سەرنووچە:

گرۆپێن کانێ پاشەکەفتێ من و دەنگێ مامۆستایان ل دهۆکێ زەلالکرنەک دا

فۆتۆ: 
2020-05-23

1162 جار خوێندراوەتەوە

ئازادنەکرنا مامۆستا بەدەل بەرواری بێ وژدانی و زۆلم و ستەمە، ئەگەر د ئەڤرۆ شەمبیێ دا نەهێتە ئازادکرن دێ پەنایێ بەنە بەر قونسلخانە و سازیێن ناڤ نەتەویی.

د زەلالکرنەکا نڤیسکی دا دەربارەی ئازادنەکرنا بەدەل بەرواری هەریەک ژ گرۆپێ کانێ پاشەکەفتێ من و دەنگێ مامۆستایان ڕاگەهاندن، "نە ئازادکرنا مامۆستا بەدەلی جهی مەندەهۆشیێیە، ژبەر کو چ بەلگەیێن یاسایی نینن بۆ مانا وی د زیندانێ دا بتنێ شەڕەکێ دەرونی و نزمکرنا مورالێیە، لەوما ئەم مانا بەدەل بەرواری د زیندانێ دا ب بێ وژدانی و زۆلم و ستەم ل قەلەم ددەین و پاراستنا گیانێ وی دکەینە ستویێ دەستهەلاتا هەرێمێ دا".

دیارکریە ژی، "پێدڤیە دەملدەست بهێتە ئازادکرن و بێ گیرۆکرن، هەروەسا نەئازدکرنا مامۆستا بەدەل ڕوویێ دیموکراتیەتێ و مەدەنیێ چ ل ناڤخۆ و چ ل ئاستێ دەرڤەیی هەرێما کوردستانێ کرێت دکەت".

دایەزانین ژی، کو ئەگەر ئەڤرۆ ڕۆژا شەمبیێ ٢٣ێ گۆلانێ بەدەل بەرواری نەهێتە ئازادکرن، دێ پەنایێ بەن بەر نەتەوەیێن هەڤگرتی و قونسلخانەیان و سازیێن ناڤ نەتەوی.

د داویێ دا ژی گوتیە، "وەک هەڤسوزی بۆ مامۆستا بەدەل، مە وەک گرۆپێ کانێ پاشەکەفتێ من و دەنگێ مامۆستایان بڕیار دایە کو چ ڕێوڕەسمێن جەژنێ نەگێڕین و داخوازێ ژ ئەندامێن گرۆپان و هەموو مامۆستا و فەرمانبەران دکەین هەمان هەلویستی وەرگرن".

س.م