دکەن.