سەرنووچە:

ئامێدی.. ل زالگەها شێلادزێ رێگری ژ تیما ئێن ئاڕ تی هاتە کرن

فۆتۆ: 
2020-06-03

785 جار خوێندراوەتەوە

ل زالگەها ناحیەیا شێلادزێ یا سەر ب قەزا ئامێدیێ ڕێگری ژ تیما کەنالێ ئێن ئاڕ تی هاتەکرن دەربازی ناڤ ناحیەیێ ببن و بەرنامەیێ سەکۆ تۆمار بکەن.

تائیف گۆران نووچەگەهانێ ئێن ئاڕ تی ڕاگەهاند، "ئەڤرۆ چارشەمبیێ مە دخواست بچینە ناحیەیا شێلادزێ بۆ تۆمارکرنا بەرنامەیێ سەکۆ، لێ ل زالگەها ناحیەیا شێلادزێ یا سەر ب قەزا ئامێدیێ ڕێگری ژ تیمامە هاتەکرن کو دەربازی ناڤ ناحیەیێ ببین و بەرنامەی تۆمار بکەین".

دیارکر ژی، "هەرچەندە تیما مە باج و پشتگیریا کەنالی ڤێبوو، لێ ڕێ نەهاتە دان دەربازببین، کو تیمامە پێکدهات ژ من (تائیف گۆران) پێشکەشکارێ بەرنامەیێ سەکۆ و هندرین سەردار وێنەگرێ بەرنامەی".

گوت ژی، "دیڤدا مە خواست ل ناحیەیا دێرەلۆک بەرنامەی تۆمار بکەین، لێ چەند کەس هاتن و گوتنە مە ڕێ نادەین ئێن ئاڕ تی لێرە بەرنامەی تۆمار بکەت".

پێشتر، وەزارەتا ناڤخۆیا هەرێمێ ڕاگەهاندبوو، د دەما قەدەغەیا هاتن و چوونێ دا ژی، دەزگەهێن ڕاگەهاندنێ دکارن ب پشتگیریا دەزگەهێن خۆ یێن ڕاگەهاندنێ ڕوومالێ بکەن و قەدەغەیا هاتن و چوونێ وان ناڤەگریت".

ئەڤە ژی دەمەکێ دایە، هەر ئەڤرۆ بەرپرسێ دیجیتاڵ میدیایا ئێن ئاڕ تی راگەهاند، ژ سەرێ سپێدەهیا ئەڤرۆڤە ب ئاوایەکێ ڕێکخستی بزاڤا هاککرنا ڕووپەلا ئێن ئاڕ تی دهێتەدان و ژبەر ڤێ یەکێ ئاستەنگ بۆ کارکرنا ڕووپەلێ دروستبوویە.

س.م