سەرنووچە:

سەرۆکێ حکومەتێ دەربارەی ڕەوشا کۆرۆنایێ ل هەرێمێ ڕاگەهاندنەک بەلاڤکر

فۆتۆ: 
2020-05-29

620 جار خوێندراوەتەوە

سەرۆکێ حکومەتا هەرێمێ ڕاگەهاند، ژبەر سستیا پێگیربوون ب ڕێنمایێن ساخلەمیێ، هندە پەتایا کۆرۆنایێ دیسان بلەز بەلاڤ ببیتەڤە. دبێژیت، "هندەک ئالی بزاڤا ب سیاسیکرنا بزاڤێن حکومەتێ ددەن و ژیانا وەلاتیێن خۆ بۆ خزمەتا ئارمانجێن سیاسیێن خۆ ئێخستنە د مەترسیێ دا".

ئەڤرۆ ئەینیێ مەسرور بارزانی سەرۆکێ حکومەتا هەرێمێ د ڕاگەهاندنەکێ دا دیارکر، "مەترسیا پەتایا کۆرۆنایا نوو (کۆڤید-١٩) گەلەکا جدیە و د ڤان ڕۆژان دا ژبەر سستیا پێگیربوون ب ڕێنمایێن ساخلەمیێ، هندە پەتایا کۆرۆنایێ دیسان بلەز بەلاڤ ببیتەڤە".

دازانین ژی، "مە ل دەستپێکا بەلاڤبوونا ڤێ پەتایێ، داخواز ژ وەلاتیێن خۆشتڤی کر، کو پێگیری ڕێنمایێن ساخلەمیێ بن و سوپاسیا هەوە ژی دکەم، کو پێگیربوون و ب ئاوایەکێ گەلەک باش ڕێ ژ بەلاڤبوونا ڤێ پەتایێ هاتە گرتن، ئەڤ سەرکەفتنە بوو جهێ بەحس و سەرنجا گەلەک ولات و سازیێن ناڤدەولەتی".

ئەو یەک ژی ڕاگەهاند، "لێ جهێ داخێیە نها ڤێ پێگیربوونێ سستی کەفتیێ، هندەک ئالی ژی بزاڤا ب سیاسیکرنا ڤان بزاڤێن حکومەتێ دانە و خواستنە ڕێنمایێن ساخلەمیێ بێ بها و بێ مفا نیشان بدەن و جهێ داخێیە ژیانا وەلاتیێن خۆ بۆ خزمەتا ئارمانجێن سیاسیێن خۆ ئێخستنە د مەترسیێ دا".

بەحسا وێ یەکێ ژی کریە، "نها ئەوێن کو ل دژی ڕێنمایێن ساخلەمیێ ڕەفتار کرنە و خەلک هاندانە پێگیری ڕێنمایێن نەبن، پێدڤیە بەرپرسیارەتیا مەترسیا گیان و ساخلەمیا ڤی خەلکی د ستۆیێ خۆ دا بگرن و داویێ ب یاریکرن ب ژیانا خەلکی بینن".

ئەو یەک ژی گوتی، "ئەز جارەکا دی داخوازێ ژ هەموو خوشک و برایێن هەڤنیشتمانیێن خۆ دکەم، پێگیری ڕێنمایێن ساخلەمیێ بن  و ساخلەمیا خۆ و کەسوکار و خەلکێ دی ژی، دبن باندۆریا وێ پرۆپاگندەیێ نەئێخنە د مەترسیێ دا".

ئەڤە ژی دەمەکێ دایە، ژبەر لێکەفتێن کۆرۆنایێ و قەدەغەیا هاتن و چوونێ و ڕەوشا خرابا دارییا هەرێمێ، وەلاتی دلگرانکرنە ژ ڕێکارێن حکومەتێ ل دژی ڤایرۆسێ کۆرۆنایێ.

س.م